1 Kolinto 11 - Amazwi Yakwe Leza 2013

¹ Mulinzile kulondela cilangililo cane mu micitile ndi vino nani nkalondela cilangililo cakwe Klistu mu micitile.

Anaci yalinzile kuvimba ku mutwe lino yakongana ku mapepo

² Inane nemo nkumutasya pano mukanjiusya lyonsi nu kulondela masambilizyo yano napiile kunomuli.

³ Lelo nkulonda kuti mumanye vino Klistu ali mutwe pa onsi yonsi, nga monsi nawe ali mutwe pa mwanaci. Lelo Leza nawe ali mutwe pali Klistu.

⁴ Cii cikusenula ukuti monsi ali wensi wino akapepa nanti kusema mazwi yakwe Leza lino watavimba cimwi ku mutwe wakwe ala akuzewanya Klistu.

⁵ Lelo mwanaci ali wensi wino akapepa nanti kusema mazwi yakwe Leza kwaula kuvimba cimwi ku mutwe wakwe ala wene akuzewanya umutwe wakwe. Wene atapusine nu mwanaci wino watapela lukuzu ku mutwe wakwe.

⁶ Mwanaci ndi asyavimba cimwi ku mutwe wakwe cingamuzipila kupela ni nyele zyakwe kwene. Ndi vino cili ca nsonyi ku mwanaci ndi wapela inyele zyakwe, wene cingamuzipila kuvimba cimwi ku mutwe wakwe.

⁷ Cisyalondekwa kuti monsi avimba cimwi ku mutwe wakwe, pano wene akalangizya cata nga nu lulumbi lwakwe Leza. Lelo mwanaci wene akalangizya lulumbi lwa monsi.

⁸ Pano monsi ataumvilwe kufuma ku mwanaci, lelo mwanaci waumvilwe kufuma ku monsi.

⁹ Nupya monsi ataumvilwe pamulandu wa mwanaci, lelo mwanaci wene waumvilwe pamulandu wa monsi.

¹⁰ Caleka pamulandu wa angeli, mwanaci alinzile kuvimba cimwi ku mutwe wakwe pakuti alange vino iya ali na maka panoli.

¹¹ Lelo pa manso ya Mwene mwanaci asi cimwi kwaula monsi. Monsi nawe asi cimwi kwaula mwanaci.

¹² Pano vino mwanaci waumvilwe kufuma ku monsi, mu musango uli onga kwene monsi akavyalwa ku mwanaci. Leza aliwe akalenga kuti vintu vyonsi viyeko.

¹³ Muipingule mweisikulu ndi cilinzile kuti mwanaci apepa kuli Leza pa ukongano wa mapepo, kwaula kuvimba cimwi ku mutwe wakwe.

¹⁴ Uzye civyalilwa citu cisyamusambilizya vino monsi ndi ali ni nyele zitali ala ica nsonyi,

¹⁵ lelo ku mwanaci zyene iciyembelo? Inyele zyakwe zitali zyapilwe kunoli kuti ziye cakuvimba pa mutwe wakwe.

¹⁶ Lelo ndu muntu ali wensi akulonda kupazyanya pamulandu wakwe cii, ale cino nemo ningalanda cakuti swemo nanti mauvi yakwe Leza tutakweti lutambi luze lwa mipepele.

Cimulo ca Mwene

¹⁷ Caleka nupya pali umulandu uze uno ntange mutasye uwakuti kukongana kwinu ku mapepo kukaleta viipe kuluta visuma.

¹⁸ Nkolelo, nanenwa ukuti mukweti maumba akucita kupaatukana mu kukongana kwinu. Nupya ninsininkizya ukuti vimwi vino nuvwa ivya cumi.

¹⁹ Tutangazunguka ukuti kupaatukana kulinzile kuye munomuli pakuti yao akucita vya wololoke yangaloleka paswe.

²⁰ Lino mukakongana pamwi wi umba, asi Cimulo ca Mwene cino mukalya.

²¹ Pano lino mukulya, cila muntu akatandika kulya vyakulya vyakwe umwine, yauze iikala ni nzala nga na yamwi nao ala yakukoleka.

²² Uzye mutakwata ku mwinu ku mang'anda kuno mungalya nu kumwa? Nanti uzye mukusula iuvi lyakwe Leza nu kucita antu aulizya insonyi? Uzye cani cino mwemo mukupaalila kuti munene pamulandu wakwe cii? Uzye namamutasya? Awe, ntange mutasye!

²³ Pano usambilizyo uno namupiile naupokelile kufuma ku Mwene, uwakuti Mwene Yesu, pa wanda uno yamukoofile usiku, watozile mukate,

²⁴ ataizya kuli Leza, aumokoola, nga avwanga ati, “Uu, uli mwili wane, uno wapelwa pamulandu winu. Mwacita cii pa kunjiusya.”

²⁵ Mu musango uli onga kwene, pacisila ca kulya cimulo atoola ulwako nga avwanga ati, “Lwako luu ulwa upangano upya uno Leza watamapo insimbi nu wazi wane. Lyonsi lino mukumwa mwacita cii pa kunjiusya.”

²⁶ Cii cikusenula ukuti lyonsi lino mwalya umukate uu nga nu kumwa mu lwako luu ala mukulanda imfwa ya Mwene kufika lino aliza.

²⁷ Acino ndu muntu ali wensi walya umukate wa Mwene nanti kumwa mu lwako lwakwe mu musango utalinzile uwakumuzewanya, ala wene wailetelela mulandu uwa kusaalula mwili nga nu wazi wa Mwene.

²⁸ Caleka cila muntu atale aipime umwisikulu nkolelo lino atali kuti alye umukate nga nu kumwa mu lwako.

²⁹ Pano ndi atangalooka vino cii cikusenula lino akulya umukate nga nu kumwa mu lwako, ale wene akuiletelela upinguzi panoli umwisikulu lino akulya nu kumwa.

³⁰ Uli mulandu uno aingi munomuli mukulwala nu kutonta nupya yamwi yafwilapo mpiti.

³¹ Ndi twaipituluka ningo lyene tutangaya akupingulwa na Leza.

³² Lelo lino tukapingulwa tukasundwa nu Mwene kuti tusambilile tutakavunukwe pamwi na antu amu nsi.

³³ Caleka, inane, lino mwakongana pamwi ku kulya Cimulo ca Mwene, mwapembelana.

³⁴ Wanzala azuka watalya ku ng'anda kwakwe, kuti mutapingulwa na Leza pamulandu wa kukongana kwinu. Lyene milandu yuze ino ntalanzile ndiza njimalile lyuze lino ndiza.