2 ሳሙኤል 6 - Macaafa Qulqulluu Afaan Oromoo

Sanduuqa Kakuu Yerusaalemitti Geessuu Isaanii

¹ Daawit ammas Israa'eloota keessaa namoota fo'amoo kuma soddoma walitti in qabe.

² Daawitii fi namoonni isaa sanduuqa kakuu Waaqayyoo mandara Ba'aalaa ishee Yihudaa keessa jirtu keessaa fuudhanii fiduudhaaf in ka'an; sanduuqi kakuu kun maqaa Waaqayyo gooftaa maccaa isa Kiruubel lamaan gara irraa teessoo isaa irra taa'een waamame*.

³ Isaan sanduuqa kakuu Waaqayyoo mana Abinaadaab isa gaara irra ture keessaa fuudhanii, konkolaataa haaraa tokko irra in kaa'an; ilmaan Abinaadaab Uzaa fi Ahiiyon immoo horii konkolaataa haaraa sana harkisan in oofu turan*.

⁴ Ahiiyon sanduuqa kakuu Waaqayyoo isa mana Abinaadaabii fuudhanii fidan sana dura in adeema ture.

⁵ Daawitii fi Israa'eloonni hundinuu immoo Waaqayyo duratti weedduudhaan, sagalee kiraaraatiin, maseenqoodhaan, dibbeedhaan, sibiila <<Kosh kosh>> jettuun, sibiila walitti rukutamee sagalee dhageessisuunis of irraa bu'anii in taphatu turan.

⁶ Oobdii midhaanii Naakon bira yommuu ga'an immoo, qotiyyoon konkolaataa sana harkisan waan gufataniif, Uzaan sanduuqa kakuu sana qabuudhaaf itti in hiixate.

⁷ Uzaan sanduuqa kakuu Waaqayyoo safeeffachuu waan dhiiseef, Waaqayyo baay'ee isatti aaree isa in dha'e; kanaaf inni achuma sanduuqa kakuu Waaqayyoo biratti in du'e*.

⁸ Daawit immoo sababii Waaqayyo badiisa kana Uzaatti fideef in aare; maqaan iddoo sanaas hamma har'aatti iyyuu<<Pherez-Uzaa>> jedhama; [kana jechuun <<Badiisa Uzaa>> jechuu dha.]

⁹ Yeroo kun ta'etti, Daawit Waaqayyoon sodaatee,<<Attamitti sanduuqa kakuu Waaqayyoo anaaf fiddu ree?>> jedhe.

¹⁰ Kanaaf Daawit sanduuqa kakuu sana gara mandara isaatiitti fudhatee galuu waan hin barbaanneef, mana Obed-Edoom nama Gaatitti in jal'ise.

¹¹ Sanduuqi kakuu Waaqayyoo, ji'a sadiif mana Obed-Edoom nama Gaat sana ture; Waaqayyo immoo Obed-Edoomin, maatii isaas guutummaatti in eebbise*.

¹² Yommus jarri tokko,<<Waaqayyo sababii sanduuqa kakuu isaatiif maatii Obed-Edoom, wanta inni qabu hundumaas eebbiseera>> jedhanii Daawit mootichatti in himan; kana irratti Daawit dhaqee, sanduuqa kakuu Waaqayyoo mana Obed-Edoom keessaa fuudhee, gammachuudhaan gara mandara Daawititti ol in fide.

¹³ Warri sanduuqa kakuu baatan akkuma tarkaanfii ja'a adeemaniin, mootichi korma tokkoo fi tuntunoo tokko aarsaa in dhi'eesse*.

¹⁴ Daawit dirata fuula duraa isa quncee talbaa irraa hojjetame mudhiitti hidhatee, ulfina Waaqayyootiif of irraa bu'ee in sirba ture*.

¹⁵ Akkasitti Daawitii fi Israa'eloonni hundinuu sagalee gammachuu, sagalee fiinoos dhageessisaa, sanduuqa kakuu Waaqayyoo ol in fidan.

¹⁶ Yeroo sanduuqi kakuu Waaqayyoo mandara Daawititti galetti, Mikaal intalli Saa'ol karaa qaawwa manaa gad ilaaltee Daawit mootichi ulfina Waaqayyootiif utaalee utuu sirbuu yommuu argite, garaa isheetti isa in tuffatte.

¹⁷ Jarri sanduuqa kakuu Waaqayyoo fidanii, dunkaana isa Daawit dhaabe keessa iddoo isaa in kaa'an; kana booddees Daawit, qalma gubamuu fi qalma araaraa Waaqayyoof in dhi'eesse.

¹⁸ Daawit, qalma gubamuu fi qalma araaraa sana dhi'eessuu erga raawwatee, maqaa Waaqayyo gooftaa maccaatiin jara in eebbise*.

¹⁹ Yommus inni dhiira, dubartii dha utuu hin jedhin, tokkon tokkon guutummaa namoota Israa'eliif buddeena tokko tokko, foon gumaa tokko tokkoo fi bixxillee ija waynii tokko tokko in hirsiise; kana booddee namoonni hundinuu mana mana isaaniitti in galan.

²⁰ Daawit qe'ee isaa ilaaluudhaaf gara mana isaatti yommuu deebi'e, Mikaal intalli Saa'ol isa simachuudhaaf gad itti baatee,<<Mootiin Israa'el har'a akka nama gatii hin qabnetti, utuu hin qaana'in ija xomboreewwan hojjetoota isaa duratti uffata isaa of irraa fuudhuudhaan ulfina attamii argate!>> jetteen.

²¹ Daawit immoo deebisee Mikaaliin,<<Ani ulfina Waaqayyootiif nan sirbe; inni abbaa kee fi sanyii abbaa keetii dhiisee, ani saba isaa Israa'elin akkan geggeessuuf na fo'ate; kanaaf gammadee ulfina Waaqayyootiif nan sirbe.

²² Ani kana caalaatti iyyuu of nan salphisa, gad deebi'uu koos ija kootiin nan arga; xomboreewwan ati waa'ee isaanii dubbatte kana biratti garuu, ani ulfina qaba>> jedhe.

²³ Mikaal intalli Saa'ol immoo utuu dhala hin godhatin in duute.