Ahebrayo 1 - Mapangano Alomba 1923

¹ MACHEZO Mlungu enzolaŵira na amausu wasu mwa aŵirizi patonto patonto na pambipambi,

² lomba kunsilililo kwa nsiku zino elaŵira nase mMwana, wechiika kupyana vyonse, mwa yeve soti ni mwechiumbira vyaro.

³ Wamene paali kung'anima kwa mchinzi wake, na chipazyo chenechene chonkalo wake, notembetera vyonse na lizu la vizo vyake, pamene akatuŵisye mpulupulu enkala ku kwanja kwendi kwa Ukuru wa kumulu;

⁴ pechiŵa wopula malaika, nga ni umo mwechipyanira zina lozila kupula ŵeve.

⁵ Ku malaikanji kwechinena nsita zyonse, Niwe Mwana wangu, Lero nakuvyala? nipo soti, Nize niŵe Awisi, Naye azaŵe Mwana wangu?

⁶ Naye pechimulovya soti wa uŵere mcharo echiti, Malaika ŵonse a Mlungu namlambile.

⁷ Zya malaika echiti, Wamene oŵachisya malaika ŵake kuŵa mizimu, Na atumiki ŵake kuŵa lulimi lwa mulilo:

⁸ sembe zya Mwana echiti, Chilimba chanu chofumu, Mlungu, ni cha muyaya; Na muŵango wa chilungamo ni muŵango wofumu wanu.

⁹ Mwitemwa chilungamo notinka misulo; Teti Mlungu, Mlungu wanu, ni pechimzolekani Mafuta a chimwemwe kupula ayanu.

¹⁰ Soti, Mwe, Asikuru, pa chiyambiyambi mwizika makumbililo a charo, Na lulezi ni milimo ya manja ŵanu:

¹¹ Lila lize lilope, sembe mweo muŵe kankalilo: Lila lonse lize likukuluke nga ni muulili mwinjira;

¹² Nga ni mtopola muze mulivunge, Nga ni mwinjira, nalo lize lisanguke: Sembe mwe nimwe mumo na mumo, Na vyaka vyanu vyosapereŵera.

¹³ Sembe ku malaikanji kwechinena nsita zyonse, Nkala kwanja kwangu kwendi, Kuza na penti ntuchisye tupondo twako msamilo wa mendo ŵako?

¹⁴ Kansi ŵonse nte mizimu yotumikila, yotumiwa kuyoŵachitira ŵala ati azapyane upuzumushi?