2 ሳሙኤል 10 - Macaafa Qulqulluu Afaan Oromoo

Daawit Amoonotatti Duuluu Isaa

¹ Takka turee mootiin Amoonotaa duunaan, Hanuun ilmi isaa mootii ta'ee iddoo isaa in bu'e*.

² Kana irratti Daawit,<<Nahaash abbaan isaa gaarummaa waan anatti argisiiseef, anis ilma isaa Hanuunitti gaarummaa nan argisiisa>> jedhee, waa'ee du'uu abbaa isaatiif akka isa jajjabeessaniif namoota itti in erge; namoonni Daawit erge gara biyya Amoon in dhufan.

³ Gurguddoonni biyya Amoon immoo Hanuun gooftaa isaaniitiin,<<Daawit namoota ergee si jajjabeessuu isaatiin abbaa keetiif ulfina kennuu isaa sitti fakkaataa>> Daawit mootummaa kee gara galchuudhaaf, akka isaan mandarattii keessa baraniif gaadchisiisuuf isaan erge mitii ree?>> jedhan.

⁴ Yommus Hanuun namoota Daawit erge sana qabsiisee, areeda isaanii walakkaa gar tokko irraa haadchisee, uffata isaanii mudaa muddiitti irraa cirsiisee isaan in ari'e.

⁵ Jarreen tokko waa'ee kanaa Daawititti in himan; Daawit immoo sababii yeelloo guddaan namoota sana irra ga'eef, hamma areedni isaanii bibbiqilee guddatuufitti Yerikoo turanii booddee akka galaniif dhaamsa isaanitti in erge.

⁶ Hanuunii fi warri Amoonotaa Daawitin akka of jibbisiisan yommuu hubatan, erganii mandara Bet-Rehoobii fi mandara Zobaatii loltoota Sooriyaa warra lafoo kuma digdama, mandara Xoobii namoota kuma kudha lama akkasumas immoo mootii Ma'akaa namoota isaa kuma tokko wajjin dugda in bitatan.

⁷ Daawit immoo kana yommuu dhaga'e, loltoota loluu danda'an hundumaa wajjin Yo'aabin in erge.

⁸ Warri Amoonotaa gad itti ba'anii karra mandara isaanii duratti loltoota isaanii tarree in galfatan; warri Sooriyaa, warri mandara Zobaatii fi Bet-Rehoobii dhufan, namoonni mandara Xoobii fi namoonni Ma'akaa mootichaa immoo kophaa isaanii bakkee keessa iddoo in qabatan.

⁹ Yo'aab fuula isaa duraa fi dugda isaa duubaan loltoonni akka isatti qophaa'an yommuu arge, loltoota Israa'el keessaa warra caalan fo'ee, warra Aaram rukutuudhaaf toora in galfate.

¹⁰ Warra kaan immoo obboleessi isaa Abiishaayi akka abboomu godhee, Amoonota akka lolaniif toora isaan in galche.

¹¹ Yo'aab yommus obboleessa isaatiin,<<Warri Aaram kun yoo anatti jabaatan, ati ana in gargaarta; warri Amoonotaa yoo sitti jabaatan immoo ani dhufeen si gargaara.

¹² Jabaadhu! Saba keenyaaf, mandaroota Waaqayyoo keenyaatiifis jabaannee in lolla! Waaqayyo immoo waan isa duratti gaarii ta'e haa hojjetu!>> jedhe.

¹³ Yommus Yo'aabii fi loltoonni isaa, warra Aaram loluudhaaf itti in qajeelan; warri Aaram garuu isaan duraa in baqatan.

¹⁴ Warri Aaram Yo'aab duraa baqachuu isaanii warri Amoonotaa yommuu argan, isaanis immoo Abiishaayi duraa baqatanii mandarattiitti ol in nam'an; Yo'aab kana irratti Amoonota loluu dhiisee, mandara Yerusaalemitti deebi'ee in gale.

¹⁵ Warri Aaram Israa'elootaan akka mo'aman yommuu argan, loltoota isaanii walitti in qabatan.

¹⁶ Hadaad-Ezer mootichi ergee warra Aaram warra laga Efraaxiis gama jiran in fichisiise; isaan kun Shofaak ajajaa loltoota Hadaad-Ezeriin geggeeffamanii iddoo <<Helaam>> jedhamu tokko in dhufan.

¹⁷ Daawit kana yommuu dhaga'e, loltoota Israa'el hundumaa walitti qabatee Yordaanosin ce'ee gara Helaam in dhaqe; warri Aaram immoo Daawititti qajeelanii loltoota isaanii toora galfatanii isa in lolan.

¹⁸ Haa ta'u iyyuu malee, isaan Israa'eloota duraa in baqatan; utuu isaan baqatanii Daawit warra konkolaataa ofan dhibba torba, lafoo kuma afurtama in ajjeese; akkasumas ajajaa loltoota isaanii Shofaakin in rukute, innis achumatti in du'e.

¹⁹ Mootonni warri harka Hadaad-Ezer jala turan, Israa'elootaan akka mo'aman yommuu argan, Israa'eloota araara gaafatanii isaanitti in bulan; yeroo sanaa jalqabanii warri Aaram deebi'anii Amoonota gargaaruu in sodaatan.