1 Samueli 15 - Amazwi Yakwe Leza 2013

Saulo walwa inkondo na ina Amaleke

¹ 1 Samueli anena Saulo ati, “Nene indi muntu wino Yawe watatuma kuti nize nkupake amafuta nu kukulasika uwene wa ina Izlaeli. Acili cino fwandi utezye amazwi yakwe Yawe.

² Yawe Wamaka yonsi walanda wati, ‘Ndavunuka aina Amaleke pali vino yacisile ku ina Izlaeli lino yali pa lwendo ukufuma ku Eguputo.

³ Acili cino fwandi wemo pita sile ukalwisye aina Amaleke nu kulovya ivintu vyao vyonsi. Cisi cakwezya kuti usyepo nanti umwi. Ukome aonsi na anaci kwene, nga na ana kumwi nu tunya kwene tuno yakulela, ni ng'ombe nga ni mfwele, ingamila na yapunda.’”

⁴ Saulo aama antu yakwe nu kuyakonganika ku Telaimu. Asilika ya pa ngazo yonsi pamwi yali 200,000 nga na ina Yuda aonsi 10,000.

⁵ Alino aliwe na antu yakwe iyaya ku musumba wa ina Amaleke nu kuyateyamila umu mukonko.

⁶ Alino Saulo atuma amazwi ku ina Kenite, ati, “Palukanini na ina Amaleke pakuti ntiza mukome pamwi na alio. Mwemo mwali nu luse ku ina Izlaeli yonsi lino yafumile mu mpanga ya Eguputo.” Acino aina Kenite pali pakufyufyuntuka ku ina Amaleke.

⁷ Lyene Saulo azanza aina Amaleke nzila yonsi ukutandikila sile ku Havila mpaka ukufika nu ku Syuli, lwaku ufumondaka wakwe Eguputo.

⁸ Alema Agagi umwene wa ina Amaleke, nga akomola na antu yakwe yonsi pyu.

⁹ Lelo Saulo na antu yakwe yatakomile Agagi ni viteekwa vyakwe ivisuma ukuluta umu mfwele ni ng'ombe, utwana twa ng'ombe nu twa mfwele. Vii vyonsi ivyalolekanga ningo yatakasi ukuvyonona. Lelo iviteekwa vyonsi ivitali ningo ivitali nu muzano umwi vyene yavyononyile.

Saulo yamufumya pa cilimba ca wene

¹⁰ Lyene Yawe anena Samueli ati,

¹¹ “Indi nu ulanda pa kupeela Saulo uwene, pamulandu wakuti wene watamfutatila nupya watakana ukuyela amalamulo yane.” Samueli ali pakusoka, nga atandika nu kupapata kuli Yawe usiku ulya onsi.

¹² Katondotondo pa macaca Samueli akatuka aya ku kukomenkanya Saulo, lelo iyamunena iyati, “Saulo wataya ku Kalimeli. Kuku akuno wataimika icipilala kuti acindikilemo izina lyakwe nga watasenuka nu kuya ku Giligali.”

¹³ Lelo Samueli avwanga ati, “Si angala Yawe akupolelele! Nemo natimfikilizya ukulingana na malamulo yakwe Yawe.”

¹⁴ Lelo Samueli amuuzya ati, “Uzye lyene pacani cino nkuvwa ukulila kwa mfwele nu kwa ng'ombe?”

¹⁵ Saulo aasuka ati, “Asilika yazisenzile ukufuma ku ina Amaleke. Yene yatakomile iviteekwa ivisuma ukuluta umu mfwele ni ng'ombe kuti yavipeele impolelwa kuli Yawe Leza wako. Lelo ivyasyala twavyonona pyu.”

¹⁶ Samueli nawe anena Saulo ati, “Ta nu kuta! Si leka nkunene vino Yawe wali wanena ku usiku wi lelo.” Saulo nawe ati, “Ale nena.”

¹⁷ Samueli nawe amunena ati, “Nanti angala mpiti wailolanga wemwisikulu wa muntu umucepesye pa antu, ala wewe uli ntunguluzi ya mitundu yonsi iya ina Izlaeli. Yawe, uwakulasike utesi pa ina Izlaeli.

