1 Kolinto 9 - Amazwi Yakwe Leza 2013

Nsambu nga ni milimo ya Mutumwa

¹ Uzye nemo nsi muntu muntungwa? Uzye nemo nsi mutumwa? Uzye nemo ntalola Yesu Mwene witu? Uzye mwemo ntamutungulwile ku kukwata utailo mu Mwene Yesu?

² Nanti angala yamwi yatanzumila kuya mutumwa, cumi kwene mwemo mwanzumila! Pano umi winu muli Klistu ali kambone wakuti nene mutumwa.

³ Lino antu yakanenola, nemo nkayanena vii

⁴ uzye swemo tutakwata nsambu ya kupelwa cakulya ni cakumwa pa mulimo uno tukaomba.

⁵ Cila muntu muno tuyelile akweti nsambu zya kusenda muci wakwe mwina Klistu pa lwendo, ndi vino atumwa nga na ina ya Mwene pamwi na Petulo yakacita.

⁶ Uzye nene pamwi na Banaba tutangalya uwila suka tutale tuombe pa kuzana vino tukalonda?

⁷ Uzye musilika cii wino akaizanila umwisikulu vilondwa vyakwe? Uzye mulimi cii wino asyalya vilyo kufuma mu calo cakwe? Uzye mucemi cii asyaomvya iziya kufuma ku viteekwa vyakwe?

⁸ Ntakulanda cii ku maka yane nemwisikulu, pano Masunde yakwe Mose yakalanda cili conga kwene.

⁹ Tukawelenga vyalembwa mu Masunde yakwe Mose ukuti, “Mutanyepa cipambasi mulomo lino mukumuomvya pa kupuula.” Uzye lyene tumati Leza pa kuvwanga cii wisile mano pali yacipambasi?

¹⁰ Uzye wene lino wavwanzile cii atavwanzile pamulandu witu? Cii calemvilwe mu malembelo pamulandu witu, pakuti wino akalima na wino akazombola yonsi kwene yaombe mukupaalila kwankana vilimwa kufuma mu uzombozi.

¹¹ Lino twamunenyile ilandwe, cali wa kuta kwa mbezu zyamu mupasi. Uzye lyene icani cino tutangapokelela kufuma kuno muli cino tukuulilwa?

¹² Yauze ndi yakweti nsambu zya kupokelela vintu vii, uzye swemo citalusile? Lelo swemo tutatala twaomvya nsambu ii. Mu cifulo cakwe cico, swemo tukazizimizya mu vintu vyonsi pakuti tutika intanzi mu kukosola kwi Landwe Lisuma lya pamulandu wakwe Klistu.

¹³ Cumi kwene mwamanya vino antu akaomba mu Ng'anda ikulu yakwe Leza yene yakalya kufuma muli vino vikapelwa mwenemo. Nupya mwamanya vino yao akaomba pa kavuwa yene yakaankanyiwako impolelwa zimwi zino zikapelwa pa kavuwa.

¹⁴ Mu musango uli onga kwene, Mwene nawe wapela ilamulo lyakuti yao akakosola Ilandwe yalinzile kupelwa vyakulya kufuma mu kukosola kwao.

¹⁵ Lelo nemo ntatala naomvya nsambu ili yonsi pali zii, nupya nsyakulemba cii ndakai pakuti ntandike kuziomvya. Canzipila ukufwa kuluta kuti umwi ampokolole nsambu ya kuilumba muli cii!

¹⁶ Ntakweti nsambu ya kuilumba sile pamulandu wa kukosola Ilandwe Lisuma pano Mwene uwampile ilamulo lya kukosola. Kalanda kunondi ndi nsyakukosola Ilandwe!

¹⁷ Ndi nkukosola pamulandu wakuti nkulonda kukosola, ale lyene ndalipilwa. Lelo nkacita cii pa kwangalilwa, pano Leza wandasika mulimo uu.

¹⁸ Uzye lyene malipilo cii yano nkapelwa? Malipilo yane akasita kasuma kakukosola Ilandwe Lisuma kwaula kulifya, nanti kuomvya nsambu zino nakwata mu mulimo wa kukosola ilandwe.

¹⁹ Nemo nene muntungwa, nsi muzya wa muntu ali wensi. Lelo nati nja muzya wa antu yonsi pakuti ndonke antu aingi kuluta.

²⁰ Lino ncili omba pakasi ka Ayuda, nemo nkaikala uwamu Yuda pakuti njalonke. Nanti angala nemwisikulu nsyatekwa na Masunde yakwe Mose, nemo nkaikala kwati nkateekwa nayo lino nkuomba pamwi na yao akateekwa nayo, pakuti njalonke.

²¹ Mu musango uli onga kwene, lino nkuomba pamwi na Akulukuwa, nemo nkaikala wa Mukulukuwa, kwaula kulondela Masunde ya Ciyuda, pakuti ndonke Akulukuwa. Cii cisyakusenula ukuti nsyayela Masunde yakwe Leza. Mucumi nemo nkateekwa na Masunde yakwe Klistu.

²² Lino ndi pakasi ka antu yano utailo wao utonte, nani kwene nkaikala ndi vino yaya, pakuti njalonke. Caleka nkacita consi cingacitwa pakuti ntuule yamwi munoyali.

²³ Nkacita vii vyonsi pamulandu wi Landwe, pakuti ningakumako ku kupolelelwa ukwaya mwi Landwe.

²⁴ Cumi kwene mwamanya vino antu aingi yakasimula mu kucimvyanya kwa lwilo, lelo umuntu wenga sile akalonka cilambu. Caleka namwe simulini mu musango wakuti mulonke cilambu.

²⁵ Muntu wensi akakumako ku kuiteyanya ku kucimvyanya, wene akasundwa, pakuti alonke cilambu ciyembe cino cikalowa. Lelo swemo tukasimula pakuti tulonke cilambu cino cilikalilila manda pe.

²⁶ Uli mulandu uno nemo nkasimula kuti mfikilizye simwililo lyane. Nupya uli mulandu uno nemo nkoline wa muntu akacimvyanya mu makofi, wino asyasumba sile makofi yakwe mu muza.

²⁷ Nemo nkaomvya mwili wane uluku uluku kuti uye wa muzya wantontela, nkacita vii pakuti ntakasumbwe kunzi pacisila ca kukosola Ilandwe Lisuma kuli yauze, nkaye kwati awiyo watapotwa.