Filemoni 1 - Mapangano Alomba 1923

¹ PAULO, wa mnsinga wa Kristo Yesu, na Timoti mkwasu, kwa Filemoni wotemweka na wamulimo muyasu,

² na kwa Afiya mlongosi wasu, na kwa Arkipo linjolinjoli liyasu, na ku eklezya ya mng'anda yanu:

³ Chawanzi kwanu na mtendere kufumila kwa Mlungu Ausu wasu na Asikuru Yesu Kristo.

⁴ Numuŵonga Mlungu wangu masiku ŵonse, nomtulani mmalombero ŵangu,

⁵ panikumvwa zya chitemwano chanu na mvwano umuli nawo kwa Asikuru Yesu na kwa asanto ŵonse;

⁶ kuti kusanzyana kwa mvwano wanu kwakuŵa kokuma mkuziŵa viweme vyonse viri mwanu, kwa Kristo.

⁷ Chikomo neo nenze na chimwemwe chikuru na mapuzisyo pa chitemwano chanu, pakuti mitima ya asanto ichinchila muli mweo, akwasu.

⁸ Teti, chukanga nili nawo mkanka ukuru mwa Kristo womuuzyani icho chuwamila,

⁹ sembe chikomo chotemwa ngakongako nupapatira, panili teti neo Paulo mkote, na lomba wa mnsinga soti wa Kristo Yesu:

¹⁰ numpapatirani pa mwana wangu, winivyala penenze mnsinga, Onesimo,

¹¹ wamene kale enze wosachitirako kwanu, sembe lomba ni wochitirako kwanu na kuli neo.

¹² Nimuwezya kwanu mwine yeka, niye mtima wangu wenewene:

¹³ nkasa angati nimnkazika pamo nane, kuti pa mutu wanu anitumikile mnsinga zya evangelo:

¹⁴ lomba posaziŵa mtima wanu nichiti nisachita kantu; kuti uweme wanu usaŵa wokangamizya sembe wa wanoŵene.

¹⁵ Kano epatushiwa namwe kwa nsita kwa ichi, chakuti mwakuŵa naye mperampera;

¹⁶ nte lomba nga ni kapolo, sembe kupula kapolo, mkwanu wotemweka niye, ngakongako kuli neo, nga kwenekwene kuli mweo mmuŵili na mwa Asikuru.

¹⁷ Teti kati mkanilinga muyanu, mpokeleleni nga ni neo namwine.

¹⁸ Sembe kati emponterani kantu, kano eyapulako kantu, mkapendere kuli neo;

¹⁹ neo Paulo nine nuchilemba na kwanja kwangu namwine, chakuti nize niwezye: nisati kwanu kuti mwina mangaŵa ŵambi kuli neo, nimwe amene.

²⁰ Inde, akwasu, nanitemwe pali mweo mwa Asikuru: mchinchilisye mtima wangu mwa Kristo.

²¹ Panuchetekera kumvwila kwanu numlemberani, panuziŵa kuti muchite kupula chinunena.

²² Namwe muniwamizizye soti malo: pakuti nugomezya kuti kwa malombero ŵanu nikapewe kwanu.

²³ Epafra, wa mnsinga muyangu wa mwa Kristo Yesu, wampani mtende,

²⁴ na Marko, Aristarko, Dema, Luka, amilimo ayangu.

²⁵ Chawanzi cha Asikuru wasu Yesu Kristo chakuŵa na mzimu wanu. Amen.