Luka 1 - Mapangano Alomba 1923

¹ PAKUTI anyinji elikatizya kulongosola nolemba vintu vila visilizika muli seo,

² nga ni umo mwechitipera ŵala ŵenze ntoni na atumiki a lizu chitatikile pa chiyambi,

³ kwaniwamila nane soti, pakuti nikonkolola vyonse kosaluvya kuyambila potatika, kumlemberani mvukonkelana, mwe Teofilo ŵozila;

⁴ kuti moziŵisya kosakaika malizu ŵala emwiyeruzyiwa naŵo na pakanwa.

⁵ ENZEPO pa masiku a Herode, mfumu ya Yudaya, wansembe ngana zina lake Zakariya, wa chiŵanza cha Abiya: enze na mwanakazi wa mwa ŵana a Arone, na zina lake ni Elizabeti.

⁶ Naŵo ŵonse aŵiri ŵenze ŵolungama pa menso pa Mlungu noyendayenda mmatetulo ŵonse na madango a Asikuru kosaifya.

⁷ Naŵo ŵenzeve mwana, pakuti Elizabeti enze chumba, naŵo ŵonse ŵenze ŵokota.

⁸ Lomba yenzepo kuti penzochita mulimo wonsembe pa menso pa Mlungu peyenze nsita yopokerana ya chiŵanza chake,

⁹ umo muwenzele msango wa mulimo wonsembe, mlondola wimponera kuti aloŵe mchipupilo cha Asikuru noshoka vyonunkila.

¹⁰ Winji wonse wa ŵantu wenzolomba panja pa nsita ya vyonunkila.

¹¹ Nipo emuŵonekera malaika wa Asikuru, enzepeneme dera la kwanja kwendi la popupila vyonunkila.

¹² Naye Zakariya emwazika mtima pechiŵona, na mwezo wimponera.

¹³ Sembe malaika wa Asikuru emuuzya, Usayopa, Zakariya: pakuti mapapatiro ŵako omvwika, na mkazi wako Elizabeti azakuvyalire mwana wa mwanalume, nawe uzomteye zina lake Yohana.

¹⁴ Uzoŵe na nseko na chimwemwe, na anyinji azatemwe povyalikwa kwake.

¹⁵ Pakuti azaŵe mkuru pa menso pa Asikuru, sati amwe mvinyu na chokolwesya; naye azazule Mzimu Mtuŵa chitatikile mvumo mwa anyina.

¹⁶ Anyinji a ŵana a Israeli azaŵayarusyire kwa Asikuru Mlungu waŵo.

¹⁷ Naye azamtangulile mu mzimu na mpamvu ya Eriya, kuiyarusyira mitima ya ausu waŵo ku ŵana, na asimvwa kuti ayende mnzeru zya ŵolungama; kumuŵikilatu Asikuru mtundu wowamizyiwira kaŵera.

¹⁸ Naye Zakariya enena na malaika, Nichiziŵe tyani ichi? panili mkote na mkazi wangu ni wokota.

¹⁹ Malaika eyasuka emnenera, Ne nine Gabriyeli nupanama pa menso pa Mlungu; natumiwa kulaŵira nawe nokuletera makani aŵa aweme.

²⁰ Ŵona, uŵe cherere wosakumolaŵira mpaka siku lila liviti vize vichitike ivi, pakuti uliyozomere malizu ŵangu, amene ati asilizike pa nsita yake.

²¹ Ŵantu enzomlindila Zakariya, naŵo ezizwa pechichelwa mchipupilo.

²² Lomba akafume yeve sekumolaŵira naŵo: naŵo eziŵa kuti waŵona mensompenya mchipupilo: naye ekoselela eŵacheula nonkala cherere.

²³ Nipo yenzepo apo akasile masiku otumiki wake eima echiya kwake.

