1 Kolinto 6 - Amazwi Yakwe Leza 2013

Ukusitakana ku cilye ca milandu

¹ Umwi uwa munomuli ndi yamutala mulandu ku mwina Klistu muze, uzye wene angasitaka muze uli ku cilye ca milandu cakwe yakapingula atataila? Uzye atange asitake ku antu yakwe Leza kuti yapingule mulandu?

² Uzye mutamanya ukuti antu yakwe Leza yalapingula antu amuno nsi? Endi, ndi cakuti mulapingula antu amuno nsi, uzye mwemo mutangapingula tumilandu tunono?

³ Uzye mutamanya ukuti swemo tulapingula angeli? Nga pali ufi umi wa pano nsi!

⁴ Milandu ya musango uu ndi yacitika pakasi kinu, uzye mungasitaka uli ku antu asi amwi uvi kuti yapingule?

⁵ Cii ica nsonyi kunomuli! Cumi kwene, pakasi kinu palinzile kuya nanti umuntu umwi wenga uwa mano, wino angaputwila aina Klistu milandu.

⁶ Mu cifulo cakwe cii, cazanwa ukuti mwina Klistu wenga akasitaka umuze ku cilye ca milandu kuti apingulwe na asi a mwiuvi.

⁷ Kusitakana ku cilye ca milandu pakasi kinu, kukalanga paswe ukuti mwemo mwati mucimviwa. Cange cizipe ndi cakuti yauze yatala milandu kunomuli! Nupya cange cizipe ndi cakuti yauze iiya cimwi kunomuli!

⁸ Lelo mu cifulo cakwe cii, mweisikulu mukatalana milandu nga nu kwiyilana, nanti angala mwemwe ina Klistu!

⁹ Cumi mwamanya ukuti yakaifya yatalakumako ku Wene wakwe Leza. Mutaitumpoka! Antu akacita ulenzyo, nanti akapepa tuluwi, nanti akacita ivya winyi,

¹⁰ nanti akaiya, nanti a lwiswa, nanti akolesi, nanti akatumpwila auze, nanti aivi, pali yaa yonsi kusi alakumako ku Wene wakwe Leza.

¹¹ Yamwi munomuli mwali wakwe yaa. Lelo mwaswefiwa kufuma ku maifyo, nupya mwaipelesya kuli Leza mu, Mwene Yesu Klistu na Mupasi Wamuzilo, anga lyene mwaya aololoke pa manso yakwe Leza.

Omvini mili inu ku lulumbi lwakwe Leza

¹² Umwi angati, “Vintu vyonsi vyazumiliziwa kunondi.” Endi, asi vyonsi vingakwazwa. Nemo ningati, “Vintu vyonsi vyazumiliziwa kunondi.” Endi, lelo ntangazumilizya cimwi cincite uzya.

¹³ Umwi angavwanga ati, “Cakulya capangilwe kwingila mu nda, nga ni nda nayo yapangilwe kupokelela cakulya.” Endi, lelo Leza alonona vii vyoili. Umwili utalinzile kuomviwa mu kucita ulenzyo, lelo ulinzile kuomviwa mu kutumikila Mwene. Mwene aliwe akasunga mwili.

¹⁴ Leza wazyukwile Mwene kufuma ku afwe, nga naswe kwene alatuzyukula kupitila mu maka yakwe.

¹⁵ Mwamanya vino mili inu ivilundwa vya mwili wakwe Klistu. Uzye icisuma ndi natola cilundwa ca mwili wakwe Klistu nu kuti ciye cilundwa ca mwili wakwe cizelele? Citangacitika!

¹⁶ Nanti uzye mutamanya vino umuntu wino akalundanya mwili wakwe kuli cizelele ala wene waya mwili onga pamwi nawe? Calembwa paswe mu malembelo cati, “Oili yalaya umwili onga.”

¹⁷ Lelo wino uwailundanya umwisikulu ku Mwene ala wene waya nawe pamwi mu mwenzo.

¹⁸ Leukini ku uzelele. Iifyo lyonsi lino umuntu angacita lisyakowezya mwili wakwe. Lelo umuntu wino akacita uzelele wene akaifya ku mwili wakwe umwisikulu.

¹⁹ Uzye mutamanya vino mili inu ing'anda ikulu yakwe Mupasi Wamuzilo? Leza wamupile Mupasi Wamuzilo kuti aikala munomuli. Uli mulandu uno umi uno mukwikala usi wakwinu lelo uwakwe Leza.

²⁰ Leza wamukazile pa mutengo ukulu cuze. Caleka omvini mili inu mu kupeela lulumbi kuli Leza.