1 Samueli 17 - Amazwi Yakwe Leza 2013

Davidi wakoma Golyati

¹ Alino lyene aina Filisti nayo iyakonganika ivita vyao ivya nkondo. Iyakongana ku Soko uwamu Yuda. Iyimika amataalu yao ku Efesi Damimu, pakasi kakwe Soko na Azeka.

² Saulo na ina Izlaeli nayo iyakongana nu kukuula insakwe mu Cifoloma ca Elaa nga iyatantama umulongo umu kuiteyanya ku kulwisya aina Filisti.

³ Aina Filisti yikalila papeela ya kamwamba konga nga na ina Izlaeli nayo apapela ya kamwamba kauze. Cifoloma icisyala apakasi kao.

⁴ Umu nsakwe zya ina Filisti imwiza mufuma icipombolo ca muntu conga, ukufuma ku Gati. Izina lyakwe a Golyati, wiyo uwali amamita yatatu mu utali.

⁵ Wene wakweti ni ngowani ya cela ino wazwalanga ku mutwe. Na pa cifuwa napo wazwalanga cisyangu ca cela, ino inganyoma ukufika nu ku makilogalamu amakumi yasano.

⁶ Wene wazwalanga ni vyakuzwala vyavyela ivyakucingilila amaulu na makokola. Alino wasendanga ni sumo lya cela pa ciye.

⁷ Umusako wi sumo lyakwe, wali wa mulongoti wakwe kapikula. Alino icilimi ci sumo kwene cafinyile amakilogalamu amakumi cinimbali. Kasenda wa nkwela yakwe ali wino wakolelanga.

⁸ Lyene Golyati wilya aiza aimilila nu kulaizya ku ina Izlaeli ati, “Uzye pacani cino mwizila kuno ku kutulwisya, mwe azya yakwe Saulo mwe? Nemo nene ndi lamba lya ina Filisti. Aleni sololini umuntu wenga uwakuti twize tulwe nawe.

⁹ Ndi cakuti awino wancimvya nu kunkoma, ale swemo tumaya azya inu. Lelo ndi cakuti nene namucimvya nu kumukoma, ale mwemwe mumaya azya itu, pakuti mwatuombela.”

¹⁰ Lyene umwina Filisti avwanga ati, “Ilelo nemo ivita vya ina Izlaeli natimvisuula wakwe cimwi! Letini umuntu wenga uwakuti tulwe nawe.”

¹¹ Saulo na ina Izlaeli apakuvwa amazwi ya mwina Filisti intete iziyalema iyazakaza sile.

Davidi wingila umu nsakwe yakwe Saulo

¹² Davidi wali umwana wa mwina Efulata wino yamanga iyati a Yese, ukufuma mu musumba wa Betelemu umu mpanga yakwe Yuda. Yese wakweti ana aonsi cinani, nga pa nsita ya wene wakwe Saulo umuntu wiyo ale wakota akukongoza sile.

¹³ Ana yakwe Yese aonsi yatatu akalamba alondile Saulo ku nkondo, a Eliabu iyeli. Wakwe ciili a Abinadabu, nga wakwe citatu a Syama.

¹⁴ Davidi wali ali mwance pali yonsi. Yasilenzi yatatu yalondile Saulo,

¹⁵ lelo Davidi wene wayanga sile ku nsakwe yakwe Saulo cila wanda nu kuwela ku kucema imfwele zyakwe isi ku Betelemu.

¹⁶ Pa manda amakumi yani umwina Filisti wiyo wizanga akutankamala cila katondo na manguzi itolo sile.

¹⁷ Lyene Yese anena Davidi umwana wakwe ati, “Twala imbezu zi izisalule umwi tepe lizule ku anyonko, pali pamwi ni mikate ii ikumi lyonga. Pitisya uye ku nsakwe yao.

¹⁸ Alino senda nu lwambu luu ulwi ziya, umu ntungo ikumi utwalile musika mukalamba uwa vita. Yanga kalole anyonko ndi yali umutende uce undetele ni cisininkizyo ukufuma kunoyali.

¹⁹ Umayazana yali na Saulo nga na ina Izlaeli yonsi umu Cifoloma ca Elaa, ala yakulwisya aina Filisti.”

²⁰ Katondotondo lino ukuca sile Davidi asya imfwele kuli kacema umwi uwakuti azilola. Atenuka apita nu kupita ndi muno Yese wamutungulwile, afika pa nsakwe pa nsita ino ivita vikuya mu kutantama mu ncende zyao izya nkondo ale yakupunda na welelele wooo!

²¹ Aina lzlaeli na ina Filisti ale yakutantama, yatiyalozyanya amanso.

