1 Samueli 1 - Amazwi Yakwe Leza 2013

Elikana na ang'anda yakwe ku Syilo

¹ Kwali umuntu umwi uwamu mutundu wakwe Efulemu, izina lyakwe wali a Elikana. Wikalanga mu musumba uwamwangwa Lamataimu. Wene wali umwina Zufi uwafumile ku mpanga yakwe Efulemu, impanga iya myamba. Wene wali umwana wakwe Yeloamu, umwana wakwe Eliu, umwana wakwe Tou, umwana wakwe Zufi, umwina Efulemu.

² Elikana wapalike aci yaili, Hana na Penina. Penina wakweti ana. Lelo Hana wene ataviile.

³ Cila mwaka Elikana wafumanga ku Lamataimu aya ku Syilo ku kupepa Yawe Wamaka yonsi nu kumocela impolelwa. Kuku ukwali yasimapepo yaili yakwe Yawe. Yene yali ana yakwe Eli nupya amazina yao a Hofini na Pineasi.

⁴ Ilili lyonsi lino Elikana wapeelanga impolelwa yakwe, wene wapeelanga icipande conga ica nyama kuli Penina nga ni cuze apeela kuli cila wenga pa ana yakwe.

⁵ Nanti angala watemilwe Hana wakwe cimwi, wene wamupeelanga icipande conga sile ica nyama, pamulandu wakuti Yawe atamupiile ikwata.

⁶ Penina, umuci muze wamusinkolanga nu kumuzewanya, pamulandu wakuti Yawe atamupiile ikwata.

⁷ Vili vino cayanga cila mwaka. Lyonsi lino yayanga ku kupepa Yawe, Penina wasinkolanga Hana cuze cakuti alila nga afwitoka ivyakulya.

⁸ Alino Elikana iya wakwe amuuzya ati, “Hana, uzye pacani cino ukulila? Uzye pacani cino wafwita ivyakulya? Uzye pacani cino wakungumalila vivyo? Uzye vino naya kunuli cisikusansamusya ukuluta na pa kukwata ana aonsi ikumi?”

Hana na Eli

⁹ Wanda umwi, pacisila ca kumala ukulya nu kumwa ku Syilo, Hana aiza akatuka. Lyene simapepo Eli ala atenzi pa cilimba mupipi na pa maingwe ya mulyango wi taalu lyakwe Yawe, nga apepa kunoli.

¹⁰ Papo ale Hana akuuvwa ulanda wakwe cimwi, atandika ukupepa nu kulila alila.

¹¹ Hana alapa nu mulapo, ala akuti, “Iye we Yawe Wamaka yonsi, ndi cakuti walolekesya pa ulanda wane ne muzya wako, wanguvwila inkumbu, utanjilile ne muomvi wako lelo wampeela sile umwana umonsi, nani ala ndamupeela sile kunuli we Yawe pa manda yonsi yano alikala pano nsi, nu ku mutwe wakwe kutalatala kupelwe inyele.”

¹² Alino Hana atwalilila ukupepa kuli Yawe. Eli nawe ala akumulolekesya ku kanwa.

¹³ Lyene Hana nawe ala akupepa cimyamya, nga akanwa kene ala kakumamuka lelo izwi lyakwe ilyaula ukuvwika. Eli pa kwelenganya ukuti Hana watakoleka

¹⁴ amunena ati, “Uzye uwengwa uno umwile umakukololoka kufika lilaci? Tala pitanga uye ukakololoke.”

¹⁵ Hana nawe amwaasuka ati, “Awe, musambazi! Nemo nene mwanaci umwi ali nu ulanda wakwe cimwi. Ntamwile uwengwa nanti umwi nanti sile icili consi icikakola. Nemo nali nkulondolwela sile Yawe ivintu ivili mu mwenzo wane.

¹⁶ Utezya untunganye ne muomvi wako ukuti nene mwanaci iciwelewele. Insita yonsi ii nalinkupepa pa ulanda wane na pa cikonko cino cafundika ku mwenzo wane.”

¹⁷ Eli pali pakumwasuka ati, “Pita ulumi, si angala Leza wa ina Izlaeli akulambule cino umulenzile.”

¹⁸ Hana nawe aasuka ati, “Su ngala walu kunguvwila uluse.” Alino akatuka apita aya alya ivyakulya, nga lyene ata nu kuloleka uwa ulanda.

Samueli wavyalwa nu kupelwa kuli Yawe

¹⁹ Katondotondo pa wanda uwalondelilepo iyakatuka nga iyapepa kuli Yawe, nga lyene iyaswilila kumwao ku Lama. Elikana pali pakumanya umuci wakwe, nga Yawe aasuka ipepo lyakwe Hana.

²⁰ Acino mukupita kwa nsita Hana asuka asenda indilwa nga aca avyala umwana umonsi. Alino atemela umwana wilya izina ati a Samueli, ala akuti, “Pamulandu wakuti namulenzile sile kuli Yawe.”

²¹ Lino Elikana na ang'anda yakwe yatumbela ku kupeela impolelwa iya cila mwaka kuli Yawe nga nu ku kufikilizya umulapo wakwe,

²² Hana wene ataile kweneko. Wene wanenyile iya ati, “Alala umwana walumuka, alino ndiza nawe kuko pakuti inkamupe kuli Yawe. Lyene alikalilila kuku kwene.”

²³ Elikana iya wakwe aasuka ati, “Cili sile ningo, cita cino ukwelenganya ukuti icingakuzipila. Lolelanga mpaka akalumuke. Si Yawe afikilizye vino walaya.” Acino umwanaci wilya aikala ukwakwe nu kulela umwana wakwe wilya suka aca alumuka.

²⁴ Pacisila lino umwana wilya walumwike, Hana amusenda, nga asenda na cipambasi uwa myaka itatu, nu usu wa ngano ukulingana na makilogalamu ikumi lyonga na waini, nga amuleta ku ng'anda yakwe Yawe ku Syilo.

²⁵ Pacisila cakufyula cipambasi wilya, iyaleta umwana kuli Eli.

²⁶ Alino Hana anena Eli ati, “Musambazi, uzye unganjiusya? Anene umwanaci wilya uwimilile muno apipi nawe ala akupepa kuli Yawe.

²⁷ Ali mwana wi wino nailengile, nga Yawe watampela cino nalenzile.

²⁸ Acili cino fwandi nani namupeela kuli Yawe. Pa manda yonsi yano alikala pano nsi, wene amapaatwilwa Yawe.” Avili vino nayo iyapepa Yawe kuku.