1 Samueli 2 - Amazwi Yakwe Leza 2013

Ipepo lyakwe Hana

¹ Lyene Hana apepa ati, “Umwenzo wane ukuzanga muli Yawe, amaka yane yakafuma kuli Yawe. Ndakai inkuseka anisi yane, pano nkazangila mu ufyusi wako.

² “Kutaya nanti aumwi uwamuzilo wakwe Yawe. Kutaya nanti aumwi akoline nawe we Yawe, kutaya nanti wenga angacingilila wakwe Leza witu.

³ Si fwandi mungala musuule sile, mutaya ni cilumba. Mutaezya ukuvwanga amazwi akuitumika, pano Yawe a Leza uwamanya vyonsi. Wene akapima vino antu yakacita.

⁴ Amalapwa ya vita vikalawane yatiyakontoka yonsi pyu, lelo yaya yano yatali na maka ndakai yatiyakoma.

⁵ Yao aikutanga ali yano yakupula ivyakulya, lelo yao ali ni nzala ndakai yakwikuta. Umwanaci uwali ng'umba ndakai akweti ana cinimbali, nu mwanaci uwakweti ana aonsi avule, ndakai atakweti nanti wenga.

⁶ Yawe aliwe akaleta imfwa nupya aliwe akapeela umi. Wene akatwala antu kuzimo, nupya akweti amaka akuyazyukula.

⁷ Yawe akaleka akama yaya apina, nga apina nayo yaya akama. Wene akasausya nu kucindamika antu.

⁸ Aliwe akanyemula apina ayafumya pa lutukumbu nu kukatusya aulilwa ukufuma pa citumba kuti ayapeele icifulo yikale na ene, kuti ayalasike pa vilimba vyaucindami. Imifula ya nsi iyakwe Yawe, nga apali pano wene wateeka insi.

⁹ “Aliwe akacingilila antu yano yakamuyela lelo antu akacita ukakasi yene akayasunkilizya mu kanda. Pano umuntu atangacimvya ku maka yakwe wenga.

¹⁰ Anisi yakwe Yawe yalaloviwa lilyo lino alayafokela nu ukali wakwe, ukufuma kwiyulu ungati ukupangalansya. Yawe aliwe alapingula antu yonsi. Wene alapeela amaka ku mwene nu kulenga kuti wino wasolola aye kacimvya.”

¹¹ Lyene Elikana aswilila ku Lama, lelo umwana wilya asyala akutumikila Yawe ala akwangalilwa na simapepo Eli.

Ana aonsi yakwe Eli

¹² Ana aonsi yakwe Eli yali antu yaukakasi. Yene yatacindike Yawe.

¹³ Fwandi ulutambi lwakwe yasimapepo atumikilanga antu lwali ndi vii: lyonsi lino umuntu ali wensi akupeela impolelwa, lino inyama icili ikwelekwa, umuomvi wakwe simapepo wiyo aiza ala alemile foloko umwi kasa lyakwe.

¹⁴ Alinzile watota muli pani mukasi nanti muli ketulo nanti mu mupika nanti mu mpoto, nga simapepo aitolele icili consi cino foloko watota. Vi avino yacitile aina Izlaeli yano yizile ku Syilo.

¹⁵ Nupya lino amafuta yatacili yociwe, umuomvi wakwe simapepo alinzile ukwiza nu kunena umuntu wino akupeela impolelwa ati, “Mpeko inyama iyakuti simapepo aoce, pano asikwiza azumile inyama yeleke ukufuma kunuli, suka sile ino icili iisi.”

¹⁶ Ndi umuntu wiyo wavwanga wati, “Si leka yatale yoce amafuta, nga pacisila utoole icili consi cino ukasi.” Umuomvi nawe avwanga ati, “Awe, mpeko likwene. Ndu tacisile vivyo, lyene namatola ku maka.”

¹⁷ Uyi uu uwa alumendo wali ukulu wakwe cimwi pa manso yakwe Yawe, pano yatacindike uwila uwapeelwa kuli Yawe.

Samueli ku Syilo

¹⁸ Lelo Samueli watwalilile ukutumikila Yawe, ala acili umulumendo sile nupya wazwalanga cakuzwala ca efodi icapangilwa ku nsalu itelepelele.

¹⁹ Cila mwaka nyina wamusumilanga aka mwingila nu kumutwalila lino wasukilila iya ku kupeela impolelwa iya cila mwaka.