²² Davidi aiza asya iviya vyakwe pali kasunga wa viya, nga asimula ku milongo ku kulamuka aina.

²³ Lino akulanda nayo, Golyati icipombolo ca ina Filisti, icina Gati, iciza cifuma mu ina Filisti. Icitandika nu kulanda amazwi ali yamwi kwene yano caomvizye pa kutandika. Lilyo ale na Davidi akuuvwako.

²⁴ Lino aina Izlaeli yacilola sile, yonsi kwene iyacoopa ku ntete zyao izikulu.

²⁵ Aina Izlaeli yavwanga iyati, “Uzye mukulola vino cimuntu cii cikaiza cila wanda? Cene cikaiza ku kupontela aina Izlaeli. Wiyo wensi alacikoma umwene alamupeela ivyuma ivingi. Nupya alamutwalizya umwana wakwe umwanaci nga nu lupwa lwakwe atalalonda imisonko kunoluli umu mpanga yonsi iya ina Izlaeli.”

²⁶ Davidi auzya aonsi aimi pipi na aliwe ati, “Uzye icani cino yali nu kucitila umuntu alakoma umwina Filisti wi, pa kufumya akalanda nu kuzewana kwa ina Izlaeli? Umwina Filisti wi, wino atasilamulwa, icani cino angacuzizya ivita vyakwe Leza wa umi nu kuvituka?”

²⁷ Antu nayo iyamwasuka wakwe vino yaliyalanda inkolelo iyati, “Vii, avili vino yalamucitila umuntu wino alamukoma.”

²⁸ Eliabu silenzi wakwe lino uvwa kuno Davidi akulanda na antu, asoka sana nga atandika nu kukalipila Davidi ati, “Uzye icani cino wizile cita kuno? Uzye aweni wino usilile imfwele zizi umu lwanga kuti azicema, nanti angala zitavula? Namanya amatukutuku yako. Ala cumi kwene we mwance we utaya ningo. Wemo wizile sile ku kutamba ulwi!”

²⁹ Davidi nawe amwaasuka ati, “Uzye icani cino nacita? Uzye ntange mvwange?”

³⁰ Lyene Davidi asenukila ku muntu muze atandika ukulanda nawe, ale akumuzya ivili vimwi kwene, na antu nayo ale yakumwasuka wakwe vino yaswike pankolelo.

³¹ Antu yamwi yuvwa vino Davidi wavwanzile, nga nayo iyalandila Saulo, nga Saulo atuma akuya mwama.

³² Davidi anena Saulo ati, “Mwene wakwisaci, utaleka umuntu nanti wenga aoope umwina Filisti wii. Namaya nkamulwisye.”

³³ Lelo Saulo amunena ati, “Asi wewe ungaya ukalwisye umwina Filisti wiya, awe. Wemo wewe mulumendo sile, nga wene waya umusilika ukufuma sile ku kuvyalwa kwakwe.”

³⁴ Lelo Davidi anena Saulo ati, “Mwene wakwisaci, nemo nkasunga imfwele zyakwe tata. Nga cisama nanti icinyama icakolana ni ciuli ndi ciza calema imfwele yonga pa ufyo,

³⁵ nemo nkacilondelela, incizanza nu kupokolola imfwele ku mulomo wakweco. Nga cisama nanti icinyama icakolana ni ciuli casenuka nu kunkatukila, nemo nkacivungatila sile pa nsingo incuma mpaka sile icifwa.

³⁶ Nemo nakoma yacisama ni vinyama ivyakolana ni viuli, nga ndacita icili cimwi kwene ku mwina Filisti wii atamanya Leza, nupya wino wasausya ivita vyakwe Leza.

³⁷ Yawe uwampokololanga ku vizanza vyakwe cisama na vyakwe cuuli, ali wino alantuulanya nu kumwina Filisti kwene wiya.” Saulo anena Davidi ati, “Cisuma, pitanga, nga Yawe aye nawe.”

³⁸ Saulo apeela Davidi ivyakuzwala vyakwe ivya nkondo kuti azwale, amuzwika ingowani ya mukuwa ku mutwe ni cakucingilila icisao.

³⁹ Davidi akoweka nu lupanga lwakwe Saulo pa cizwalo cici nga aezya ukupita. Lelo wene aposiwa pamulandu wakuti ataviyelezya ukuvizwala. Anena Saulo ati, “Nemo ntangendwisye ni vintu vii vyonsi, pamulandu wakuti ntaviyelezya.” Acino Davidi avizuula.