²⁴ Lomba akasile masiku aŵa Elizabeti mkazi wake emita vumo, naye elifisa myezi isano echiti,

²⁵ Asikuru enichitira teti mmasiku ŵechiniloleramo, kufumyapo nsoni zyangu ku ŵantu.

²⁶ Lomba pa mwezi wakasano na umo etumiwa malaika Gabriyeli na Mlungu ku munzi wa mGalilaya zina lake Nazarete,

²⁷ ku virgo wotaniliwa na mwanalume zina lake Yosefe, wa chiŵanza cha Davide; na zina lake virgo ni Mariya.

²⁸ Eloŵa mwake nonena, Timuŵoneni, mweo mwa chisomo, Asikuru ali namwe pamo.

²⁹ Sembe yeve evukuma mtima ngako pa lizu ili, nolingalinga zya malonje aŵa ni vinji.

³⁰ Lomba malaika enena naye, Msayopa, Mariya: pamwachitika wa chisomo kwa Mlungu.

³¹ Ŵonani, mze mmite mvumo lanu novyala mwana mwanalume, nomteya zina lake YESU.

³² Azaŵe mkuru noitiwa Mwana wa Ula wa Kumulu ngako: na Asikuru Mlungu azampe chilimba cha awisi Davide:

³³ naye azaŵe mfumu pa chiŵanza cha Yakobo maŵeromaŵero, nofumu wake uzoŵe wosasila.

³⁴ Mariya enena na malaika, Ichi chiŵe syani, panisaziŵa mwanalume?

³⁵ Malaika eyasuka emuuzya, Mzimu Mtuŵa amzileni, na mpamvu ya Ula wa Kumulu ngako imsitikeni: tetyo soti uyo ati azavyalikwe azaitiwe wozila, Mwana wa Mlungu.

³⁶ Ŵonani, Elizabeti mkwanu naye soti ana vamo la mwana mwanalume pokota kwake: uyu ni mwezi wakasano na umo kuli yeve enzoitiwa chumba.

³⁷ Pakuti palive lizu lofumila kwa Mlungu liti losoŵa mpamvu.

³⁸ Naye Mariya echiti, Ŵonani, chituntulu cha Asikuru; nakuniŵere nga ni mmwanenera. Nipo malaika eimako kwake.

³⁹ Lomba Mariya eima mmasiku ŵala echiya maluŵilo ku charo cha milundu, ku munzi wa mu Yudaya,

⁴⁰ noloŵa mng'anda ya Zakariya nomlonjera Elizabeti.

⁴¹ Nipo yenzepo Elizabeti akamvwe malonje a Mariya na mwana uyo elumpalumpa mvumo mwake; na Elizabeti ezula Mzimu Mtuŵa;

⁴² naye etumpula lizu na muŵila ukuru echiti, Nimwe mwa shuko mwa anakazi, na cha shuko ni chotwala cha vumo lanu.

⁴³ Nga ichi chafuma kuni kuli neo chakuti anyina a Asikuru ŵangu anizila?

⁴⁴ Pakuti ŵonani, lizu lolonjera kwanu likaloŵe mmatu mwangu mwana walumpalumpa na chimwemwe mvumo mwangu.

⁴⁵ Wa shuko ni yeve emvwila; pakuti vize visilizike ivyo vinenewa kwake na Asikuru.

⁴⁶ Naye Mariya echiti, Moyo wangu umlumba Asikuru,

⁴⁷ Na mzimu wangu usangalala pa Mlungu Mpuzumushi wangu.

⁴⁸ Chikomo oulola utonto wa muzya wake: Pakuti ŵonani, chitatikile lero maluko ŵonse azoniita mwine wa shuko.

⁴⁹ Chikomo mwine wa mpamvu onichitira vikuru; Na zina lake ni lozila.

⁵⁰ Lusungu lwake liri ku maluko na maluko Kwa aŵo omuyopa.

⁵¹ Ochita mpamvu na kwanja kwake; Oŵamwazya ŵolilumba pa malingililo a mmitima yaŵo.

