Евреите 1 - Нов превод на Новиот Завет 2023

Бог ни се објавува преку Синот

¹ Бог, Кој во минатото мно­гупати и на многу начини им зборуваше на нашите татковци преку пророците, во овие последни денови ни зборува преку Синот,

² Кого Го постави за нас­ледник над сѐ, преку Кого ги создаде и вековите.

³ Тој е одблесок на Божјата слава и отпечаток на Неговата суштина и држи сѐ со Својот моќен збор. Откако преку Себе ги очисти нашите гревови, Тој седна од десната страна на Величието во висините.

Величието на Синот Божји

⁴ И стана толку повозвишен од ан­ге­лите, колку што е пославно името што го наследи, во споредба со нивното.

⁵ Зашто кому од ангелите Бог некогаш му рекол: „Ти си Мој Син, Јас денес Те родив“, или пак: „Јас ќе Му бидам Татко, а Тој ќе Ми биде Син?“

⁶ Исто така, кога Го воведе Пр­во­ро­де­ниот во светот, рече: „Нека Му се поклонат сите Божји ангели!“

⁷ За ангелите, пак, вели: „Ти ги правиш Своите ангели ветрови, а Своите слу­жители – огнен пламен“,

⁸ а за Синот: „Твојот престол, Боже, е во вечни векови и жезолот на правдата е жезол на Твоето царство.

⁹ Си ја возљубил правдата и си го намра­зил беззаконието; затоа, Боже, Твојот Бог Те помаза со масло на радоста пове­ќе од Твоите придружници.“

¹⁰ И пак: „Во почетокот Ти, Господи, си ја основал земјата, а и небесата се дело на Твоите раце;

¹¹ тие ќе загинат, Ти остануваш; сите ќе изветват како облека;

¹² ќе ги свиткаш како наметка и тие ќе бидат променети; но Ти си истиот, и Твоите години не ќе имаат крај.“

¹³ А на кого од ангелите Бог некогаш му рекол: „Седи од Мојата десна страна, додека не ги положам Твоите непријателите како подножје на Твоите нозе?“

¹⁴ Нели се сите тие служителски ду­хови, испратени да им служат на оние што ќе го наследат спасението?