Macitilo 14 - Mapangano Alomba 1923

¹ NIPO yenzepo pa Ikoniya kuti ŵeloŵa pamo msunagoge la Ayuda nolaŵira tetyo, ni pewizomera mpingo ukuru wa Ayuda na Ahellene.

² Sembe Ayuda ŵosamvwila evundula mitima ya a Mitundu noŵaipilisya na akwaŵo.

³ Teti enzonkala nsita ikuru nolaŵira kokaŵalala mwa Asikuru, wamene elichitira untoni lizu la chawanzi chake, wakupa viziŵikwilo na vyamazuzu vichitike na manja ŵaŵo.

⁴ Sembe mpingo wa mmunzi wipatukana; chitwa chilemelela kwa Ayuda, chitwa kwa apostolo.

⁵ Nipo pechiŵasimukira a Mitundu na Ayuda pamo na akuru ŵaŵo kwamvwisya vyankanza noŵapozera myala

⁶ ŵeziŵa noutukira ku minzi ya Lukaŵoniya na Lustra na Derbe na ku chitwa chozunguluka:

⁷ kwamene kwechiŵirizya evangelo.

⁸ Pa Lustra penzenkezi chite womyalala mmendo notendeŵala chivyalikwilo mvumo mwa anyina, aliyoyenda nsita zyonse.

⁹ Wamene uyo emumvwa Paulo enzolaŵira: wamene emlolesisya, eŵona kuti enze na mvwano wopozyewa nawo,

¹⁰ echiti na malizu akuru, Panama ulungame na mendo ŵako. Naye enyotoka noyenda.

¹¹ Maumba naŵo akaŵone chachita Paulo etumpula malizu enena mchilaŵiro cha Lukaŵoniya, Milungu yatisikila mchipazyo cha ŵantu.

¹² Naŵo emteya Barnaba Zeu, na Paulo Herme, pakuti enze mkuru wolaŵira.

¹³ Naye wansembe wa Zeu, chipupilo chake chenzoteezyana na munzi uyo, echiza nazyo ng'ombe na nkata zya maluŵa ku vilyango, esakopupa nsembe pamo na maumba.

¹⁴ Sembe apostolo Barnaba na Paulo akamvwe epezula minjira yaŵo, elumpa noutukira mu ŵantu nokuwa

¹⁵ kuti, Mwantumwe, muchitiranji ivi? Nase nise ŵantu a unkalo umo na mweo, nomleterani nkani ziweme, zyakuti mfutatire ivi vyatyala nochungulukira Mlungu wamoyo, epoza vya mlulezi na vya pansi na chimana na vyonse virimo:

¹⁶ wamene mmaluko akale enzozomezya a mitundu yonse kuyenda mnjira zyaŵo ŵene.

¹⁷ Chukanga teti aliyolisiira aliye untoni, pechichita viweme nompani mvula na nyengo zyakupya vintu kufumila kumulu, nozuzya mitima yanu vyakulya na chimwemwe.

¹⁸ Polaŵira teti esunzyiwa poŵalesya maumba asaŵatilila ŵeve nsembe.

¹⁹ Pamene apo ezako Ayuda kufumila ku Antiyokiya na Ikoniya: eŵaŵenzya maumba nompozera myala Paulo nomkulira kunja kwa linga, echiti wafwa.

²⁰ Sembe penzomzinga asambili eima noloŵa mmunzi: na mmawa mwake efuma pamo na Barnaba kuya ku Derbe.

²¹ Naŵo akaŵirizye evangelo ku munzi uyo nochisya anyinji asambili ewerera ku Lustra na ku Ikoniya na ku Antiyokiya,

²² kukosesya mitima ya asambili noŵachimula kunkalave mu mvwano, echiti topita mmazuzyo anyinji kuyoloŵa mu ufumu wa Mlungu.

²³ Nipo akaŵasintilile manja akuru mu eklezya iri yonse, nosenga nolitana vilyo, eŵasungisya kwa Asikuru wechizomera.

²⁴ Naŵo epula pa Pisidiya nofwika ku Pamfuliya.

²⁵ Akalilaŵire lizu mPerga esikila ku Attaliya;

²⁶ kwamene kwechiimila na kuya mu wato ku Antiyokiya, kwechisungikiwa kale ku chawanzi cha Mlungu ku mulimo uyo wechisilizya.

²⁷ Apo akafwike nokusa a mu eklezya ekundulula vyonse vyechichita Mlungu naŵo pamo, umo mwechizulila a Mitundu pa mulyango pozomera.

²⁸ Naŵo enzonkala nsita ikuru kwa asambili aŵo.