Macitilo 3 - Mapangano Alomba 1923

¹ PETRO na Yohana ŵenzokwera kuyoloŵa mchipupilo pa nsita yosengeramo, ni yakasano na kane.

² Naye muntu ngana wolemala chitatikile mvumo mwa anyina etwaliwa, wenzolalika nsiku zyonse pa mulyango wa chipupilo apo poitiwa Paweme, kuti asenge vyabule kwa aŵo oloŵa mchipupilo:

³ wamene uyu pechiŵona Petro na Yohana ŵesakoloŵa mchipupilo esenga apokeko vyabule.

⁴ Petro pomlolesisya pamo na Yohana echiti, Lola seo.

⁵ Naye eŵamvwila, elinga kuti apoke kantu kwaŵo.

⁶ Lomba Petro echiti, Ndalama zituŵa na zisweta niliye; sembe chamene chinili nacho nikupe. Mzina la Yesu Kristo Mnazarayo, yenda.

⁷ Naye emkata kwanja kwendi nomuusya: lombalomba vikandilo vyake na tunkombwa vitang'ishiwa.

⁸ Naye akanyotoke epanama noyamboyenda; eloŵa naŵo pamo mchipupilo enzoyenda noyanga nomlumba Mlungu.

⁹ Ŵantu ŵonse emuŵona oyenda nomlumba Mlungu:

¹⁰ emsingalwa kuti ni wamene uyo enzonkala nosenga vyabule pa Mulyango Paweme pa chipupilo: naŵo ezula mazuzu nozizwa pa icho champonera.

¹¹ Naye penzoŵakata Petro na Yohana ŵantu ŵonse eŵautukira pamo pa lukoro loitiwa lwa Solomoni kuzizwa kwene kantu.

¹² Petro naye akaŵone eŵayasuka ŵantu, Mwaŵantu mwa Israeli muzizwiranji pa uyu? mutilolesyeranji seo, nga ni pa mpamvu zyasu saŵene kano ulambilo wasu ni patamyendesya?

¹³ Mlungu wa Abrahamu na wa Isake na wa Yakobo, Mlungu wa ausu wasu, wamzizya Mwana wake Yesu; wamene wimwipeleka nomkana pa menso pa Pilato, apo pechiti ammangulule.

¹⁴ Namwe mwimkana Ula Mtuŵa na Wozila, nosenga kuti chipaya apewe kuli mweo,

¹⁵ nompaya Mwine wa moyo; wechiusya Mlungu kwa akufwa, wamene nase nise ntoni zyake.

¹⁶ Pochetekera zina lake zina lake lamkosesya uyu muntu umulola nomziŵa: inde, kuchetekera uko kuli mwa yeve ni kwampa kupola uku konse kwa mmuŵili pa menso pa mweo monse.

¹⁷ Lomba, akwasu, nuziŵa kuti mwichita teti tyala kosaziŵa, umo mwechichitira naŵo akuru ŵanu.

¹⁸ Mlungu evisilizya teti ivyo vyechilulula kale pakanwa pa ŵonse aŵirizi vyati azatamanishiwe navyo Kristo wake.

¹⁹ Teti molapa noyaruka soti kuti viipa vyanu vizimaizyiwe, kuti zize nsita zyosinsimuka kufumila pali Asikuru;

²⁰ soti kuti amtume Kristo uyo eikiwila kuli mweo, ni Yesu:

²¹ uiti yakupokera mikumbi mpaka nsita zyowamya soti vyonse, zyechinena Mlungu pakanwa pa aŵirizi ŵake ŵozila chitatikile popoza vyaro.

²² Ni chendi Musa enena, Asikuru Mlungu azampanamikileni muŵirizi mwa akwanu nga ni neo; wamene ni umti mze momvwila mvintu viri vyonse vyati azanene namwe.

²³ Kuze kuŵepo kuti wamoyo ali wonse ati azakane kummvwila ula muŵirizi azachenekewe kwene kantu mu ŵantu.

²⁴ Inde, aŵirizi ŵonse ŵala chitatikile pa Samwele na aŵo emkonka, amene ŵonse elaŵira, naŵo soti enena zya nsiku zino.

²⁵ Nimwe ŵana a aŵirizi ŵala na a mapangano ŵechipangana Mlungu na ausu wanu pechiti kwa Abrahamu, Pa mbuto yako ni peiti yoshukishiwa mikoka yonse ya mcharo cha pansi.

²⁶ Kutangulila pali mweo Mlungu akaimisye Mlumbwana wake emtuma kumshukisyani, pomkwentesyani muli monse pa viipa vyanu.