Macitilo 21 - Mapangano Alomba 1923

¹ LOMBA yenzepo kuti tikapatukane naŵo tiima mu wato nofwika malungalunga ku Kowo, na mmawa mwake ku Rode, kufumila kwamene ku Patara:

² lomba petifwangako wato wotaukira kuya ku Foinike tiloŵamo noimako.

³ Tikafwike poŵonekera Kupro tichisiya ku manzyere na kuya ku Suriya nofumamo mu wato pa Turo: pamene pechipangwa kutumpulula viya vya mu wine.

⁴ Lomba petiŵafwanga asambili tiswapo nsiku zisano na ziŵiri: naŵo emuuzya Paulo mwa Mzimu kuti asakandamo mu Yerusalemi.

⁵ Nipo yenzepo zikasile nsiku tiimapo na kuya ulwendo wasu; naŵo ŵonse na anakazi na ŵana ŵaŵo etipelekezya mnjira yasu mpaka petifuma mmunzi: nase tifukama pa chau nolomba

⁶ nolailana naŵo; nipo tiloŵa mu wato, sembe ŵeve ewerera kwaŵo.

⁷ Pamene tikasile ulwendo wofumila ku Turo tifwika ku Ptolemayi; nase tiŵalonjera akwasu noswako zuŵa limo.

⁸ Mmawa mwake tiima nofwika ku Kaisariya: tiloŵa mng'anda ya Filipo evangelisti, umo wa mwa asano na aŵiri ŵala, nonkala naye.

⁹ Lomba uyu muntu enze naŵo ŵana anakazi ŵane, mandola amene enzolosya.

¹⁰ Petinkalapo nsiku zinyinji echiza kufumila ku Yudaya muŵirizi muyake zina lake Agabo.

¹¹ Etizila, noula chikoŵe cha Paulo nolimanga mendo na manja na kuti, Mzimu Mtuŵa wanena teti, Ayuda a ku Yerusalemi akammange tetino mwine wa chikoŵe ichi, nomvumbula mmanja mwa a Mitundu.

¹² Tikamvwe ivi seo na a kwamene timpapatira asaya ku Yerusalemi.

¹³ Pamene apo Paulo eyasuka, Mulilanji nonififya mtima? pakuti nuliikira kaŵera nte kumangiwa kweka sembe soti kufwila pa Yerusalemi zina la Asikuru Yesu.

¹⁴ Nipo pechikanoŵetekewa tileka tichiti, Kupangwa kwa Asikuru nakuchitiwe.

¹⁵ Lomba pavuli pa masiku aŵa timangilatu viya vyasu na kuya ku Yerusalemi.

¹⁶ Echiya nase pamo asambili ŵambi a ku Kaisariya, notitwala kwa chite Mnaso wa ku Kupro, msambili wotatika, tikalale mnanda yake.

¹⁷ Lomba petifwika ku Yerusalemi akwasu etipokelela nosekelela.

¹⁸ Mmawa mwake Paulo eloŵa nase pamo kwa Yakobo; naŵo akuru ŵonse enzeko.

¹⁹ Pamene akaŵalonjere elulula chimochimo vintu vyechichita Mlungu mwa a Mitundu potumiki wake.

²⁰ Ŵeve akavimvwe emchinzika Mlungu, echiti kwake, Mkwasu, muŵona mawinji ali mwa Ayuda amene ozomera; na ŵonse olipimpizya dango:

²¹ naŵo euzyiwa zyanu zyakuti muyeruzya ŵonse Ayuda ali mMitundu kulekana na Musa, kwauzya asasirimula ŵana ŵaŵo kano kuyendayenda mwa misango ila.

²² Nga ni chinji nakale? ŵaŵamvwe ng'aleze kuti mwaza.

²³ Teti mchite ichi chitumuuzyani: Tiri naŵo analume ŵane amene elapa;

²⁴ ŵauleni aŵa, mkaliwamye naŵo pamo noŵalipilila kuti amete mpala: ninga ŵonse aziŵe kuti nte vyendi ivyo vyonse vyechimvwa vyanu; sembe kuti mweo mweka munkala paweme nolisunga dango.

²⁵ Lomba zya a Mitundu amene ozomera tilemba nopingula kuti aŵoleka vyopupila ku tulango na mlopa na vyonyongolola na kachenche.

²⁶ Pamene apo Paulo eŵaula ŵantu, lomba mmawa mwake akaliwamye naŵo pamo eloŵa mchipupilo, kuŵirizya chisilizyo cha nsiku zyoliwamya, mpaka peiti itiliwe nsembe ya aŵo ŵonse.

²⁷ Nipo nsiku izyo zisano na ziŵiri pezyenze pafupi nosila Ayuda a mu Asiya akamuŵone mchipupilo epyesya liumba lonse mitima nomkata

²⁸ nokuwa, Mwaŵantu a Israeli, tiyavyeni: Uyu ni muntu wosambizya ŵonse a mmalo monse kwasusya ŵantu na dango na malo ŵano: naye eloŵa naŵo Ahellene soti mchipupilo nofifya malo ŵano ŵozila.

²⁹ Pakuti emuŵona kale naye pamo mmunzi Trofimo wa ku Efeso, wechilinga kuti Paulo eloŵa naye mchipupilo.

³⁰ Nipo munzi wonse wiuka, na ŵantu ŵeutukira pamo: emkata Paulo nomkulila kunja kwa chipupilo: na lomba pano apa pa milyango pezaliwa.

³¹ Pamene penzosakompaya mbili imvwika ku chilolo cha mpingo yakuti mu Yerusalemi monse muli kapiringupiringu.

³² Lombalomba chiula manjolinjoli na akenturiyo noŵasikila luŵilo: naŵo akaŵone chilolo na manjolinjoli elekomnyata Paulo.

³³ Pamene apo chilolo chikapanamile chimkata nopanga kuti amangiwe na manjerenjende aŵiri; chikonsha, Ni ŵani uyu; wachitanji kansi?

³⁴ Nipo ŵambi ekuwa chakuti, ŵambi chakuti, mliumba: nacho pechipukapuka na chiwawa chisuzula kuti aze naye mu linga.

³⁵ Akaze pa makwerero yenzepo kuti etwaliwa na manjolinjoli chikomo chomkaŵizya liumba;

³⁶ pakuti fwingo la ŵantu likonka kuvuli nokuwa, Mfumyeponi.

³⁷ Pamene Paulo penze pafupi nouliwa mu linga echinenera chilolo, Nilaŵire namwe. Chichiti, Kansi uziŵa Chihellene?

³⁸ Kansi ntewe Mwegupto wamene kale pala witwangisya notangulila ku malambo Achipaya ŵala myanda makumi ŵane?

³⁹ Sembe Paulo echiti, Nine Muyuda, wa ku Tarso wa mKilikiya, mwanoŵene wa munzi womvwika: numpapatirani munizomezye nilaŵire na ŵantu aŵa.

⁴⁰ Pamene chikamzomezye Paulo epanama pokwerera, echeuzya na kwanja ku ŵantu; lomba pepenze kachetechete kakuru elaŵira naŵo mchilaŵiro cha Ahebrayo echiti,