Fiilmoonaa 1 - Macaafa Qulqulluu Afaan Oromoo

Nagaa

¹ Ani Phaawulos, Kristos Yesusiif jedhee hidhamee utuun jiruu, Ximotewos obboleessa keenyaa wajjin, gara Filemon jaallatamaa hojiittis hidhata keenya ta'eetti*,

² akkasumas gara obboleettii keenya Aaphifiiyaatti, gara Arkiphos isa wal'aansoo keessatti hidhata keenya ta'eetti, gara waldaa mana keetti walitti qabamuuttis, kana caafuu koo ti*.

³ Waaqayyo abbaan keenya, gooftaan keenya Yesus Kristosis ayyaana, nagaas isiniif haa kennu*!

Jaalalaa Fi Amantii Filemon

⁴ Yeroon kadhata koo keessatti maqaa kee dha'u hundumaatti Waaqayyo koo nan galateeffadha*.

⁵ Jaalalaa fi amantii ati gooftaa Yesusii fi, warra Waaqayyoof qulqullaa'an hundumaafis qabdu dhaga'eera*.

⁶ Wanta gaarii ta'ee nu keessatti Kristosiif hojjetu hundumaa hubattee, hojii amantii keessaa hirmaachuu kee caalaa akka mul'iftuuf nan kadhadha*.

⁷ Yaa obboleessa ko, ati warra Waaqayyoof qulqullaa'an garaa ciibsiteetta; kanaanis ani jaalala kee keessaa gammachuudhaaf jajjabina baay'ee argadheera*.

Gaaffii Waa'ee Oneesimosiif Gaafate

⁸ Ani waan gochuun siif ta'u si abboomuudhaaf karaa Kristos ija jabina illee qaba;

⁹ garuu ani Phaawulos jaarsichi, ammas Kristos Yesusiif jedhee kanan hidhame, jaalalaaf jedhee si gorsuu nan fo'adha*.

¹⁰ Waa'ee ilma koo Oneesimos isa ani mana hidhaa keessa taa'ee abbaa ta'eefii, sin dhageessifadha*.

¹¹ Innis dur siif dhimma kan hin baafne ture; amma garuu siif, anaafis dhuguma dhimma kan baasuu dha.

¹² Isa deebisee gara keetti ergeera, garaan koos isa duukaa dhufeera.

¹³ Ani illee wangeelaaf jedhee yeroo ani hidhamee jiru kanatti, qooda kee akka inni anaaf hojjetuuf of bira tursiisuu barbaadeen ture*.

¹⁴ Garuu hojii gaariin ati hojjettu giddiidhaan utuu hin ta'in fedha garaa keetiitiin akka ta'uuf, yaada kee duuba ani waan tokko illee gochuu hin jaallanne*.

¹⁵ Tarii yeroodhaaf si irraa gargar ba'uun isaa yeroo hundumaa ati akka isaa wajjin haftuuf ta'a.

¹⁶ Si'achi akka obboleessa jaallatamaa isa garbichaa oliitti isa fudhadhu malee, akka garbichaatti miti; anaaf iyyuu erga akkas jaallatamaa ta'ee, siif immoo namummaa isaatiin, gooftaattis attam caalchisee siif haa ta'u ree*?

¹⁷ Ammas ani hidhata kee ta'uu koo kan yaaddu erga ta'ee, ana akka na simtutti Oneesimosin simadhu.

¹⁸ Inni waa sitti balleessee yoo jiraate yookiis gatii yoo isa irraa qabaate anatti lakkaa'i!

¹⁹ Ani Phaawulos ?Gatii isa irraa qabdu siifan baasa? jedhee kana harka kootiin caafuu koo ti; kana malees oolchaa kootiif akka ati ofii kee gatii gootee anaaf baasuun si irra jiru sitti himuu ana hin barbaachisu*.

²⁰ Egaa yaa obboleessa ko, maqaa gooftaatti dhimma kana anaaf raawwadhu! Kristosiif jedhiitii garaa na ciibsi.

²¹ Waan ani sitti himu irra caalchiftee hojjechuu kee beekee, abboomamuu kees amanadhee, kana siif caafeera.

²² Achumaan immoo kadhata keessaniin Waaqayyo isiniif na kenna jedhee waanan abdadhuuf, iddoo buufataa anaaf qopheessi*!

Gara Dhumaatti Nagaa Dhaamuu Isaa

²³ Ephafraas, maqaa Kristos Yesusiif jedhee anaa wajjin hidhamee kan jiru nagaa siif dhi'eessa*.

²⁴ Maarqos, Arisxaarkos, Deemaas, Luqaasis hojiitti hidhata koo kan ta'an nagaa siif dhi'eessu*.

²⁵ Ayyaanni gooftaa keenyaa Yesus Kristos hafuura keessanii wajjin haa ta'u.