⁴⁰ Atoola intuwa yakwe iya kucemela nga asola na mawe yasano atelepe ukufuma mu luzi nga ayika mu nyambi yakwe. Lino wateyanya legeni wakwe, apita ku kukomenkanya Golyati.

Davidi wacimvya Golyati

⁴¹ Umwina Filisti nawe aiza akupalamila kuli Davidi nu wamusendelanga cisyangu nawe ala akolezile. Alino atwalilila ukupalama kuli Davidi.

⁴² Umwina Filisti aceceta Davidi, nga amusuula pamulandu wakuti Davidi wali umulumendo uwalolekanga sile ningo.

⁴³ Alino auzya Davidi ati, “Uzye intuwa iyo iyacani? Uzye ukwelenganya ukuti nene simbwa uwakwizila ni ntuwa?” Nga umwina Filisti wilya pali pakwama tuleza twakwe nu kutipwila Davidi.

⁴⁴ Umwina Filisti anena Davidi ati, “Iza kuno, nga nani namapeela umunyefu wako ku vyunyi ivikapapuka ni nyama zya mpanga kuti zilye!”

⁴⁵ Davidi nawe anena umwina Filisti ati, “Wemo wanjizila nu lupanga ni sumo, lelo nemo nakwizila sile na maka yakwe Yawe Wamaka yonsi, Leza wa vita vya ina Izlaeli, wino wemo ukasausya.

⁴⁶ Uwanda kwene uu Yawe amakundemela. Namakucimvya nu kuputula umutwe wako. Nupya namapeela imili ya asilika ya ina Filisti ku vyunyi ni vinyama kuti vilye. Lyene amu nsi yonsi yalamanya ukuti umu mpanga ya ina Izlaeli mwaya Leza.

⁴⁷ Nu muntu wensi pano alamanya ukuti Yawe asilonda amalupanga nanti amasumo pa kutuula antu yakwe. Wene akacimvya umu ulwi, nga alapeela mwensi kwene umu makasa itu.”

⁴⁸ Golyati atandika ukuya kuli Davidi, nga Davidi nawe asimula zuwazuwa ku mulongo wa vita vya ina Filisti ku kumulwisya.

⁴⁹ Alino apisya ikasa lyakwe mu nyambi yakwe, afumya iwe nga afiika Golyati. Iwe ilyuma pa usyu wakwe Golyati ilimufwafwanta icipanga. Golyati afukama pansi afupime.

⁵⁰ Avili vino Davidi wacimvizye nu kukoma umwina Filisti wilya ukwi legeni ni iwe.

⁵¹ Davidi asimwilila kunoli, amutangalila. Alino asomola ulupanga lwakwe Golyati umu cituwo caluko, nga aputula umutwe wakwe pacisila ca kumukoma. Lino aina Filisti yalola ukuti icipombolo cao yakwecoma, yene iyasenuka iyutuka.

⁵² Lyene Aina Izlaeli na ina Yuda aonsi iyakatuka iyapunda nga iyacocovya aina Filisti nzila yonsi ukufika nu ku Gati mpaka nu ku mpongolo yaku Ekiloni. Ivyala vyao vyasansantike mu museo wa Syaalaimu monsi mpaka ku Gati nu ku Ekiloni. Ivyala vyao vyasansantike ukutandikila ku museo uwafuma ku Syalaimu mpaka uku Gati nu ku Ekiloni.

⁵³ Lino aina Izlaeli yaweluluka ku kusimuzya aina Filisti, iyasampa ivyali umu nkambi zyao.

⁵⁴ Davidi atoola umutwe wa mwina Filisti wilya nga ausenda ku Yelusalemu, nga aika ivyanzo vya mwina Filisti wiya umwi taalu lyakwe umwisikulu.

⁵⁵ Lino Saulo walola kuno Davidi akuya ku kukomenkanya umwina Filisti wiya, anena Abineli, musika mukalamba uwa vita vyakwe, ati, “We Abineli, uzye umulumendo wilya amwana weni?” Abineli nawe aasuka ati, “Mwene wakwisaci, vino uli pano umumi, nkulapa ukuti ntamanyile.”

⁵⁶ Lyene Saulo amunena ati, “Pita kalondelezye, umanye uwavyala umwana wii umonsi.”

⁵⁷ Acino lino Davidi wawelulwike ku nkambi pacisila cakukoma umwina Filisti, Abineli amusenda nu kumutwala kuli Saulo, ale Davidi alemile nu mutwe wa mwina Filisti wilya.

⁵⁸ Saulo auzya Davidi ati, “Mulumendo, uzye so aweni?” Davidi nawe aasuka ati, “Nene mwana wa muomvi wako Yese uwaku Betelemu.”