Марко 1 - Нов превод на Новиот Завет 2023

Улогата на Јован Крстител

¹ Почеток на благовестието на Исус Христос, Син Божји.

² Како што е напишано кај пророците: „Еве, Јас го испраќам пред Твоето ли­це Мојот ангел, кој ќе го под­готви Твојот пат пред Тебе.

³ Гласот на оној што вика во пусти­на­та: ’Подгответе го патот на Господа, исправете ги Неговите патеки.‘“

⁴ Се појави Јован, крштевајќи во пустината и проповедајќи покајно крштевање за простување на гревовите.

⁵ И доаѓаа кај него од целата јудејска земја и од Ерусалим, и сите се крш­те­ваа од него во реката Јордан, ис­по­ведајќи ги своите гревови.

⁶ А Јован беше облечен во камилски влакна и појас од кожа околу својата половина, и јадеше скакулци и див мед.

⁷ Тој проповедаше, велејќи: „По мене иде Оној што е посилен од мене, Кому не сум достоен да Му се наведнам и да Му ги одврзам ремењата од обувките.

⁸ Јас ве крстив во вода, а Тој ќе ве крс­ти во Светиот Дух.“

Исусовото крштевање

⁹ А во оние денови дојде Исус од Назарет галилејски и се крсти од Јован во Јор­дан.

¹⁰ И кога излегуваше од водата, вед­наш виде како се отвораат небесата и како Духот, во вид на гулаб, слегува над Него.

¹¹ И се слушна глас од небесата: „Ти си Мојот возљубен Син, во Кого е Мојата волја.“

Исусовото искушување во пустината

¹² Веднаш потоа Духот Го изведе во пустината.

¹³ И таму, во пустината, чети­ри­есет дена беше искушуван од сатаната; беше со ѕверовите и ангелите Му служеа.

Исус го проповеда благовестието во Галилеја

¹⁴ А потоа, откако Јован беше затворен, Исус дојде во Галилеја и го про­по­ведаше благовестието за царството Божјо,

¹⁵ велејќи: „Времето се исполни и царството Божјо наближи; покајте се и верувајте во благовестието.“

Повик до четирите рибари

¹⁶ И, одејќи покрај Галилејското Мо­ре, Исус ги виде Симон и Ан­дреј, Симоновиот брат, како фрлаат мрежа во морето, бидејќи беа рибари.

¹⁷ Исус им рече: „Врвете по Мене и Јас ќе ве направам ловци на луѓе!“

¹⁸ И тие веднаш ги оставија мрежите и тргнаа по Него.

¹⁹ Па, штом отиде уште малку понатаму, ги виде Ја­ков Зеведеев и брат му Јован кои, исто така, беа во кораб и си ги крпеа мрежите;

²⁰ веднаш ги повика и нив. И тие, откако го оставија својот татко Зеведеј во коработ со наемниците, тргнаа по Него.

Исус во Капернаум

²¹ И дојдоа во Капернаум; и веднаш во саботата Тој влезе во синагогата и поучуваше.

²² И се чудеа на Неговата наука, зашто Тој ги учеше како Оној што има власт, а не како книжниците.

²³ А во нивната синагога имаше еден човек со нечист дух, кој извика, велејќи:

²⁴ „Што имаш Ти со нас, Исусе На­зареецу?! Си дошол ли да нѐ погубиш? Те знам Кој си – Божјиот Светец!“

²⁵ Но Исус му заповеда, велејќи: „Замолкни и излези од него!“

²⁶ Тогаш нечистиот дух го стресе човекот и, извикувајќи со силен глас, излезе од него.

²⁷ И сите се ужаснаа, така што еден со друг се прашуваа и велеа: „Какво е ова ново учење, штом со власт и на нечистите духови им заповеда, и тие Му се покоруваат?“

²⁸ И веднаш се разнесе глас за Него по целиот Галилејски крај.

Излекување на Симоновата тешта

²⁹ Штом излегоа од синагогата, со Јаков и Јован дојдоа во куќата на Симон и Андреј.

³⁰ А тештата на Симон лежеше со треска; и веднаш Му кажаа за неа.

³¹ Тој пристапи, ја фати за рака и ја подигна; и треската веднаш ја остави; и таа им служеше.

Исус лекува мнозина

³² А приквечер, кога заоѓаше сонцето, кај Него донесоа секакви болни и опседнати од демони.

³³ И целиот град се беше собрал пред вратата.

³⁴ И Тој излечи мнозина болни што стра­даа од разни болести; истера мноштво де­мони и не им дозволуваше на демоните да зборуваат дека знаат оти Тој е Христос.

Исус во Галилеја

³⁵ А следното утро, во темни зори, стана, излезе и отиде во пусто место и таму се молеше.

³⁶ А Симон и оние што беа со Него, тргнаа да Го бараат;

³⁷ па, кога Го најдоа, Му рекоа: „Сите Те бараат!“

³⁸ А Тој им рече: „Да појдеме до блис­ките села и градови, и таму да про­по­ве­дам, бидејќи затоа дојдов.“

³⁹ И проповедаше во нивните синагоги, по цела Галилеја и изгонуваше демони.

Исус исцелува лепрозен

⁴⁰ И дојде кај Него еден лепрозен, па, молејќи Го, падна на колена пред Него и Му рече: „Ако сакаш, можеш да ме очистиш.“

⁴¹ А Исус се смилува, ја испружи раката, се допре до него и му рече: „Сакам, очисти се!“

⁴² И штом го рече тоа, се изгуби ле­п­ра­та од него, и тој се очисти;

⁴³ Па го отпушти и строго му заповеда,

⁴⁴ велејќи му: „Гледај, никому ништо да не кажуваш; туку отиди, покажи му се на свештеникот и принеси дар за твоето очистува­ње, како што заповедал Мојсеј, за ним да им се посведочи.“

⁴⁵ А тој, штом излезе, почна многу да проповеда и да разгласува за тоа, така што Исус не можеше јавно да влезе во градот, туку се задржуваше надвор, во оса­мени места. И доаѓаа кај Него отсекаде.