Macitilo 4 - Mapangano Alomba 1923

¹ PAMENE peŵenzolaŵira na ŵantu eŵazila ansembe na mkuru wa chipupilo na Asaduki,

² ŵefipa mitima pakuti enzoŵasambizya ŵantu noŵirizya mwa Yesu kuzyuka kwa akufwa.

³ Naŵo eŵakata eŵaika mkambolimboli mpaka mmawa mwake: chifukwa chenze chingulo.

⁴ Sembe anyinji a aŵo amene elimvwa lizu ezomera; popendewa kwaŵo analume enze nga ni myanda makumi asano.

⁵ Nipo yenzepo mmawa mwake elongana pamo mu Yerusalemi achiyeruzya ŵaŵo na akuruakuru na alombi;

⁶ Anna naye mkuru wa ansembe enzepo, na Kayata na Yohana na Alesandro na ŵonse amene enze pokwaŵo na mkuru wa ansembe.

⁷ Naŵo akaŵaike apo pakati ekonsha kuti, Pa mpamvu yanji kano pa zina lanji pemwichitira ichi?

⁸ Nipo Petro wozula Mzimu Mtuŵa enena naŵo, Mwachiyeruzya mwa ŵantu na mwakuruakuru,

⁹ kati seo siku lino tukonshewa zya mulimo uweme wa ku muntu wokomfuka, zyakuti epozyewa syani uyu muntu;

¹⁰ nakuziŵikwe na mweo monse na ku ŵantu ŵonse ŵa Israeli kuti mzina la Yesu Kristo Mnazarayo, wimwipachika, wamene wechiusya Mlungu kwa akufwa, mwa yeve ni mwalipeneme pano uyu muntu pa menso panu, ni wa makosa.

¹¹ Uyo ni mwala wipwazyiwa na mweo achimanga, wamene wichishiwa mutu wa mngondya.

¹² Paliye upuzumushi pa muyake: pakuti paliye zina limbi pansi pa mikumbi lopewa ku ŵantu lamene litingapuzumushiwe nalo.

¹³ Lomba pechiŵona mkanka wa Petro na Yohana noziŵa kuti enze ŵantu ŵosayeruzyiwa nopululila ezizwa; naŵo eŵaziŵa kuti ŵenzonkala pamo na Yesu.

¹⁴ Naŵo pomuŵona muntu epozyewa enzepeneme naŵo pamo ntenze nako kantu konena kosusya.

¹⁵ Sembe apo akaŵauzye kufumapo pa nsaka ya milandu ekonshana ŵeka

¹⁶ echiti, Tiŵachitenji ŵantu aŵa? pakuti kwaŵoneka ku ŵonse ŵonkala mu Yerusalemi kuti chiziŵikwilo choziŵikwa chichitiwa mwa ŵeve, nase sitingachikane.

¹⁷ Lomba chisaŵirikila soti mu ŵantu natiŵayofye kuti aleke kulaŵira mzina ili ku ŵantu ŵali ŵonse.

¹⁸ Nipo eŵaita eŵapanga kusalaŵira peka patonto kano kusambizya mzina la Yesu.

¹⁹ Sembe Petro na Yohana eyasuka eŵanenera, Pingulani mweo, kansi ni chiweme pa menso pa Mlungu kumvwila mweo kupula Mlungu:

²⁰ pakuti seo sitingalekolaŵira vila vitiŵona novimvwa.

²¹ Ŵeve pamene akaŵayofye soti eŵaleka ŵaye, posafwanga kantu koŵalanga nako, chifukwa cha ŵantu; pakuti ŵonse emchinzika Mlungu kwa icho chichitiwa.

²² Chikomo enze na vyaka kupula makumi ŵane uyo muntu wichichitiwira ichi chiziŵikwilo chopolesya.

²³ Naŵo akalekewe echiza kwa ayaŵo, elulula vyonse vyechinena naŵo akuru a ansembe na akuruakuru.

²⁴ Ŵeve apo pechimvwa etumpula malizu ŵaŵo kwa Mlungu na mtima umo echiti, Mfumu, mweo mwiumba lulezi na charo cha pansi na chimana na vyonse viri mwamene:

²⁵ amene mwa Mzimu Mtuŵa pakanwa pa ausu wasu Davide kapolo wanu mwichiti, Ni chinji a Mitundu pechichita chungululu, Na ŵantu kulukana vyatyala?

²⁶ Mafumu a mcharo elichamika, Na achiyeruzya elongana pamo, Kususyana na Asikuru na Kristo wake:

²⁷ pakuti lezee mmunzi muno mwechilongana Herode na Pontiyo Pilato pamo na a Mitundu na ŵantu a Israeli kumsusya Mlumbwana wanu mtuŵa Yesu wimwizoleka,

²⁸ kuchita viri vyonse vikwiikila katera kwanja kwanu na nzeru zyanu kuti viŵepo.

²⁹ Lomba, Asikuru, lolani malizu ŵaŵo ŵoyofya: ŵapeni ŵazya ŵanu kulaŵira lizu lanu kokaŵalala,

³⁰ pamene pamutambikizya kwanja kwanu kopolesya; kuti viziŵikwilo na vyozizwisya vichitiwe mzina la Mlumbwana wanu mtuŵa Yesu.

³¹ Naŵo akasenge pa malo pechilongana peteng'endeka; naŵo ŵonse ezula Mzimu Mtuŵa, elaŵira lizu la Mlungu na mkanka.

³² Winji wa aŵo ezomera wenze na mtima umo na moyo umo: yeka umo echiti kuti kantu ka ivyo vyenze navyo ni kake yeka; ŵenze navyo vyonse vyosanzya.

³³ Apostolo naŵo eŵonesya untoni waŵo na mpamvu ikuru wa mazyukilo a Asikuru Yesu: na chawanzi chikuru chenze pali ŵeve ŵonse.

³⁴ Pakuti mwa ŵeve mwenzeve mkavu: chikomo ŵonse enze nayo minda kano mang'anda evisitisya, ewera naŵo makweo a vila vyositisya

³⁵ eŵaika mnkonde mwa apostolo: naŵo emuyaŵira ali wonse nga ni umo mwechisoŵera.

³⁶ Nipo Yosefe wamene eitiwa na apostolo zina liyake Barsaba (ni kuti lolongosolewa Mwana wa mapuzisyo), Mulevi na mtundu wake ni Mkupro, pakuŵa na munda eusitisya, ewera nazyo ndalama zya wine noziika mnkonde mwa apostolo.