Yuda 1 - Mapangano Alomba 1923

¹ YUDA, kapolo wa Yesu Kristo na mkwaŵo wa Yakobo, kwa ŵala oitiwa, ŵotemweka mwa Mlungu Ŵata nosungiwa kwa Yesu Kristo:

² Lusungu kwanu na mtendere na chintemwa navupashiwa kwanu.

³ Mwaŵotemweka, penenzochita ntina yonse yomlemberani zyopuzumushi ula wa seo sonse, sinilekomlemberani nomchimulani kuulwila kosaŵeŵa mvwano uyo wipelekewa limo mpera kwa asanto.

⁴ Pakuti pali ŵambi ezyatika kofisika, ni ŵala eikiwa chomba ku upinguzi uyu, ŵantu asamlambila Mlungu, ŵosangusya chawanzi cha Mlungu wasu kuŵa lunkumbwa, nokana Mfumu yasu iri yeka na Asikuru Yesu Kristo.

⁵ Lomba nupangwomkumbusyani, chukanga muziŵilatu vintu vyonse, kuti Asikuru akapuzumusye mtundu wa ŵantu mcharo cha Egupto, pavuli pake eŵacheneka amene ŵala aliyomvwila.

⁶ Malaika naŵo amene aliyosunga ufumu waŵo, lomba esiya ulo waŵo ŵene, oŵasunga mnsinga zya chilalukile pa mfinzi ku upinguzi wa siku lila likuru.

⁷ Nga ni Sodoma na Gomorra na minzi yenzoizunguluka, yamene ilitwala tetyo nayo ku kachenche noila miŵili ya chilwendo, myuŵikiwira pasweta kuŵa chilangizyo, pakumvwa malangiwilo a mulilo wa kankalilo.

⁸ Chukanga teti aŵa soti tetila mkulota kwaŵo oififya miŵili, nosula vyokalonga, nosikula vyamchinzi.

⁹ Sembe Mikaelo malaika mkuru, pamene mkulwa na muŵepeki pechisusyana zya muŵili wa Musa, eyopomlimilila pa mlandu wosikula, lomba echiti, Asikuru nakutuzule.

¹⁰ Sembe aŵa osikula viri vyonse vyasaziŵa: na vyakuziŵa kavyalikwilo, nga ni vyopozewa viliye nzeru, muli ivi ni mwakuchenekeka.

¹¹ Shamo kwaŵo! pakuti enzoyenda mnjira ya Kaini, nolantamukira mmuluvyo wa Balamu ku chilambu, nolopa mntota ya Kora.

¹² Aŵa ni masase mviteŵeto vyanu vyotemwana pakulya namwe, achiŵeta oliŵeta paliye mwezo; mikumbi iliye manzi, yokankiwa na vinkuka; vimiti vya mmiundo viliye vyotwala, viliufwe kaŵiri, vyonyuliwa mizyu;

¹³ maŵingu a mchimana otenukatenuka, ŵoŵindula nsoni zyaŵo; ntandara zyonyukanyuka, zikusungiwa kuli zyeve kufipa kwa mfinzi mperampera.

¹⁴ Aŵa soti Enoki, wakasano na kaŵiri kuyambila pa Adamu, ni ŵechilosyera kuti, Ŵona, Asikuru echiza na mafwingomafwingo a ŵozila ŵake,

¹⁵ kuzoŵachitila ŵonse upinguzi, noŵakonwesya ŵonse ŵomsusya Mlungu ku milimo yaŵo yonse yamisusya yechichita kwa msusya, na vyonse vyokosa vyechimnenerako amisusya aipa.

¹⁶ Aŵa ni ŵong'ung'unzila, a makungule, ŵoyenda mwa malakalakilo ŵaŵo (na tunwa twaŵo tulaŵira vya mtunamilo), ŵochita malumbo a pa menso kuti ashukireko.

¹⁷ Sembe mweo, mwaŵotemweka, kumbukani malizu ŵala elaŵiriwa kale na apostolo a Asikuru wasu Yesu Kristo,

¹⁸ umo mwechimnenerani, Mnsita yosililila muze muŵe anchululila, ŵoyenda mmakumbwilo ŵaŵo amisusya.

¹⁹ Aŵa ni ŵochita mapatusyano, a mmuŵili, pasaŵa na Mzimu.

²⁰ Sembe mweo, mwaŵotemweka, polilunduluzya pa mvwano wanu wozila ngawo, na polomba mwa Mzimu Mtuŵa,

²¹ molisunga mchintemwa cha Mlungu, nololera chifundo cha Asikuru wasu Yesu Kristo cha ku moyo wa chilalukile.

²² Ŵambi ŵachitireni chifundo kati akakanganya;

²³ na ŵambi ŵapuzumusyeni, kwakwampula mmulilo; na ŵambi ŵachitireni chifundo noyopa, potinka chukanga mwinjira woyengeka na mindilizi ya mmuŵili.

²⁴ Lomba kuli uyo okumomchilingizyani mngakumbulwe, nompanamikani pakazanga pa mtupo wake muliye chilema mnseko yoyanga,

²⁵ kwa Mlungu ali yeka Mpuzumushi wasu, mwa Yesu Kristo Asikuru wasu, nakuŵe mchinzi, ukuru, vizo na nsaka, pepenzeve nsita zyonse, na lomba kumo, na ku virimika vyonse. Amen.