1 Samueli 25 - Amazwi Yakwe Leza 2013

Imfwa yakwe Samueli

¹ Samueli afwa, nga aina Izlaeli yonsi iyakongana ku kumulosya. Yamuzisile apakwe kwene ku Lama. Alino Davidi atentemukila ku lwanga lwa Maoni. Pacisila cakwe vii, Davidi atentemukila ku Lwanga lwa Palani.

Ukulanda ivya pali Davidi na Abigelo

² Kwali umuntu umwi mu musumba wa Maoni wino wakweti impanga mupipi nu ku Kalimeli. Wene wali umukama wakwe cimwi. Wakweti imfwele amazimbi yatatu ni mbuzi izimbi lyonga, zino wasenyanga ku Kalimeli.

³ Izina lyakwe wali a Nabali nga umuci wakwe wali a Abigelo. Wali amama umwi uwamano nupya umuyembe. Lelo iya, umwina Kalebu, wene wali umunkalwe nupya umusepukilwe.

⁴ Davidi lino ali mu lwanga, auvwa ukuti Nabali akusenya imfwele.

⁵ Acino atuma alumendo ikumi lyonga nga ayanena ati, “Katukini mutumbele ukuya ku Kalimeli nga mukamulamuke umwi zina lyane.

⁶ Mumunene muti, ‘Davidi akuti kunuli kawala! Si ulongo luye pa amu ng'anda yako na pali vyonsi vino wakwata!

⁷ Wene watauvwa ukuti ukusenya imfwele ku Kalimeli. Yakacema yako lino twali nayo tutayacuzyanga. Nupya kutali icintu cimwi icakwao cino yaponzizye pa nsita yonsi ino yatenzi ku Kalimeli.

⁸ Ndu kasi uyuzye yamakunena. Icaleka pokelela alumendo yayo, pamulandu wakuti tukwiza kuno pa wanda wa cimulo. Napapata ungapeela alumendo yayo, pamwi nani kwene ne Davidi, konsi kano ukweti.’ ”

⁹ Lino alumendo yano Davidi watumile yafika kuku, iyanena Nabali amazwi yonsi yano Davidi wayanenyile. Alino iyamulolela panono kuti ayaasuke.

¹⁰ Lyene Nabali aasuka ati, “Uzye Davidi umwana wakwe Yese, ivyani vino ali? Amanda yaa aomvi yatiyaseeka sana ukupuuka ku asambazi yao.

¹¹ Uzye pacani cino nemo ningatola ivyakulya pamwi ni vyakumwa vyane nga ni nyama zino nkomile aomvi yane avino mpeele antu yano ntamanyile nakuno yafumile?”

¹² Avili vino alumendo yakwe Davidi iyasenuka iyaswilila. Nga lino yafika kuku iyaya iyanena Davidi ivintu vii vyonsi.

¹³ Davidi nawe pali pakunena antu yakwe ati, “Cila muntu aisokele ulupanga!” Acino cila muntu aisokela ulupanga lwakwe, na Davidi kwene aisokela. Antu manye ukufika ku myanda ini ali yano yakatwike nu kulondela Davidi. Yauze nayo imyanda ini ali yano iyasyala yakulinda iviya.

¹⁴ Alino umuomvi wenga wakwe Nabali anena Abigelo umuci wakwe Nabali ati, “Davidi wali watuma inkombe ukufuma ku lwanga kuti yafisye ulau wakwe ku musambazi witu, lelo umusambazi wene waliwayatuka.

¹⁵ Nanti angala cali cili vivyo antu yatusunzile ningo sana. Kutali nanti ukutucuzya nanti panono. Nalino twali umu mpanga pamwi na alio, kusi nanti cimwi cino twaponzizye.

¹⁶ Yene yatucingililanga imbali zyonsi, usiku nu musanya lino twacemelanga imfwele kuku.

¹⁷ Acino fwandi elenganya sile ningo, ulole cino ungacita penepo, pamulandu wakuti uzanzo wasya uponele umusambazi witu pamwi na ang'anda yakwe. Nabali wene uwalwiswa nupya asipindululwa cakuti citangazipa ukulandana nawe!”

¹⁸ Abigelo pali pakukalauka nu kutoola imikate imyanda iili, ni nyambi ziili zyakwe waini, ni mfwele zisano iziteyanye ningo, na matepe yasano ya ngano izisalule, ni ving'ango umwanda onga ivya viseekwa vya matingi ayume nga na makeke imyanda iili apangilwa ku mikoto ya mikunyu. Alino avinyepelela pali yapunda.

¹⁹ Alino anena aomvi yakwe ati, “Ndokwini kolelini. Nemo namaizanga pacisila cinu.” Lelo wene wacisile cico ukwaula kulanda nanti cimwi kuli iya, Nabali.

²⁰ Lino akuya ale akwezile pali punda wakwe, nalino wazingilila sile akamba, iyakomenkana na Davidi na antu yakwe yala yakutentemukila ulunga na aliwe.

²¹ Lilyo ale Davidi watailizyanya wakwe cimwi ati, “Ata see! Uzye fwandi naicuzyanga sile apakusumba insita yane ukucingilila ivintu vya muntu wii umu lwanga? Ntaponzizye icintu cakwe nanti conga. Wene wambwezyezya uyi pa visuma vino namucitila!”