⁵² Oŵawisya mafumu pa vilimba vyaŵo, Noŵaimya aŵo okavuka.

⁵³ Oŵakutisya na viweme anjala; Noŵafumyapo asambazi na manja atyala.

⁵⁴ Omuyavya Israeli mlumbwana wake, Kuti aŵokumbuka lusungu

⁵⁵ Kwa Abrahamu na mbuto yake vyaka vyosasila (Umo mwechinenera amausu wasu).

⁵⁶ Naye Mariya enkala pamo naye nga ni myezi itatu nowererako ku ng'anda kwake.

⁵⁷ Lomba nsita ya Elizabeti ifwikila yovyala mwana, epapa mwana mwanalume.

⁵⁸ Naŵo enekwaŵo na akwaŵo echimvwa kuti Asikuru ekuzya chitinti chake pali yeve; naŵo esangalala naye.

⁵⁹ Nipo yenzepo pa siku lakasano na katatu echizomsirimula mwana, esakomteya Zakariya, mwa zina la awisi.

⁶⁰ Anyina eyasuka echiti, Nte teti; lomba ateyewe Yohana.

⁶¹ Emuuzya, Paliye mnekwanu ana zina ili.

⁶² Nipo echeuzya awisi amteye ŵani.

⁶³ Naye esenga cholemberapo nolemba kuti, Zina lake ni Yohana.

⁶⁴ Naŵo ŵonse ezizwa. Na pakanwa pake pezuliwa lomba pano, na lulimi lwake lwimanguluka, naye elaŵira nomlumba Mlungu.

⁶⁵ Lomba mwezo wenze pali ŵonse ŵomangizyana naŵo: na malizu aŵa ŵonse emvwika mcharo chonse cha milundu cha Yudaya.

⁶⁶ Ŵonse eŵamvwa eŵasunga mmitima yaŵo echiti, Nga mwana uyu aŵe wosyani? Pakuti kwanja kwa Asikuru kwenze naye pamo.

⁶⁷ Awisi Zakariya ezula Mzimu Mtuŵa nolosya na kuti,

⁶⁸ Nalumbiwe Asikuru, Mlungu wa Israeli; Pakuti oŵazila na kwachitira ŵantu ŵake mbombola,

⁶⁹ Noimya nsengo yotipuzumusya Mumsumba mwa Davide mlumbwana wake

⁷⁰ (Umo mwechinenera pakanwa pa aŵirizi ŵake ŵozila ŵonkala chitatikile popoza vyaro vyonse),

⁷¹ Upuzumushi pa tupondo twasu na pa manja a ŵonse otitinka;

⁷² Kwachitira lusungu amausu wasu, Nokumbuka mapangano ŵake ŵozila;

⁷³ Njazi yechilapizya kwa Abrahamu ausu wasu,

⁷⁴ Yakuti atipe seo patupuzumuka pa manja a tupondo twasu Kumtumikila paliye mwezo,

⁷⁵ Ponkala atuŵa na pochita vyolungama pa menso pake nsiku zyasu zyonse.

⁷⁶ Inde nawe, mwanawe, uzoitiwe muŵirizi wa Ula wa Kumulu ngako: Pakuti uzotangulile pa menso pa Asikuru, ukaziwamizye njira zyake;

⁷⁷ Kwaziŵisya maumba ŵake upuzumushi Polekelewa kwa viipa vyaŵo,

⁷⁸ Chikomo cha mtima wa lusungu wa Mlungu wasu, Kuchutizila chingwengwengwe cha kumulu,

⁷⁹ Kwavunikira aŵo onkala pa mfinzi na pa chimfule cha imfwa; Notanguzya malwayo ŵasu ku njira ya mtendere.

⁸⁰ Lomba mwana ekula ekosa mu mzimu, enze mmalambo mpaka siku loŵoneshewa kwake kwa Israeli.