Macitilo 17 - Mapangano Alomba 1923

¹ LOMBA akapule pa Amfipoli na Apolloniya efwika ku Tessalonika, kwenze sunagoge la Ayuda:

² naye Paulo umo mwechiyoŵerera eloŵa mwaŵo nokonshana naŵo zya malembo masabata atatu,

³ kosokolola nonenesya kuti kwimkanga Kristo kulekotamana nozyuka soti kwa akufwa, echiti, Uyu Yesu unumuŵirizizyani ni Kristo.

⁴ Pamene apo ŵambi aŵo eŵetekewa nosanzyana naŵo Paulo na Sila, na mwa Ahellene ŵolambila winji ukuru na mwa anakazi ŵoziŵikwa nte ŵopendeka.

⁵ Sembe Ayuda pochita tima eliulira achinkande ŵambi aipa, nolonganika fwingo nousya chiwawa mmunzi: esimukira ku ng'anda ya Yasoni nosaka kwafumizya kunja ku ŵantu.

⁶ Pamene paliyoŵafwanga emkwekwesyera Yasoni na ŵambi akwaŵo pakazanga pa akuru a mmunzi ekuwa, Aŵa ŵoyaruzya charo chonkalamo ŵantu ŵaza kuno soti;

⁷ amene Yasoni ŵapokelela: naŵo aŵa ŵonse ochita vyosusya matetulo a Kaisari ponena kuti pali mfumu iyake, ni chite Yesu.

⁸ Naŵo etamanya liumba na akuru a mmunzi pechimvwa ivi.

⁹ Nipo akaule chikole kwa Yasoni na ayake eŵamangulula.

¹⁰ Lomba pano akwaŵo eŵasuzula Paulo na Sila usiku kuya ku Bereya: amene akafwikeko eloŵa msunagoge la Ayuda.

¹¹ Lomba aŵa ŵantu ŵenze awanangwa kupula ŵala a mTessalonika, polilondera lizu na mitima ya kasampu noŵasandasanda malembo nsiku zyonse kati ivi ni vyendi.

¹² Teti anyinji a aŵo ezomera, na mwa anakazi Ahellene ŵomvwika na mwa analume nte ŵopendeka.

¹³ Sembe Ayuda a ku Tessalonika akamvwe kuti lizu la Mlungu luŵirizyiwa na Paulo pa Bereya soti, naŵo kumo ezako, nopyesya liumba mitima nolitamanya.

¹⁴ Pamene apo akwaŵo emsuzula Paulo kuya mpaka ku chimana: sembe Sila na Timoti ni ŵesalako.

¹⁵ Ŵeve empelekezya Paulo echiya naye mpaka ku Atene: nipo akauzyiwe kwa Sila na Timoti kuti ayendesye kumzila eimako.

¹⁶ Lomba penzoŵalindila pa Atene Paulo echipya mtima pechiuŵona munzi wozula tulango.

¹⁷ Teti ni penzosusyana msunagoge na Ayuda na ŵantu ŵolambila, na mmansaka nsiku zyonse na ŵala emchinguzya.

¹⁸ Ŵambi soti a Epikuro na a Stoiki ŵoyeruzyana vya nzeru esusyana naye. Ŵambi ŵechiti, Nga chiŵereŵeta uyu osakonenanji? ŵambi, Oŵoneka kuŵa mbilizi ya viŵanda vya chilwendo: pakuti eŵirizya Yesu na mazyukilo.

¹⁹ Emkata nomkwekwesyera ku Areopagi echiti, Natiziŵe mayeruzyo aŵa alomba ŵonenewa nawe ni vinji?

²⁰ Chikomo uŵamvwisya matu ŵasu vya chilwendo: ni patusakoziŵa mfundo yake ivi.

²¹ (Lomba ŵonse a ku Atene na alwendo ŵonkalapo palapa ntenzochenjerekwa na kantu konse sembe kutomola kano kumvwa chalomba.)

²² Lomba Paulo epanama apo pakati pa Areopagi echiti, Mwantumwe a ku Atene, mvyonse nuŵona kuti nimwe ŵolambilisya.

²³ Pakuti penenzopita nololesya vyamulambila nifwanga soti popupila palulembewe malizu aŵa, KWA MLUNGU WOSAZIŴIKWA. Teti chimulambila kosaziŵa chamene ichi ni chinumsokololelani.

²⁴ Mlungu wamene evipoza vyaro na vyonse virimo, pakuŵa Mwine wa kumulu na pansi, ntonkala mvipupilo vuchitika na manja,

²⁵ kano kutumikiliwa na manja a ŵantu, nga ni wosoŵelwa kantu, pakuti mwine oŵapa ŵonse moyo na mpuye na vintu vyonse.

²⁶ Naye eichisya umo mitundu yonse ya ŵantu kuti ankale pa chinso chonse cha charo, akaŵaikile nsita zya chipango na mipaka yonkazikika kwaŵo;

²⁷ kuti amsakesake Mlungu, angampampansile kaya nomfwanga, chukanga ntali patali na seo sonse:

²⁸ pakuti mwa yeve ni mtiri moyo noyendayenda na kuŵa nawo unkalo wasu; nga ni mvinenera vimbi vilimbi vyanu, Pakuti nase nise ŵana ŵake.

²⁹ Teti patiri ŵana a Mlungu tisalinga kuti Umlungu upalana na chera chisweta kano chituŵa kano mwala, vyoyengayenga na luso na milingo ya ŵantu.

³⁰ Teti nsita zyopululila Mlungu ezilumpila; sembe lomba oŵapanga ŵantu kuti ŵonse a mmalo monse ayaruke mitima:

³¹ chikomo aluŵike siku lati azapingulilemo charo chonkalamo ŵantu pa chilungamo mmuntu wechisalula; naye eŵapa ŵonse chiziŵikwilo chake pechimuusya yeve kwa akufwa.

³² Lomba pechimvwa zyouka kwa akufwa ayake eseka pwipwiti; sembe ayake echiti, Tize timmvweni soti zya ichi.

³³ Teti Paulo eimapo pakati paŵo.

³⁴ Sembe ŵambi esungana naye nozomera: mwa aŵa soti mwenze Diyonusiyo wa ku Areopagi, na mwanakazi zina lake Damari, na ŵambi pamo naŵo.