1 Kolinto 1 - Amazwi Yakwe Leza 2013

¹ Kalata kufuma kuli ne Paulo, wino uwamwa ku kulonda kwakwe Leza kuti nje mutumwa wakwe Klistu Yesu, pamwi na Sositeni mwina witu.

² Kwi uvi lyakwe Leza ilili mu Kolinto, na kuli yonsi yano aamwa kuti yaye antu yakwe Leza amuzilo, ali akwakwe mu kutaila kwao muli Klistu Yesu, pali pamwi na antu yonsi konsikonsi yano akapepa Mwene witu Yesu Klistu, Mwene witu nupya wakwao.

³ Leza Tata nu Mwene Yesu Klistu amupeele cikuku nu mutende.

Kupolelelwa muli Klistu

⁴ Lyonsi nkataizya Leza wane pamulandu winu na pa cikuku cino wamupeela muli Yesu.

⁵ Pano mukutaila muli Klistu mwemo mwati muya akama mu vintu vyonsi, pamwi nu mu mvwango nga nu mukumanya ivintu.

⁶ Pano mazwi ya umboni pali Klistu yakomeleka munomuli

⁷ cakuti kusi uwila nanti onga uwa mupasi uno mulilwa, lino mucili mukulolela Mwene witu Yesu Klistu kuti asokololwe.

⁸ Leza alamusunga mu kukomeleka kufika nu kumpelelekezyo, pakuti mutakaye amulandu pa Wanda wa Mwene witu Yesu Klistu.

⁹ Leza uwakutailwa, nupya aliwe wamwamile kuti muye mu utandano nu Mwana wakwe Yesu Klistu, Mwene witu.

Kupaatukana mwi uvi

¹⁰ Inane mwi zina lya Mwene witu Yesu Klistu nkumupapata mwensi, kuti, mwazumilizyanya muli vino mwalanda, pakuti kutaya kupaatukana munomuli. Muye alemane cuze a mwenzo onga na melenganyo ali yamwi.

¹¹ Pano antu yamwi kufuma ku amu ng'anda yakwe Koloe yatiyanena paswe ukuti pakasi kinu pali kulemanila.

¹² Manye kandande ndi vii, cila muntu munomuli akulanda cimwi cipusane. Umwi ati, “Nemo nkalondela Paulo,” muze nawe ati, “Nemo nkalondela Apolo,” muze nawe ati, “Nemo nkalondela Petulo,” muze nawe ati, “Nemo nkalondela Klistu.”

¹³ Uzye Klistu wankanyiziwa? Uzye Paulo uwafwilile mwemwe pa lupanda? Uzye mwemo mwawatiziwe mwi zina lyakwe Paulo?

¹⁴ Nkutaizya Leza ukuti nemo ntawatizye umuntu namuze munomuli, suka sile Kilisipa na Gayusi.

¹⁵ Lyene kusi umwi angalanda ukuti wawatiziwe mwi zina lyane.

¹⁶ Endi nupya nawatizye Sitefano pamwi na amu ng'anda yakwe kwene. Lelo ntange niusye ndi nawatizye muntu na muze.

¹⁷ Klistu atantumile ku kuwatizya. Wene wantumile ku kukosola Ilandwe Lisuma kwaula kukovyanya mazwi, yano angalenga kuti imfwa yakwe Klistu ya pa lupanda itaya na maka.

Klistu ali maka na mano yakwe Leza

¹⁸ Pano Ilandwe lya pamulandu wa mfwa yakwe Klistu pa lupanda lisyasenula cimwi ku antu yano akulowa. Lelo kunotuli swe muno tukutuulwa, Ilandwe lii amaka yakwe Leza yano akuomba.

¹⁹ Calembwa mu malembelo cati, “Ndonona mano yakwe yao yonsi akaitaka vino yene yaya na mano nu kuvulunganya kucenjela kwa yacenjele.”

²⁰ Caleka, uzye lyene yalikwi antu yamano? Nanti nkonkotela zyakwe yakasambilizya ya Masunde? Nanti yao akaitumika mu kwasuka mauzyo ya muno nsi? Leza walanga vino mano amuno nsi yene uwelewele!

²¹ Pano Leza mu mano yakwe walenzile ukuti citacitika ukuti antu yamumanye kupitila mu mano yao. Lelo camuzipile ukuti antu ataila yatuulwe kupitila mwi Landwe lino tukakosola, ilikauvwika lya uwelewele ku antu yamwi.

²² Ayuda yakalonda vinjelengwe pakuti yasininkizye, nga Agiliki nao yakalonda mano.

²³ Lelo swemo tukakosola Klistu uwatanyilwe pa lupanda, ilandwe lyaya icisiki cakupumikako Ayuda nupya utumpe ku Akulukuwa.

²⁴ Lelo kuli yao yano Leza waama, Ayuda na Akulukuwa kwene, yonsi yaa iiluka ukuti Klistu ali maka nga na mano yakwe Leza.

²⁵ Pano cino cikaloleka wa uwelewele wakwe Leza cene ica mano kuluta mano ya muntu, nga na cino cikaloleka wa utonte wakwe Leza cene ica maka kuluta maka ya muntu.

²⁶ Inane, iusyini vino mwali lino Leza wamwamile. Mu milolekele ya untu, anono sile amunomuli yano angati ali yamano nanti ali yamaka nanti avilwe pi yanza licindame.

²⁷ Leza, mwi pange lyakwe, wasolwile cico cino antu amu nsi yakaelenganya kuya utumpe, pakuti wene angazewanya antu yamano, nupya wene wasolwile cico cino antu amu nsi yakaelenganya kuya utonte pakuti azewanye antu yamaka.

²⁸ Wene wasolwile cico cino antu amu nsi yatazyela nu kusuula, nga nu kwelenganya ukuti icasilesile pakuti aonone cico cino antu amu nsi yakaelenganya vino icampomvu.

²⁹ Cii cikusenula ukuti kusi umwi angaitumika pa manso yakwe Leza.

³⁰ Lelo Leza wamuleta muli Klistu Yesu, nupya Leza wasenula Klistu kuya amano itu. Kupitila munoli Leza akatucita aololoke pa manso yakwe. Muli Yesu tukaya antu amuzilo yakwe Leza, nga nu kutuulwa.

³¹ Caleka, cili ndi vino calembwa mu malembelo cati, “Wino akailumba ailumbe mu Mwene.”