¹⁸ Aliwe kwene uwakutumile nu kukukonkomezya ati, ‘Pitanga ukonone antu yalya aipe, aina Amaleke. Ukayalwisye nu kuyakoma yonsi pyu uyalovye.’

¹⁹ Uzye lyene pacani cino wemo wakana ukuyela Yawe? Uzye pacani cino wapona pa visampwe nu kucita icintu iciipe pa manso yakwe Yawe?”

²⁰ Saulo nawe aasuka ati, “Lelo Yawe natimuyela. Naile kuno Yawe wantumile, inkomola aina Amaleke nu kulema Agagi umwene wao.

²¹ Asilika yene iyasenda imfwele ni ng'ombe ukufuma pa visampwe, iyasenda ivisuma ukuluta vino twali nu konona, pakuti yakapele impolelwa kuli Yawe Leza wako ku Giligali.”

²² Lelo Samueli aasuka ati, “Uzye Yawe akazangila mu mawila yakoca ni mpolelwa ukuluta ukuyela amazwi yakwe? Ala icuvwilo caluta ukupeela impolelwa, nu kutezya nako kwaluta amafuta yakwe yasuuku.

²³ Pano ukutalama kukoline ni iifyo lya ulozi, nga ukuitutumika nako kukoline nu kupepa utuluwi. Pamulandu wakuti wemo watukana ukuyela amazwi yakwe Yawe, nawe kwene watakukana ukuya umwene.”

²⁴ Lyene Saulo anena Samueli ati, “Natinifya. Nakanyile ukulondela ilamulo lyakwe Yawe na vino wantungulwile. Noofile asilika nga incita vino yalondanga.

²⁵ Lelo unjeleleko uluse api iifyo lyane, nupya napapata leka tuswilile sile swensi ku Giligali pakuti inje nkafukame nu kupepa kuli Yawe.”

²⁶ Lelo Samueli avwanga ati, “Awe, nemo nsikupita nawe. Wemo watukana ukuyela amazwi yakwe Yawe, nga acino nawe kwene watakukana ukuya umwene pa ina Izlaeli!”

²⁷ Lino Samueli wasenuka kuti atandike ukupita, Saulo alema isempele lya mwingila wakwe, nga nao iulepuka.

²⁸ Samueli avwanga ati, “Yawe watapoka uwene wa ina Izlaeli kuli wewe ilelo kwene nu kuupela ku muzo umuntu wampomvu ukuluta wewe.

²⁹ Pasipano Leza uwacindamika aina Izlaeli asitumpoka nupya asi uwa mansenunsenu. Pano wene asi umuntu, awe.”

³⁰ Saulo nawe avwanga ati, “Natinifya. Lelo napapata ncindike sile nanti iila lyonga pa manso ya ntunguluzi zya antu yane na pa manso ya ina Izlaeli. Katuswilile sile swensi pakuti inje nkafukame nu kupepa Yawe Leza wako.”

³¹ Acino Samueli aswilila na Saulo, nga Saulo apepa Yawe.

³² Lyene Samueli amunena ati, “Aleni ndetelini Agagi umwene wa ina Amaleke.” Acino Agagi aiza kunoli ala akuzakaza sile ku ntete nga avwanga ati, “Cumi kwene ukusakamikwa pa ukali wa mfwa kwasila.”

³³ Samueli nawe pali pakuvwanga ati, “Vivi kwene vino ulupanga lwako lwasya yanyina ana ukwaula ana, avino nyoko nawe amaya umwanaci uwaula umwana pa anaci yonsi.” Alino Samueli akoma Agagi pa manso yakwe Yawe ku Giligali.

³⁴ Lyene Samueli afuma ku Lama, lelo Saulo atumbela ukwakwe ku musumba waku Gibeya.

³⁵ Samueli yatatazile nupya iyalolana na Saulo, mpaka sile ukufika pa wanda wa kufwa kwakwe, nanti angala Samueli wamuvwilile ulanda, pamulandu wakuti Yawe walangulwike cino wamucisile ukuya umwene wa ina Izlaeli.