Macitilo 1 - Mapangano Alomba 1923

¹ MWE Teofilo, nilemba malizu ŵala ŵoyamba a vyonse vyechitatika Yesu kuchita nosambizya,

² mpaka siku lilala lyechiuliwa kuya kumulu, pamene akaŵati peni tetulo mwa Mzimu Mtuŵa apostolo aŵo ŵechisalula:

³ kwechililangizya soti wamoyo pavuli potamana kwake na maziŵikwilo anyinji, kwaŵonekera pambipambi masiku makumi ŵane, nolaŵira vyofumu wa Mlungu:

⁴ naye polongana naŵo pamo eŵapanga kusafuma mu Yerusalemi, sembe kuchilindila chipango cha Awisi, chamene chechiti mwichimvwa kuli neo:

⁵ pakuti Yohana enzobatiza chendi na manzi, sembe mweo mze mbatiziwe na Mzimu Mtuŵa pakaliyopitapo masiku anyinji.

⁶ Naŵo akalongane emkonsha echiti, Asikuru, kansi makono muwezezya Israeli ufumu?

⁷ Enena naŵo, Nte kuli mweo kuziŵa nsita kano tumfunda twechiikilatu Ŵata popinguzi wa yeka.

⁸ Sembe mweo mze mpokere mpamvu apo pati amzileni Mzimu Mtuŵa: namwe muŵekuŵa ntoni zyangu mu Yerusalemi na pa Yudaya ponse na pa Samariya na ku malekezyo a patali a mcharo.

⁹ Naye akanene ivi peŵenzololesya euliwa kuya kumulu, na mkumbi wimpokera kumfisa mmenso mwaŵo.

¹⁰ Nipo pamene peŵenzopangama kumulu penzekuya yeve, ŵonani, analume aŵiri epanama pafupi naŵo na vyovwala vyenze mbuu:

¹¹ amene echiti, Mwaŵantu a ku Galilaya, mupanamiranji kulolesya kumulu? uyu Yesu wamene wauliwa kwanu kuya kumulu azawere tetyo nga ni mmwamuŵonera akuya kumulu.

¹² Pamene apo ewerera ku Yerusalemi kufumila ku lupiri luitiwa lwa Elaya, ilo liri pafupi na Yerusalemi msinzo woyenda siku la sabata.

¹³ Naŵo akaloŵemo ekwera ku chipinda cha pamulu kwamene kwenzonkala, Petro na Yohana na Yakobo na Andreya, Filipo na Tomaso, Bartolomayo na Mattayo, Yakobo mwana wa Alifayo, na Simoni Zelote, na Yuda mwana wa Yakobo.

¹⁴ Aŵa ŵonse ŵenzokoselela kulomba na mtima umo, pamo na anakazi, na Mariya anyina a Yesu, na akwaŵo.

¹⁵ Pa masiku ŵala Petro epanama pakati pa akwaŵo (penze liumba la ŵantu loungana, nga ni mwanda na makumi aŵiri) echiti,

¹⁶ Mweo akwasu, kwiwamila kuti malembo aŵo asilizike ŵechinenera futira Mzimu Mtuŵa pakanwa pa Davide a Yuda, enze nsuluzi ya aŵo emkata Yesu.

¹⁷ Pakuti ependewa muli seo nopokera chitwa chake potumiki uyu.

¹⁸ Lomba uyu elilondera ulo na chilambu choifya kwake; naye echiwa uvuname, epulika vumo na mala ŵonse fwenye.

¹⁹ Ichi chenzoziŵikwa ku ŵonse enzonkala pa Yerusalemi, tetyo pa munda pala ni pepeitiwa mchilaŵiro chaŵo Akeldama, ni kuti Munda wa mlopa.

²⁰ Pakuti kwilembewa mbuku la Masalmo, Ponkala pake napaŵe pa chiza, Asankalapo muntu pamene pala: soti, Uchilolesya wake nauule muyakene.

²¹ Teti ni chiweme kuti tipyanike umo wa aŵa eyanjana nase nsita yonse yenzoloŵa Asikuru Yesu nofuma pali seo,

²² kutatikila pobatizo wa Yohana mpaka siku lila lyechiuliwa kwasu kuya kumulu, kuti uyu aŵekuŵa ntoni yozyuka kwake pamo na seo.

²³ Naŵo eika aŵiri, Yosefe woitiwa Barsaba, zina lake liyake Yusto, na Mattiya.

²⁴ Nipo elomba echiti, Mwe Mlungu, muziŵa mitima ya ŵonse, langizyani mwa aŵa aŵiri umusalulapo ni ŵani,

²⁵ kupyana mu utumiki uyu nopostolo, wechipontera Yuda nopatukamo, aye ku malo ŵa yeka.

²⁶ Naŵo epoza mlondola pali ŵeve; na mlondola echiwa pa Mattiya, naye ependewa pamo na ŵala kumi na umo apostolo.