1 Kolinto 16 - Amazwi Yakwe Leza 2013

Kuta mawila akwazwa antu yakwe Leza

¹ Lino mukupoka uwila wakwazwa antu yakwe Leza amu Yudeya, nkulonda kuti mwacita ndi vino nanenyile mauvi amu Galatiya.

² Cila wanda uwakutandika mulungu cila wenga uwa munomuli alinzile apaatule impiya zimwi pa mbali nu kusunga kulingana na vino walonka, pakuti kutakaye kusangula kwa mpiya lino ndiza.

³ Caleka lino ndafika, ndamupeela makalata akuilondolola ku antu yano mwasolola, nga nao ndayatuma kuti yatwale makalata pamwi nu wila winu onsi ku Yelusalemu.

⁴ Ndi cingaya icampomvu kuti nemo mpite, lyene ningapita pamwi nao.

Mapange yakwe Paulo

⁵ Ndiza mfike kunomuli pacisila ca kupita mu mpanga ya Makedoniya.

⁶ Kwene nemo ndikala pamwi namwe kufika pa nsita imwi, limwi nu kukusila kwa mwela nga lyene mungaca mungazwilizye vya pa lwendo, konsi kuno indi nu kuya.

⁷ Nkulonda kuti tukalolane namwe ningo kuluta kulolana sile namwe mu kupita. Nkupaalila kwikala namwe pa nsita ntali ndi cakuti Mwene wazumilizya.

⁸ Namaikala muno mu Efeso kufika pa wanda uwa Pentekosti.

⁹ Pano kali kasita kasuma ka kuomba incito ikulu nupya ya mpomvu, nanti angala kuli anisi aingi.

¹⁰ Ndi Timoti waca wafika kunomuli, muce musininkizye ukuti mwamuzengela ningo ataca anyinyinzika pano wene akutumikila Mwene, ndi vino nani nkucita.

¹¹ Kutaya umuntu nanti umwi uwa kumusula, lelo mulinzile kumwazwa kutwalilila lwendo lwakwe mu mutende. Nani ndamulolela suka lino alaweluluka kunondi. Nkupaalila alawela pamwi na ina itu yauze.

¹² Lyene pamulandu wakwe Apolo, nemo nezya na maka kumukomelezya kuti wene pamwi na ina yauze yace yamutandalile. Lelo wene asikulonda kwiza ndakai. Lelo lino alakwata kasita kamwi kasuma, alino aliza kuko.

¹³ Pempulini nu kukomeleka mu utailo, posyini, muye na maka.

¹⁴ Ombini milimo inu yonsi mu kutemwa.

Mazwi yakusyalikizya

¹⁵ Inane, mwamanya vino Sitefano pamwi na amu ng'anda yakwe ayano yatandike kuya aina Klistu a nkolelo mu mpanga ya Akaya nupya yaipela aisikulu ku kuomba vyonsi vino yangacita pamulandu wa antu yakwe Leza. Inane, nkumupapata,

¹⁶ londelini utunguluzi uwa antu ali ndi yaa, nga nayauze yano akaomba nu kutumikila pamwi nao.

¹⁷ Nati nzanga pamulandu wa kwiza kwakwe Sitefano, Fotuneto nga na Akaiko. Lino tuli nao kuno cikoline kwati tuli namwe.

¹⁸ Yene yandenzile kuvwa ningo kuluta, wakwe vino namwe yamulenzile kuvwa ningo. Antu ali ndi yaa mulinzile kuyataizya.

¹⁹ Mauvi amu muputule wa mpanga ya Asia yamulamuka. Akwila na Pulisila pamwi na amwi uvi lino likakongana pamwi nao mu ng'anda yao nao kwene yamulamuka mwi zina lya Mwene.

²⁰ Aina itu yonsi kuno nao kwene yamulamuka. Mulamukane mukutemwa kwa cumi.

²¹ Ne Paulo nkumulembela mazwi yaa ni kasa lyane.

²² Muntu umwi ndi asyatemwa Mwene, Atipwe! Malanata! Mwene witu, iza!

²³ Mwene amupolelele.

²⁴ Kutemwa kwane kuye pali mwemwe muli Klistu.