1 Samueli 20 - Amazwi Yakwe Leza 2013

Yonatani wazwilizya Davidi

¹ Lyene Davidi afuma ku Nayoti ku Lama apuukila kuli Yonatani nga amuuzya ati, “Uzye cino nacita icani? Uzye ukuponga kwane kuli pii? Uzye umulandu cii uno natala so pakuti ampangile ukunkoma?”

² Yonatani nawe aasuka ati, “Awe, utasakamala nanti acimwi, utalafwa. Tata pasi nanti acimwi cino akacita ukwaula kuti ntale imanye. Pasi nanti acimwi icingalenga tata amfise umulandu uu, ukwaula ukunena. Awe nce, cene cakana sana!”

³ Lelo Davidi pali pakumunena nu mulapo ati, “So wamanya ningo sana ukuti wemo wantemwa, acili cino fwandi atangatemwa ukuti wewe we Yonatani umanye umulandu uo. Pasi pano ndi wamanya umwenzo wako ungakuwaya sana. Acili cino fwandi nkulapa kunuli umwi zina lyakwe Yawe uwa umi nupya lino wemo ucili nu umi, ukuti kwasyala panono sile kuti nemo imfwe.”

⁴ Alino Yonatani anena Davidi ati, “Namakucitila consi cino ukasi inkucitile.”

⁵ Icaleka Davidi avwanga ati, “Lola, mutondo ukutandika kwa Cimulo ca Mwezi Upya, nga nani ndinzile ukulya pamwi nu mwene. Lelo leka nje nkafisame umu vyalo ukufika lino ilanzi lyawa pa wanda uwalenga yatatu.

⁶ Ndi cakuti so waca walola ukuti insi penepo, uce umunene uti, ‘Davidi nu mwenzo wakwe onsi wandenzile insambu iya kuya ku Betelemu, ku musumba wa kumwao, pamulandu wakuti kuli ukupelelako aluko lwakwe impolelwa iya cila mwaka.’

⁷ Ndi cakuti waca walanda wati, ‘Cili sile ningo,’ nemo ale ndaya nu longo. Lelo ndi waca wasoka, lyene uce umanye ukuti wene watapanga ukuncitila iciipe.

⁸ Acili cino fwandi yame, unganguvwilako uluse, ne muomvi wako pakuzana ukuti twapangana nawe upangano pa manso yakwe Yawe. Ndi cakuti indi nu mulandu, lyene cazipa sile wewe kwene unkome! Uzye pacani cino ungantwalila kuli so?”

⁹ Yonatani nawe amunena ati, “Cipelele ukutali! Imanya ukuti tata akweti amapange aku kukoma, uzye ngano ntakunena?”

¹⁰ Davidi nawe pali pakuuzya Yonatani ati, “Uzye aweni yano yalinzile ukunena ndi cakuti so akwaasuka uyi uyi?”

¹¹ Yonatani nawe avwanga ati, “Twende twapita umu vyalo.” Acino yonsi yoili iyapita kweneko.

¹² Lyene Yonatani anena Davidi ati, “Ti Yawe Leza wa ina Izlaeli aye kambone witu! Mutondo pa nsita kwene wakwe ii, nanti pa wanda ulalondelapo, induzya tata iila lyakwe citatu. Ndi naca nazana ukuti akukwelenganyizizya ivisuma, ale lyene ndatuma akwiza kumanyisya.

¹³ Lelo ndi cakuti tata akukwatile amapange aipe, cingazipa ukuti Yawe ace ancitile icili cimwi kwene nu kulusya penepo, ndi cakuti ntalakumanyisya nu kuleka kuti wongoloke ulumi. Si angala Yawe aye nawe wakwe vino wene wali na tata.

¹⁴ Lino ncili nu umi cingazipa utwalilile ukufikilizya ulayo wako nu kuya nu luse kunondi ndi vino Yawe akalonda. Lelo ndi ningafwa,

¹⁵ uce uye nu luse ululi lumwi ku akazi kane amanda pe, nu mu nsita kwene ino Yawe waca wamala ukulovya anisi yakwe Davidi yonsi pano nsi.”

¹⁶ Caleka Yonatani acita upangano na Davidi, ala akuti, “Ndi cakuti wacawavuna upangano, lyene Yawe alakuvunuka.”

¹⁷ Nupya kwene Yonatani alenga Davidi ukulaya nu mulapo kuti amamutemwanga, pamulandu wakuti Yonatani watemilwe Davidi wakwe vino waitemilwe umwisikulu.

¹⁸ Lyene Yonatani anena Davidi ati, “Mutondo uli wanda wakutandika kwa Cimulo ca Mwezi Upya. Wemo utalazanwa penepo, pamulandu wakuti ncende yako patalikala umuntu.

¹⁹ Uwanda uwalenga yatatu, lino ilanzi lyawa, wemo uce uye kuno wafisime inkolelo lino intazi ii yatandike, nga uce ulolele lwa piwe ilikaamwa ukuti Ezeli.

²⁰ Indafiika inceto zitatu lwa kumbali yaliko, kwati manye nkasi ukufiika icintu cimwi.

