1 Kolinto 5 - Amazwi Yakwe Leza 2013

Ulenzyo mwi uvi

¹ Ndakai, cikuvwika vino munomuli, muli ulenzyo uwipisye cuze kuluta uno antu atataila yakacita. Nuvwa ukuti umuntu akamanyana nu muci wakwe isi!

² Uzye lyene mungaitumika uli? Mulinzile kuvwa ulanda pa cintu cii, nu kuzinga umuntu wiyo mu utandano, wino uwacita cintu cii.

³ Nanti angala nsi pamwi namwe, lelo nkaetetwila vintu uti indi namwe. Lelo mwi zina lya Mwene witu Yesu, nemo nati mpingula umuntu uwatacita vii kwati na manye ndi pamwi namwe.

⁴ Lino mulakongana, nani kwene mu melenganyo ndaya namwe, lyene ku maka ya Mwene witu Yesu,

⁵ mulinzile kupeela muntu wiyo kuli Ciwa pakuti mwili wa muntu wiyo uce ucuziwe, nu mupasi wakwe ukatuulwe pa Wanda uno Mwene Yesu aliiza.

⁶ Cisi cisuma ukuti mwaitumika! Uzye mutamanya vino citutumusi cinono sile cingatutumula munya wa ngano?

⁷ Mulinzile kufumya citutumusi ca mpiti ci iifyo, pakuti muye aswepe muli vyonsi. Lyene mulakolana wa munya wa ngano upya uwaulamo citutumusi nanti cimwi ndi vino mu cumi manyile avino muli. Pano Cimulo citu ca Ucilo cati citeyanyiziwa, nga Klistu, Mwana wa mfwele uwa ucilo watapelwa impolelwa.

⁸ Caleka mutazevya Cimulo cii lino mukucita viipe nu ukakasi. Cii cikoline wa kupelwa kwa mukate usi ni citutumusi, uno ukaswefya mwenzo nupya uwa cumi.

⁹ Muli kalata wino nalemvile kunomuli namunenyile kuntaya mu utandano na antu yano yakacita ulenzyo.

¹⁰ Lelo ntamunenyile kuntaya mu utandano na antu yonsi amuno nsi, yano akacita ulenzyo nanti lwiswa nanti aivi nanti yakapepa ya tuluwi. Kufumako ku antu yaa, suka mwafutata nu kufuma muno nsi.

¹¹ Nkusenula ukuti mutalinzile kuya mu utandano nu muntu akaitaka vino wene umwina winu, lino wene akacita ulenzyo, nanti uwa lwiswa, nanti akapepa tuluwi, nanti uwa ntumpu, nanti umukolesi, nanti umwivi. Mutaikala pansi nu kulya pamwi nu muntu wa musango uu.

¹² Uzye nani cimpazi kupingula antu asi aina Klistu? Leza alayapingula Uzye mwemo mutalinzile kupingula vilundwa vya mwi uvi linu?

¹³ Cili ndi vino calembwa mu malembelo cati, “Zingini umuntu ali wensi mwipe uwa munomuli.”