Macitilo 5 - Mapangano Alomba 1923

¹ SEMBE muntu muyake zina lake Ananiya pamo na Safira mkazi wake esitisya chintu chaŵo,

² epungulapo chitema chake, mkazi wake ezomerezyana naye, eulapo chitwa nochiika mnkonde mwa apostolo.

³ Lomba Petro enena, Ananiya, nga Satana ezuzyiranji mtima wako kuti umpempenyeke Mzimu Mtuŵa, nopungulapo chitema cha ula munda?

⁴ Pewenze nawo kansi siwenze wako? positiwa siwenze pa mpamvu yako? Nga wipanga syani ichi mu mtima wako? uliyopempenyeka ŵantu sembe Mlungu.

⁵ Nipo Ananiya poŵamvwa malizu aŵa echiwa pansi efwilatu: naŵo ŵonse ŵechimvwa ŵechita mwezo ukuru.

⁶ Alumbwana naŵo eima, nomzeŵezya nomtwala kunja nomuŵika.

⁷ Nipo yenzepo tukapitepo nga ni tunsita tutatu mkazi wake eloŵa wosaziŵa icho chachitika.

⁸ Naye Petro emnenera, Uniuzye kati mwisitisya uyo munda ndalama mwakuti? Echiti, Inde, mwakuti.

⁹ Lomba Petro enena naye, Nga pamwazomerezyana kumuyezya Mzimu wa Asikuru? ŵona, makasa a aŵo ŵaika alume ŵako ali pa mulyango, akutwale nawe kunja.

¹⁰ Naye echiwa lombalomba mnkonde mwake efwilatu; na alumbwana poloŵa emfwanga wafwa, emtwala kunja nomuŵika pa alume ŵake.

¹¹ Chintente chikuru chiizila eklezya yamsuma na ŵonse amene ŵala echimvwa ivi.

¹² Nipo na manja a apostolo vichitiwa mu ŵantu viziŵikwilo na vizwezwe vinyinji; naŵo ŵonse enze na mtima umo mlukoro lwa Solomoni.

¹³ Sembe mwa ŵala ŵesalapo mwenzeve yeka umo ekaŵalala kulikungumizya kwaŵo: sembe maumba eŵachinzika;

¹⁴ naŵo ŵozomera eyangizyiwa kopulamo kwa Asikuru, winji wa analume na anakazi kumo,

¹⁵ chukanga mpakotwala kunja ku miseo alilwele, noŵalalika pa malili na pa visampi, kuti popita Petro chukanga chimvwirimvwiri chake chisitike umo wa aŵo.

¹⁶ Lilongana liumba nalo lofumila ku minzi yozunguluka Yerusalemi, eula ŵolwala na aŵo ŵozuzika na mizimu ya lunsa: naŵo ŵepoleshewa ŵonse.

¹⁷ Sembe mkuru wa ansembe eima na ŵonse ŵenze naye pamo (ni ŵa chipatuko cha Asaduki), ezula ukwa,

¹⁸ eŵakata apostolo noŵaika pomangiwa pa aipa.

¹⁹ Sembe malaika wa Asikuru ezulapo visasa vya kambolimboli usiku, efuma naŵo kunja echiti,

²⁰ Nkoyani, mkapaname mchipupilo nolaŵira ku ŵantu malizu ŵonse a Moyo uno.

²¹ Naŵo akamvwe eloŵa mchipupilo mmawa kukati ngwee, enzosambizya. Sembe mkuru wa ansembe echiza na aŵo ŵenze naye pamo, elonganika ansaka na akuru ŵonse a ŵana a Israeli, etuma malizu ku kambolimboli akuti aletewe.

²² Sembe manjolinjoli amene eyako aliyoŵafwanga mkambolimboli, ewereramo elulula

²³ echiti, Tafwanga kambolimboli kaluzale kazalilo na achilindila enzepeneme pa milyango: sembe pamene patazulapo taŵona muliye yeka umo.

²⁴ Lomba pamene mkuru wa chipupilo na akuru a ansembe pechimvwa malizu aŵa enzokanganya naŵo kwene kantu umo ichi mchiti chikulile.

²⁵ Nipo echiza chite eŵauzya kuti, Ŵonani, analume ŵala emwiika mkambolimboli ali mchipupilo alipeneme nosambizya ŵantu.

²⁶ Pamene apo echiya mkuru pamo na manjolinjoli, echiza naŵo koŵanasisya, pakuti eŵayopa ŵantu angaŵapozere myala.

²⁷ Naŵo akaze naŵo eŵaika pa nsaka ya milandu. Nipo mkuru wa ansembe eŵakonsha

²⁸ echiti, Timchimulisyani msasambizya mzina ili; lomba ŵonani, mwazuzya Yerusalemi na mayeruzyo ŵanu nosakotiziisya na mlopa wa uyu muntu.

²⁹ Sembe Petro na apostolo eyasuka echiti, Tommvwila Mlungu kupula ŵantu.

³⁰ Mlungu wa ausu wasu eusya Yesu wimwipaya nompachika pa chimuti.

³¹ Wamene uyo ni wechikwezeka Mlungu ku kwanja kwake kwendi aŵe Mfumu na Mpuzumushi koŵapa Israeli kulapa nolekelewa kwa viipa.

³² Nase nise ntoni zya ivi, na Mzimu Mtuŵa naye, wakuŵapa Mlungu amene ŵala ommvwila.

³³ Naŵo akamvwe echontewa mitima echiti aŵapaye.

³⁴ Lomba epanama pa nsaka muyake, Mfarisayo, zina lake Gamaliyeli, msambizi wa dango, wozila ku ŵantu ŵonse, epanga kuti afumye apostolo kunja kansita katonto.

³⁵ Enena naŵo, Mwaŵantu mwa Israeli, chenjerani na ŵantu aŵa umo mumti mchitire.

³⁶ Pakuti pantanzi pa nsiku zino eima Teuda elitumfya; wamene wechizomerezyana naye ŵantu ŵayake nga ni myanda ine: naye uyo epaiwa, naŵo ŵonse amene emmvwila eng'ondoka sechishiwa muntu.

³⁷ Pavuli pa uyu eima Yuda wa ku Galilaya pa nsiku zyolembewa ŵantu, ekokako ŵantu amkonke: uyo soti echenekeka, naŵo ŵonse amene emmvwila emwazika.

³⁸ Lomba nunena namwe, Patukanani naŵo ŵantu aŵa, ŵalekeni ŵene: pakuti kati nzeru iyi kano mulimo uyu vufuma ku ŵantu vize viwishiwe:

³⁹ sembe kati vufuma kwa Mlungu simti mkumeko kuviwisya; mngaŵoneke chukanga akulwa na Mlungu.

⁴⁰ Ŵeve ezomerezyana naye: nipo akaŵaite apostolo kwaŵo eŵakwapula noŵapanga kusalaŵira mzina la Yesu, noŵasuzula.

⁴¹ Teti eimapo pa menso pa nsaka nosangalala pakuti echishiwa ŵowamila kupuvuka pa mutu pa Zina ilo.

⁴² Naŵo nsiku zyonse mchipupilo na mmang'anda nteleka kusambizya noŵirizya kuti Yesu ni Kristo.