²⁰ Eli pali pakupolelela Elikana nu muci wakwe, ala akuti, “Sa angala Yawe akamupeele ana nayauze muli mama wi kuti akapyanikizye pali wii wino mwapaatwile nu kupeela kuli Yawe.” Lyene pacisila iyaswilila kumwao.

²¹ Yawe nawe pali pakuvwila Hana uluse. Hana aca akwatilapo ana nayauze, aonsi yatatu na anaci yaili. Lelo Samueli wene akula umu kutumikila Yawe.

Kulanda ivya pali Eli na ana yakwe aonsi

²² Lyene Eli, mu ukote wakwe, atwalilila ukuuvwa vyonsi vino ana yakwe aonsi yacitanga ku ina Izlaeli na vino yacitanga uzelele na anaci yano yatumikilanga pa mpongolo yi Taalu lya Ukongano.

²³ Acino ayanena ati, “Uzye pacani cino mukucita ivintu wakwe vii? Nkalukuvwa antu yakulanda pa ukakasi winu uno mukucita.

²⁴ Sangala mute vii, yanane! Ala impwelo ii ino nkuvwa ukuti ikusalangana mu antu yakwe Yawe isi impwelo isuma awe!

²⁵ Ndi umuntu umwi wifya ku muntu muze, Leza angamuvwangila. Lelo ndu muntu wifya kuli Yawe, uzye aweni angamupapatila?” Lelo ana yakwe yatatezizye ukukalipa kwakwe isi wao, pano cali ukulonda kwakwe Yawe kuti ayaponyezye imfwa yafwe.

²⁶ Umulumendo Samueli ala akukulila kweneko umu ciimo alino nu kutemwikwa kuli Yawe nu ku antu.

Usemo wakukalipila amu ng'anda yakwe Eli.

²⁷ Lyene umuntu wakwe Leza aiza kuli Eli nu kumunena ati, “Yawe watavwanga ndi vino wene waisokolwile umu ng'anda yakwe so pa nsita ino so na ang'anda yakwe yatenzi ku Eguputo wa azya mwakwe Falao.

²⁸ Nupya nayasolwile pa mitundu yakwe Izlaeli kuti yangaya yasimapepo yane, na kuti yatumbela ukuya pa kavuwa kane, ku koca ubani, nu kuzwala cakuzwala ca efodi kuti yapendola pa manso yane. Nupya anene kwene napiile ang'anda yakwe so kuti yatoola vyonsi vino aina Izlaeli yakapeela kunondi.

²⁹ Nga nupya pacani cino ungatumbwila amanso nu kuzazila amawila yano nanenyile antu ukundetela? Uzye pacani cino ungacindikila ana yako aonsi ukuluta pali nene pa kuyata yiine pa kuilyokezya ukulya amawila asuma wakwe cimwi yano antu yane aina Izlaeli yapeela?

³⁰ Nene kwene ne Yawe, Leza wa ina Izlaeli nalavile ku mpiti ukuti ang'anda yako na aluko lwako yalizile kuntumikila wakwe yasimapepo amanda pe. Lelo ndakai inkuti citangaya vivyo! Indi nu kucindamika yao akancindika. Nu kusuula yao akansuula.

³¹ Insita ikwiza lino indi nu kukoma alumendo yonsi amu ng'anda yako na aluko lwako pakuti kutalaya umonsi umwi uwamu ng'anda yako alafika ku kukota.

³² Nupya mulacuziwa sana cakuti mulalolekesya nu lwiswa pa upolelelo onsi uno ndapolelela aina Izlaeli yauzo. Nupya kutalatala kuye nanti wenga uwamu ng'anda inu alafika ku kukota.

³³ Nga lelo kwene indasya wenga uwamu mupanda winu, nga nawe alaantumikila wakwe simapepo. Lelo wene alakuletela ulanda pakukulenga ukulosya nu kukuletela ukucululuka ku mwenzo wako, nga amu mupanda wako yonsi yalafwa ala yacili ance sile.

³⁴ Ni cilaponela ana yako yaili, Hofini na Pineasi, cilaya icilangililo kunuli cakuti yoili kwene yalafwa imfwa pa wanda onga kwene.

³⁵ Ndailondela nenga simapepo uwampomvu wino alaomba vyonsi vino nkulonda. Indamupeela ana, yano yalaatumikila lyonsi pa manso yakwe kateeka wino nasolola.

³⁶ Wiyo wensi alasyala uwamu mupanda wako aliza nu kumufukamila kuti amulenge ulupiya lwakwe siluva ni cakulya nga nu kumupapata ati, ‘Napapata undasike umulimo wa usimapepo pakuti ningakwata cimwi cakuti ningalya.’ ”