²² Alino Davidi alapa nu mulapo ati, “Si Leza andye, ndi cakuti lino ilanzi litacili litunke, namasya umwana umonsi uwamu antu yakwe asyale akufuta!”

²³ Lino Abigelo walola Davidi, zuwazuwa aikila pali punda wakwe, nga apona pansi afupime

²⁴ pipi na pa ngazo zyakwe Davidi. Alino avwanga ati, “We musambazi wane, napapata leka umulandu onsi uye pali nene. Napapata unzumilizye ne muomvi wako kuti ndande, na kuti utezye kunondi.

²⁵ Mukwai napapata, ala we musambazi utasumba amano kuli Nabali, umuntu wilya uwa lukang'ansi. Wene iciwelewele ndi muno izina lyakwe lyalola. Ni micitile yakwe iya uwelewele! Lelo nemo ne muomvi wako, we musambazi, ntalimbweni antu yano wali watuma.

²⁶ “Ali cino fwandi musambazi nemo nalapa ukuti Yawe aliwe uwali wakulesya ukukoma antu yaa pa kukanacita icilanduzi. Ali cino nemo nkuti anisi yako na yayo yonsi akulonda ku kukoma yakawe nalyo wakwe Nabali kwene.

²⁷ Musambazi, su ngala upokelele ivya wila vino nakuletela nu kuvipeela ku yaomvi yako.

²⁸ Napapata unjelele ne muomvi wako pamulandu uli onsi uno nakutala. Pasi pano Yawe nawe alakulasika utesi uwa manda pe, pamulandu wakuti ukulwilila Yawe inkondo zyakwe. Nupya kusi icilumbelo nanti cimwi icilakuponela lino ucili umumi.

²⁹ Ndi umuntu mui wezya ku kuzanza kuti akukome, Yawe Leza wako alakucingilila wakwe vino umwi akacingilila icuma icamutengo ukulu. Lelo wene alavwinta anisi yako wakwe vino antu yakafiika amawe na legeni.

³⁰ Fwandi lino Yawe alafikilizya ivintu vino wakulaya, nu kukucita umwene uwa ina Izlaeli,

³¹ Ala musambazi utalaya nu mulandu nanti umwi uwaku kusakamika nanti umwenzo wako utalacululuka pamulandu wakukoma antu nu kucita icilanduzi. Lyene lino Yawe wapeela mwensi ucimvyo, muce munjiusye, ne muomvi winu.”

³² Davidi nawe pali pakunena Abigelo ati, “Alumbanyiwe Yawe, Leza wa ina Izlaeli, wino uwatakutuma ilelo ku kwiza nkomenkanya.

³³ Si angala kawala pa mano yaa yano wampanda. Pano awewe wandesya api lelo ukukana koma antu. Wandesya ukukana cita icilanduzi.

³⁴ Pasi pano inkulapa umwi zina lyakwe Yawe, Leza waumi, uwa ina Izlaeli, wino uwandesyanya ukukucitila iciipe. Iciya cakuti ukana ukwiza nkomenkanya zuwazuwa, akatondo ngano kutasiile umuntu nanti wenga umonsi uwamu ng'anda yakwe Nabali uwange apusuke!”

³⁵ Lyene Davidi pali pakupokelela ivintu vino Abigelo wamuletile, nga amunena ati, “Pita ulumi ukwako. Natinuvwa amazwi yonsi yano watuvwanga, nupya namakucitila vino ukulonda.”

³⁶ Walanga Abigelo waswililamo, azana Nabali watacita icimulo umu ng'anda yakwe kwati cino yakateyanyizizya ya mwene. Wene wasansamwike nga akoleka sana cakuti umuci atamunenyile nanti cimwi mpaka ukufika akatondo.

³⁷ Lyene akatondo lino waini wakololoka Nabali, umuci amunena ivintu vii vyonsi. Nga lino Nabali uvwa vivyo afwa icipafi, nga alambalala papa wa mulando.

³⁸ Lino papita manye amanda ikumi, Yawe afulula Nabali nga afwa.

³⁹ Lino Davidi uvwa ukuti Nabali watafwa, avwanga ati, “Lumbanyini Yawe, wiyo uwandwila kuli Nabali pa musausya uno wancitile. Ala Yawe umwisikulu uwandesizye ukucita iciipe nupya aliwe kwene uwalenga kuti uyi wakwe Nabali umwisikulu umulye.” Alino Davidi atuma intumi izyakuya mulanzizya kweneko Abigelo, pakuti angamusaka.

⁴⁰ Aomvi yakwe iyaya ku Kalimeli nga iyanena Abigelo iyati, “Davidi watatutuma kunuli kuti tukusende nga ukaye umuci wakwe.”

⁴¹ Abigelo nawe pali pakukatuka, afukama afupime nga avwanga ati, “Nene muzya wakwe, nupya nene muiteyanye ukufula ingazo zya aomvi ya musambazi wane.”

⁴² Zuwazuwa Abigelo akwela pali punda, nga na akazyana aomvi yakwe yasano iyamusukilila pali pamwi ni nkombe zizi zyakwe Davidi nga aya umuci wakwe Davidi.

⁴³ Davidi watwite na Ainoamu kwene uwaku Yezileele, nga yoili kwene yali aci yakwe.

⁴⁴ Lelo Saulo ale wapoka Mikala umwana wakwe umwanaci, nupya umuci wakwe Davidi, nu kumutwalizya kuli Palitieli umwana wakwe Laisyi, wino uwafumile ku Galimu.