1 Samueli 22 - Amazwi Yakwe Leza 2013

Ukukomwa kwakwe yasimapepo

¹ Davidi afuma ku Gati nga apuukila kwi cele lyaku Adulamu. Lino aina yonsi pamwi na ang'anda yakwe yuvwa pali cii, iyatentemukila kunoli kuku kwene.

² Alino antu yonsi yao acuziwanga ku nkongole nu kukufyengwa kuze na yano yali ni cikonko, kuli kuno yakumukila iyaya. Davidi nawe waya intunguluzi yao. Antu aile kwene yali ukulingana manye imyanda ini.

³ Lino Davidi wafuma kuku pali pakuya ku Mizipa umu mpanga ya ina Moabu. Alino anena umwene wa ina Moabu ati, “Napapata leka yamayo na yatata yikale kuno kwene mpaka intale imanye vino Yawe akalonda ukuncitila.”

⁴ Acino Davidi pali pakuyasya ku mwene wa ina Moabu. Nayo yikala insita yonsi ino Davidi watenzi ukwi cele.

⁵ Alino Gadi kasema wakwe Yawe anena Davidi ati, “Utanga uwaikala ukwi cele foo. Awe cakana sana. Pitanga uye ukikale mu mpanga ya ina Yuda. Davidi pali pakufuma kweneko aya mu mutengo uwaku Heleti.”

Saulo wakoma simapepo Nobu

⁶ Uwanda umwi Saulo auvwa ukuti Davidi na antu yakwe yatiyaloleka. Lilyo ale Saulo wali ku Gibeya, ala atenzi apatumpuke mu cisao ca muti wa tamalisiki, alemile ni sumo umu makasa, nga na aomvi yakwe yonsi ale imilile umu mbali.

⁷ Saulo fwandi pali pakunena antu yakwe ati, “Uvwini kuno mwe antu yakwe Benjamini! Uzye icumi umwana wakwe Yese alamupeela impanga ni vyalo vya matingi? Uzye wene alamucita mwensi ukuya yamusika akalamba ya vita amazimbi nga na a myanda?

⁸ Uzye fwandi mwatimumana akapi kuti munsangukile? Pasi nanti wenga pali mwemwe uwanenyile ukuti umwana wane Yonatani yapangana nu mwana wakwe Yese. Nupya pasi nanti umwi pali mwemwe uwansakamile, nanti ukunena lino umwana wane watunkanga umuomvi wane kuti ansangukile wakwe vino cili pali ndakai.”

⁹ Alino Doegi umwina Edomu, wiyo wino wimilile pipi na aomvi yakwe Saulo, avwanga ati, “Nemo naweni kuno umwana wakwe Yese akwiza ku Nobu kuli Aimeleki umwana wakwe Aitubi.

¹⁰ Aimeleki nawe auzya Yawe vino Davidi alinzile ukucita. Alino lyene amulongelezya impao nu lupanga lwakwe Golyati umwina Filisti.”

¹¹ Lyene umwene atuma akuya ama simapepo Aimeleki umwana wakwe Aitubi nga na ang'anda yakwe isi yonsi, yao ali yasimapepo ku Nobu, nga yonsi yiiza ku mwene.

¹² Saulo avwanga ati, “Unguvwe, we mwana wakwe Aitubi.” Nawe aasuka ati, “Indi pansi, we musambazi wane.”

¹³ Saulo pali pakumunena ati, “Uzye pacani cino wewe pamwi nu mwana wakwe Yese mwatimumana akapi kuti munkome, pa kumupeela imikate nu lupanga nga nu kumuzizya kuli Leza? Silola vino wene watansangukila nupya watanteyamila ilelo kwene kuti ankome.”

¹⁴ Aimeleki nawe aasuka umwene wilya ati, “Uzye aweni umu yaomvi yako yonsi uwaya uwacumi ukuluta Davidi, sovyala, nupya musika mukulu wakwe yakalinda yako akwi sano nga na yasimucindikwa yonsi amwi sano lyako?

¹⁵ Uzye ilelo alino natandika ukumuzizya kuli Leza ivyakuti acite? Awe cisi vivyo! Cipelele ukutali kuti umwene ampeele umulandu nanti ukupeela ali wensi uwa kazi kakwe tata. Pano ne muomvi wako ntamanyile icintu nanti cimwi pali cii!”

¹⁶ Lelo umwene nawe avwanga ati, “Cumi kwene umafwa, we Aimeleki kumwi na akazi kakwe so yonsi pyu.”

¹⁷ Lyene umwene apeela ilamulo kuli yakalinda yaya amutumikilanga, ati, “Senukini nu kukoma yasimapepo yakwe Yawe, pamulandu wakuti nayo kwene yatiyawila ku mbali yakwe Davidi. Yene yamanyile vino akuutuka, lelo yatanenyile.” Lelo aomvi ya mwene yatakasi ku katusya nanti ikasa kuti yakome yasimapepo yakwe Yawe.

¹⁸ Lyene umwene wilya apeela ilamulo kuli Doegi ati, “Senuka nu kukoma yasimapepo.” Acino Doegi umwina Edomu asenuka nu kukoma yasimapepo. Nu wanda ulya kwene wene wakomile aonsi amakumi cinani na yasano, yao azwalanga cakuzwala ca efodi icapangilwa ni nsalu itelepelele.

¹⁹ Wene wakomile ku lupanga aikazi aku Nobu, umusumba wakwe yasimapepo, kumwi na onsi na anaci yakweo, ana kumwi nu tunya twakweo, ing'ombe, yapunda ni mfwele zyakweo.

²⁰ Lelo Abyata, umwana wakwe Aimeleki umwana wakwe Aitubi, aongoloka nga autuka aya auminkana na Davidi.

²¹ Anena Davidi ukuti Saulo wakoma yasimapepo yakwe Yawe.

²² Lyene Davidi anena Abyata ati, “Uwanda ulya, lino Doegi umwina Edomu wali kuku, namanyile nu kusininkizya ukuti wene ali nu kunena Saulo. Nene natindenga ukuti akazi kako yakomwe yonsi pyu.

²³ Ikala nani kuno, nupya utuvwa intete. Umuntu wino akulonda ku kukoma ala akulonda ukunkoma nani kwene. Lelo wemo umaikala sile umutende nani.”