Macitilo 22 - Mapangano Alomba 1923

¹ AKWASU na ausu wasu, munimvwile panulikanila lomba kwanu.

² Naŵo akamvwe kuti elaŵira naŵo mChihebrayo epulamo nomyalala: naye echiti,

³ Ne nine Muyuda, wovyalikwa pa Tarso wa mKilikiya, sembe wolelewa mmunzi uno pa mendo a Gamaliyeli, woyeruzyiwa mwa misango yokosa ya dango la ausu wasu, wompimpilila Mlungu, nga ni mmulili mweo lero:

⁴ nane nenzoŵatamanisya a Njira iyi koŵapaya, noŵamanga noŵatwala mtumbolimboli analume na anakazi.

⁵ Naye mkuru wa ansembe soti anganichitire untoni, na nsaka yonse ya akuru, amene kwinipokera tulata kwaŵo kuya nato kwa akwaŵo; nane nichiya ku Damasko kuti nikaze naŵo ku Yerusalemi ŵomangiwa ŵala soti ŵenze kulakwa, kuti azalangiwe.

⁶ Lomba yenzepo penenzekuya nopanamila ku Damasko, nga ni zuŵa pa mutu, kovurumukizya kuŵala kukuru kwifuma kumulu nonisakatira.

⁷ Neo nichiwa pansi, nichimvwa lizu luninenera, Saulo, Saulo, unizuzyiranji?

⁸ Niyasuka, Nimwe ŵani, Asikuru? Naye eniuzya, Nine Yesu wa ku Nazarete uutamanya.

⁹ Aŵo ŵenze nane pamo ekuŵona chendi kuŵala, lomba aliyolimvwa lizu la uyo elaŵira nane.

¹⁰ Neo nichiti, Nichitenji, Asikuru? Asikuru eniuzya, Uka nkoya ku Damasko; kwamene kwati akakuuzye vyonse viikiwa uvichite.

¹¹ Pamene penenze wosaŵona na mchinzi woŵala kula nikunshiwa na manja a aŵo enenze naŵo nofwika ku Damasko.

¹² Lomba muyake Ananiya, wolambila kwa dango, wa mbili iweme kwa Ayuda ŵonse onkala kwamene,

¹³ enizila, epanama pali neo noninenera, Mkwasu Saulo, muŵone soti. Nane pamene pa nsita ila niŵinusya menso kumuŵona.

¹⁴ Naye echiti, Mlungu wa ausu wasu wamsalulani muziŵe chipangwilo chake, nomuŵona Ula Wolungama, na kumvwa lizu la pakanwa pake.

¹⁵ Pakuti mwakuŵa ntoni yake ku ŵantu ŵonse ya ivyo vimwiŵona novimvwa.

¹⁶ Lomba mulembukiranji? imani mabtiziwe, nosuka viipa vyanu, noita zina lake.

¹⁷ Nipo yenzepo kuti nikawerere ku Yerusalemi penenzosenga mchipupilo nikomoka,

¹⁸ nomuŵona yeve olaŵira nane, Puvyofuma mu Yerusalemi: chikomo sati amvwile kwako untoni wa neo.

¹⁹ Nane nichiti, Asikuru, ŵeve ŵeka oziŵa kuti niŵamanga mtumbolimboli noŵakwapula mma sunagoge ŵonse amene ŵala emzomerani:

²⁰ pewivwishiwa mlopa wa Stefano, ntoni yanu, nane nenzepo nozomerezyana naŵo nosunga nyula zya aŵo empaya.

²¹ Yeve eniuzya, Nkoya: pakuti nize nikutume kutali kwa a Mitundu.

²² Emteyera matu mpaka pa lizu ili; lomba etumpula malizu ŵaŵo na kuti, Chifumyeponi pa charo ichi choteti: pakuti sichuwamila kuŵa moyo.

²³ Penzokuwa ŵeve novula minjira yaŵo nofuntula lukungu,

²⁴ chilolo chiuzya kuti alovyewe mu linga, nonena kuti amkonshe na vitimbo, kuti chiziŵe chikomo chenzomkuwilila.

²⁵ Lomba akamkanze kwakuti akwapuliwe Paulo emnenera kenturiyo epanama pafupi, Kansi chuyana na dango kukwapula muntu Muroma kwa mangwazi?

²⁶ Naye kenturiyo akamvwe echiya ku chilolo nochiuzya kuti, Musakochitanji? pakuti uyu ni Muroma.

²⁷ Nipo chilolo chichiza nonena naye, Niuzye, kansi niwe Muroma? Echiti, Inde.

²⁸ Chilolo chiyasuka, Na ndalama zinyinji nisita neo wanoŵene uyu. Naye Paulo echiti, Sembe ne nine Muroma chivyalikwilo.

²⁹ Pamene apo ŵala ŵechiti timkonsinshe lomba pano emleka: na chilolo soti chiyopa, pechiziŵa kuti ni Muroma, na pakuti chammanga.

³⁰ Lomba mmawa mwake pechisakoziŵisya chikomo chechisimikizyiwa na Ayuda chimmangulula noŵauzya akuru a ansembe na ŵonse ansaka alongane; nacho chisika naye Paulo nomuŵika pa menso paŵo.