Macitilo 16 - Mapangano Alomba 1923

¹ EFWIKA soti ku Derbe na Lustra: nipo ŵonani, enzeko msambili chite zina lake Timoti, anyina ni Muyuda wozomera, sembe awisi ni Muhellene.

² Wamene uyu enze na mbili iweme mwa akwaŵo a pa Lustra na Ikoniya.

³ Paulo epangwa aye naye pamo; emuula nomsirimula chikomo cha Ayuda a mdera ilo: pechiziŵa ŵonse kuti awisi ni Muhellene.

⁴ Naŵo penzekuya nopita pa minzi eŵapa matetulo aŵasunge, ŵechipingula apostolo na akuruakuru a pa Yerusalemi.

⁵ Teti maeklezya etang'ishiwa mu mvwano noyangizyiwa poŵapenda nsiku na nsiku.

⁶ Ŵeve ŵepula pa chitwa cha Frugiya na Galatiya, peleshewa na Mzimu Mtuŵa kuti asalilaŵira lizu mu Asiya;

⁷ naŵo akateezyane na Musiya esaka kuya ku Bituniya, na Mzimu wa Yesu nteŵazomezya;

⁸ lomba polambalala pa Musiya esikila ku Trowa.

⁹ Pamene apo mensompenya emuŵonekera Paulo usiku; Enzepo muntu wa ku Makedoniya enzepeneme kumpapatila kuti, Taukirani kuno ku Makedoniya mze mtiyavye.

¹⁰ Naye akaŵone mensompenya lomba pano tisakoimapo kuya ku Makedoniya, tichiti Mlungu watiita kuyoŵaŵirizyira ŵeve evangelo.

¹¹ Teti tikaimeko ku Trowa mu wato tichiya malungamanya ku Samotrake, na mmawa mwake ku Neapoli;

¹² kwitiimila nofwika ku Filipi, munzi wa mMakedoniya, ukuru wa mdera lila, mpunda wa Roma: nase tiswamo mmunzi umo masiku ŵambi.

¹³ Zuŵa la sabata tiima kuya kunja kwa linga mmbali mwa kamana mwitilinga ni mwenze mosengera; tinkala pansi nolaŵira na anakazi aŵo elongana.

¹⁴ Etimvwa umo mwanakazi zina lake Ludiya, wositisya kaniki, wa ku munzi wa Tuwatira, womlambila Mlungu: wechizula Asikuru mtima wake ateye matu ku vinenewa na Paulo.

¹⁵ Naye akabatiziwe na chiŵanza chake etipapatira kuti, Kati mwalinga nine wozomereka kwa Asikuru izani mng'anda mwangu nonkalamo. Naye etiyumilizya.

¹⁶ Nipo yenzepo petenzekuya ku malo kosengera etichinzya msimbi ngana ana mzimu wompanda, enze kwayomberamo asikuru ŵake zinyinji pompanda wake.

¹⁷ Wamene uyu ekonka Paulo na seo nokuwa kuti, Aŵa na akapolo a Mlungu wa Kumulu ngako, omuŵirizizyani njira yopuzumushi.

¹⁸ Naye echita teti nsiku zinyinji. Sembe Paulo pokwinyilila echeuka nounenera mzimu, Nukuuzya mzina la Yesu Kristo fumamo mwake. Nawo wifuma kansita kamene kala.

¹⁹ Lomba asikuru ŵake apo akaŵone kuti choyomberamo kwaŵo chasila ekata Paulo na Sila noŵakwekwesyera ku nsaka kwa akuru;

²⁰ naŵo akaze naŵo kwa achipingula echiti, Aŵa ŵantu pakuŵa Ayuda otamanya munzi wasu,

²¹ noyeruzya misango itisawamila kuipokera kano kuisunga patiri Aroma.

²² Nipo liumba liŵaukira pamo: na achipingula eŵakezulila minjira yaŵo nopanga kuti anyatiwe na minkuru.

²³ Nipo akaŵanyate vitimbo vinyinji eŵapoza mkambolimboli, nomuuzya chilindila kwasungisya:

²⁴ wamene akamvwe tetulo ilo eŵapoza mchipinda cha kuntambo noŵamanila mendo ŵaŵo mu lupanda.

²⁵ Lomba nga ni pakati posiku Paulo na Sila enzosenga noimbila Mlungu nzimbo, na ŵomangiwa enzoŵamvwa.

²⁶ Kovurumukizya kwenze kuteng'endeka kukuru kwa charo, tetyo makumbililo a kambolimboli ni pechisung'unzikiwa: lomba pano visasa vyonse vizuliwa, na vyomangira vya ŵonse vimanguluka.

²⁷ Chilindila naye akaushiwe mtulo twake noŵona visasa vya kambolimboli vyazuliwa esolola chinkalammanja chake, echiti alipaye polinga kuti ŵomangiwa autuka.

²⁸ Sembe Paulo ekuwisya echiti, Usalilasa: pakuti tonse tiri muno.

²⁹ Nipo eita misaniko eutukiramo, echita chintente noŵafukamila Paulo na Sila,

³⁰ eŵafumya kunja nonena, Mwantumwe, nichitenji kuti nipulukwe?

³¹ Ŵeve ŵechiti, Zomera pa Asikuru Yesu, ninga wopulukwa, weo na chiŵanza chako.

³² Naŵo elaŵira naye lizu la Asikuru, na kwa aŵo a pa chiŵanza chake.

³³ Nipo eŵaula nsita yamene yosiku, noŵasuka mikovu yaŵo, nobatiziwa lomba pano yeve na ŵake ŵonse.

³⁴ Eloŵa naŵo mng'anda mwake noŵateŵetera vilyo, nosangalala kwene kantu pamo na chiŵanza chake chonse pomzomera Mlungu.

³⁵ Nipo kukache achipingula etuma akatembwe echiti, Mkaŵamangulule aŵo.

³⁶ Chilindila emkundululila Paulo malizu amene aŵa akuti, Achipingula atituma kuti timmangululeni: teti lomba fumani, nkoyani mtende.

³⁷ Sembe Paulo enena naŵo, Etinyata pasweta kwa mangwazi, se nise Aroma, notipoza mkambolimboli; kansi lomba atifumye tyala kunsei? yai mwandi; lomba naaze ŵeka nofuma nase pamo.

³⁸ Nipo akatembwe eŵakundululila achipingula malizu aŵa: naŵo eyopa pechimvwa kuti na Aroma;

³⁹ echiza noŵapapatira; naŵo akaŵafumye eŵasenga kuti aimepo pa munzi.

⁴⁰ Ŵeve efuma mkambolimboli, noloŵa mwa Ludiya: lomba akaŵone akwaŵo eŵamyalalika noimapo.