Ефесјаните 1 - Нов превод на Новиот Завет 2023

Поздрав

¹ Павле, по Божја волја апостол на Исус Христос, до светиите и верните во Христос Исус што се во Ефес:

² благодат и мир вам од Бога, нашиот Отец, и од Господ Исус Христос!

Неизмерна благодат

³ Нека е благословен Бог и Отецот на нашиот Господ Исус Христос, Кој во Христос нѐ благослови со секаков духовен благос­лов од небесата,

⁴ така што нѐ избра преку Него, уш­те пред создавањето на светот, за да бидеме свети и непорочни пред Него во љубовта.

⁵ Тој нѐ предопредели за посинување за Себе преку Исус Христос, според благонаклонетоста на Својата волја,

⁶ за пофалба на славата на Него­вата благодат, со која нѐ облагодати преку Својот Возљубен Син,

⁷ во Кого имаме откуп преку Негова­та крв, простување на гревовите според бо­гатството на Неговата благодат,

⁸ што изобилно ја излеа врз нас во сета мудрост и разум,

⁹ откривајќи ни ја тајната на Своја­та волја, според Својата благонаклонетост што ја беше положил во Него од порано,

¹⁰ за да ја оствари при исполнувањето на времињата, да возглави сѐ во Христос, и она што е на небесата, и она што е на земјата.

¹¹ Преку Него бевме избрани за наследници, предопределени спо­ред намислата на Оној што врши сѐ спо­ред Својата волја,

¹² за да бидеме за пофалба на Неговата слава ние, кои од порано се надевавме на Христос.

¹³ Во Него и вие, откако го слушнавте словото на вистината – благовестието за вашето спасение, и откако поверувавте во Него, бевте запечатени со ветениот Свет Дух,

¹⁴ Кој е залог на нашето наследство, за откупување на она што го стекна, за пофалба на Неговата слава.

Молитва за просветление

¹⁵ Затоа и јас, кога слушнав за ва­шата вера во Господ Исус и за вашата љубов кон сите светии,

¹⁶ не престанувам да благодарам за вас, спомнувајќи ве во моите молитви,

¹⁷ та Бог на нашиот Господ Исус Христос, Отецот на славата, да ви даде дух на мудрост и откровение за да Го познаете,

¹⁸ и да ги просветли очите на вашите срца, за самите да увидите каква е на­дежта од Неговиот повик, какво е богатството на славата на Неговото наследството во светиите,

¹⁹ и колку е неизмерна величината на Неговата сила во нас, кои веруваме пре­ку моќното дејствување на Неговата сила,

²⁰ коешто Тој го пројави во Христос, кога Го воскресна од мртвите и Го пос­тави од Својата десна страна на небесата,

²¹ повисоко од секое началство, власт, сила и господство и од секое име со кое се именуваат не само во овој свет, туку и во идниот,

²² и сѐ Му покори под Неговите нозе и Го постави за глава над сѐ во Црквата,

²³ која е Негово тело, полнота на Оној што исполнува сѐ во сѐ.