Tito 1 - Mapangano Alomba 1923

¹ PAULO, kapolo wa Mlungu, na mpostolo wa Yesu Kristo, mwa mvwano wa ŵosaluliwa a Mlungu na mkuviziŵisya vyendi vutwala ku ulambilo,

² mchigomezyo cha moyo wosasila, wamene wechizomerezya Mlungu, aliye wenye, pantanzi pa nsita ziliye potatikila;

³ sembe mnsita zyake eŵonesya lizu lake mu mbila, inisungikiwa mwa tetulo la Mlungu Mpuzumushi wasu;

⁴ kwa Tito, mwana wangu wendi wa mwa mvwano wa seo tonse: Chawanzi na mtendere kufumila kwa Mlungu Ŵata na Kristo Yesu Mpuzumushi wasu.

⁵ Chikomo choteti ni penimsiyani mKrete, chakuti muwamilizye visoŵa noŵika akuru mmizinda yonse, umo mnimuuzizyani;

⁶ kati muntu aliye mlandu, mulume wa mwanakazi umo, ana ŵana amvwano, ŵosasimikizyiwa kukuchenchemwa kano kuŵa viperemembe.

⁷ Pakuti askofu aŵekuŵa aliye mlandu, pakuŵa chisunga wa vya Mlungu; nte nzerunzyake, nte wa njarukila, nte chikungu, nte sipwerera, nte wa kaso kopamba;

⁸ sembe wa wanangwa, wotemwa viweme, wa mtima wolema, wolungama, mtuŵa mtima, wolilesya;

⁹ wolikatisya lizu lochetekereka la mmasambizyo, kuti akumochinsa mmayeruzyo ŵendi noŵakonwesya amisusya.

¹⁰ Chikomo pali ŵantu anyinji viperemembe, achibwatubwatu na achiluvisya, ngakongako ŵala a chisirimuko,

¹¹ amene ati aŵosinkiwa pakanwa; ŵantu opindimula milyango yamsuma, posambizya visawamila chikomo cha kaso kopamba.

¹² Umo wa ŵeve, muŵirizi waŵo ŵene, echiti, Akrete ni amambwepa mperampera, vilwani viipa, a mavumo voto.

¹³ Uyu untoni ni wendi. Chikomo choteti atuzulisyeni kozaza, aŵe a makosa mu mvwano,

¹⁴ asapulikana visimi vyatyala Vyoyuda, na mauzyilo a ŵantu opalukapo pa vyendi.

¹⁵ Kwa atuŵa vyonse ni vituŵa: sembe kwa ŵofifyiwa na asimvwa keka kantu kali katuŵa; sembe nzeru zyaŵo na chikumbutima chaŵo ni vyofifyiwa.

¹⁶ Osokolola pasweta kuti omziŵa Mlungu; lomba na milimo yaŵo omkana, pakuŵa atanta, na ammpuno, na ku milimo yonse iweme ŵokonwa.