Aefeso 1 - Mapangano Alomba 1923

¹ PAULO, mpostolo wa Kristo Yesu mchipangwilo cha Mlungu, kwa asanto a pa Efeso na amvwano a mwa Kristo Yesu:

² Chawanzi kwanu na mtendere kufumila kwa Mlungu Ausu wasu na Asikuru Yesu Kristo.

³ Nalumbiwe Mlungu na Awisi a Asikuru wasu Yesu Kristo, otishukisya na mishukoshuko yonse ya mwa mzimu ya kumulu mwa Kristo:

⁴ nga ni mwechitisalulira muli yeve pachikaliyoumbiwa charo cha pansi, takuŵa atuŵa mitima na chiliye chilema pa menso pake mchintemwa:

⁵ palutipatulile kaŵera kochishiwa ŵana mwa Yesu Kristo ku mwine mchisomo chopangwa kwake,

⁶ kolumbiwa kwa mchinzi wa chawanzi chake, chechitipa chamatapo mwa uyo Wotemweka.

⁷ Muli yeve ni mtiri nako kuŵombolwa kwasu mu mlopa wake, kulekelewa kwa viipa vyasu, mzilili mpango zya chawanzi chake,

⁸ chechiwandisya kuli seo mnzeru zyonse nopimbirimano,

⁹ akatiziŵisye chakunsei chopangwa kwake, mchisomo chake chechilingilatu mwa yeka,

¹⁰ ku mawamizyo a mnsita zikasilizike, kukochezya vyonse mwa Kristo, vya kumulu na vya pa charo.

¹¹ Muli yeve soti ni mtipyanikiwa, patilupatuliwire kaŵera nga ni mwechilingilatu uyo ochitisya vyonse umo mchupangila nzeru chipangwilo chake;

¹² chakuti seo toŵera kolumba mchinzi wake, amene titangulomgomezya Kristo.

¹³ Muli yeve namwe soti, pemwilimvwila lizu la chendi, evangelo yopuzumushi wanu‐muli yeve, pemwimzomera namwe, ni mmwikomewa malaka a Mzimu Mtuŵa wa chipango,

¹⁴ kwamene ni chikole chopyani wasu, koŵombolwa kwa vila vyali navyo Mlungu, kolumba mchinzi wake.

¹⁵ Chikomo choteti neo soti, penichimvwa zya mvwano wa mwa Asikuru Yesu uli mwanu, umuli nawo kwa asanto ŵonse,

¹⁶ ni pinisalekoŵonga pali mweo nomtulani mmalombero ŵangu;

¹⁷ kuti Mlungu wa Asikuru wasu Yesu Kristo, Ŵata wa mchinzi, ampeni mzimu wa nzeru wovundululila mkumziŵa.

¹⁸ Mwakuŵa na menso a mitima yanu ŵosanikiwa, kuti mziŵe chigomezyo choita kwake ni vinji, na mpango zya mchinzi wopyani wake wa mwa asanto ni vinji,

¹⁹ na ukuru ngawo wa mpamvu yake kuli seo tuzomera ni vinji, mmachitiwilo ŵala a vizo vyake vyokosa

²⁰ vyechichita mwa Kristo, pechimuusya kwa akufwa nomnkalika ku kwanja kwake kwendi pa chifuto cha pamulu,

²¹ pamulumulu pa nsaka yonse nopinguzi na mpamvu nofumu na mazina ŵonse ŵotuliwa, nte pa nsita ino yeka, sembe na pali ila ikuza:

²² naye ekandamizya vyonse pansi pa malwayo ŵake nompa kuŵa mutu wa vyonse vya mu eklezya,

²³ yamene ni muŵili wake, mazulilo a uyo ozuzya vyonse mvyonse.