²¹ Lyene ndatuma umulumendo imunene inti, ‘Pita ukalonde inceto.’ Ndi namunena nati, ‘Lola, inceto zili lwaku mbali ii iyakwako. Zilete kuno,’ lyene wemo ulinzile ukwiza, pamulandu wakuti nkulapa mwi zina lyakwe Yawe ukuti wemo utalaya mu uzanzo.

²² Lelo ndi nanena umulumendo nati, ‘Lola, inceto zili lwaku mbali yuze iyakwako, ukulutwe,’ ale lyene Yawe watavwanga ukuti ulinzile ukufuma penepo, pamulandu wakuti Yawe watakunena ukupita.

²³ Lyene pa ulayo uno twatitulayana, Yawe ali nu kulola ukuti twausunga amanda pe.”

²⁴ Icaleka Davidi afisama umu calo, nga lino ukuzevya kwa Cimulo ca Mwezi Upya kwiza, umwene aikala pa cakulya kuti alye.

²⁵ Ukulingana nu lutambi lwakwe Saulo aikala pipi nu lung'umba, alozya icinso kuli Yonatani, nga Abineli nawe aikala pa mbali yakwe Saulo. Lelo ncende apali nu kwikala Davidi patatenzi umwi.

²⁶ Uwanda ulya Saulo atavwanzile cimwi, pano welenginye ati, “Cino Davidi atazanyilwepo pamulandu wakuti limwi angapela wataikowezya ku cintu cimwi cino citazumiliziwa ni ntambi zitu.”

²⁷ Lelo pa wanda uwalondelela, uwanda wakwe ciili uwa mwezi ulya, nupya kwene icizanwa ukuti ncende apali nu kwikala Davidi patatenzi umwi. Lyene Saulo auzya Yonatani umwana wakwe ati, “Uzye pacani cino umwana wakwe Yese atizile ku cimulo, mutondo nanti ilelo kwene?”

²⁸ Yonatani aasuka ati, “Davidi wanguzizye nu mwenzo onsi kuti imupele insambu zya kuya ku Betelemu.

²⁹ Wene wavwanzile ati, ‘Leka mpite, pamulandu wakuti akazi kane yakuzevya icimulo ca mpolelwa mu musumba, nga umwinane watandalika kweneko. Lyene ndi cingakuzanzya, leka mpite nkalole aina yane.’ Uli mulandu wene atizile ku kulya pamwi nawe mwene.”

³⁰ Saulo aya ni cipyu pali Yonatani nga amunena ati, “Wewe mwana wa mwanaci umutalame nupya asi na utailo! Manyile ningo ukuti mwatimwandana ucuza nu mwana wakwe Yese kuti uizewanye sile wemwisikulu nu kuzewanya nyoko.

³¹ Uzye utamanyile ukuti lino umwana wakwe Yese acili nu umi pa mpanga ya pano pansi, wemo utalatala uye umwene wa mpanga ii? Acino pita ukamulete kunondi, pano wene alinzile ukufwa.”

³² Yonatani pali pakuuzya isi ati, “Uzye icani cino Davidi amafwila? Uzye icani cino wene watacita?”

³³ Lelo Saulo avwinta isumo lyakwe kuli Yonatani kuti amukome. Alino Yonatani amanya ukuti isi akulonda ukukoma Davidi.

³⁴ Yonatani pali pakukatuka pa cakulya ala umusoke wakwe cimwi. Pa wanda ulya wakwe ciili uwa mwezi uwalenga iili Yonatani atalile nanti acimwi, pamulandu wakuti wali nu ulanda cuze pa cintu icansonyi cino isi wacisile kuli Davidi.

³⁵ Umu katondo ka wanda uwalondelela, Yonatani aya ku vyalo ku kukomenkanya Davidi. Nu mulumendo umwance wamusukilile.

³⁶ Yonatani anena umulumendo wilya ati, “Simula ukasole inceto zino nkufiika.” Lino umulumendo wasimula, Yonatani afiika uluceto ilumuciluka.

³⁷ Lino umulumendo wafika apaponile uluceto lwakwe Yonatani, Yonatani amupunda ati, “Uluceto lwatilukupuzya.

³⁸ Cincila! Simula zuwa! Utazingota papo!” Umulumendo wilya nawe asola uluceto nga aswilila ku musambazi wakwe.

³⁹ Lelo umulumendo wilya atamanyile icacitikanga, suka sile Yonatani na Davidi amanyile.

⁴⁰ Lyene Davidi apeela ivyanzo vyakwe ku mulumendo nga avwanga ati, “Pitanga, uvisende ku musumba.”

⁴¹ Pacisila lino umulumendo wapita, Davidi nawe akatuka lwaku ufumondaka waku nsizi ya mutumba ulya uwa mawe nga afukama pansi amaila yatatu inkolelo yakwe Yonatani ala afupime. Alino yoili kwene iyatonsolana nu kulila aminsozi capamwi. Lelo Davidi walizile ukuluta umuze.

⁴² Lyene Yonatani anena Davidi ati, “Leza aye nawe, pano twandana ucuza nu mulapo umwi zina lyakwe Yawe, tula tukuti, ‘Yawe ali kambone pakasi kakwe wewe nani, na pakasi ka amu mupanda wako na amu mupanda wane amanda pe.’ ” Lyene Davidi afumapo, nga Yonatani nawe aswilila ku musumba.