YOPA 1 - Luvale Bible 1970

Malwa aYopa

¹ Mulifuci Uze mwapwilenga lunga, lijina lyenyi apwile ikiye Yopa. Lunga uze apwilenga waku­longa, wakusungama, wakumwivwa Kalunga woma nakulihenda kukupi­hya.

² Kuli ikiye kwasemukile vana va­malunga vatanu navavali navana vamapwevo vatatu.

³ Vikumba vyenyi vyapwile mikoko makombakaji atanu naavali nava­ngamela makombakaji atatu nava­ngombe vajitoka makulukaji atanu navimbulu vavihwevo makulukaji atanu, navandungo vavavulu ciku­ma. Ngoco lunga uze apwile wamu­lemu kuhambakana vaka-musamuko vakwavo vosena.

⁴ Jino vana venyi vamalunga vayi­lenga nakumangana kuzuvo yaumwe naumwe halikumbi lyenyi. Vatumine vatu kuvasanyika vandumbwavo va­mapwevo vatatu ngwavo, valyenga navo nakunwa.

⁵ Kaha casolokele, omu alingile ma­kumbi akulyangana cavo hyanatemo lyehi, Yopa atumine vatu nakuva­jilika, amenekele cimenemene na­kulumba mawana akulumba nge kutesa nakuvula cavakivo vosena. Mwomwo Yopa alyambile ngwenyi, Kwiji, pamo vana vami vamalunga vanavulumuna nakwangula Kalunga mumicima yavo. Mukiko mwalingi­lenga Yopa makumbi osena.

⁶ Jino casolokele halikumbi lize ve­jile vana vaKalunga nakwimana ku­meso aYehova, naSatana nawa ejile muli vakivo.

⁷ Yehova amwihwile Satana ngwenyi, Unafumu kulihi? Satana amukumbuiwile Yehova ngwenyi, Kukuhitangana hamavu nakukutambwojokaho.

⁸ Yehova amwihwile Satana ngwenyi, Unamunyingilila ngamba yami Yopa tahi? Mwomwo hamavu kahexi weka wakumufwanako, ikiye lunga wakulonga, wakusungama, wakungwivwAmi Kalunga woma nakulihenda kukupihya.

⁹ Satana amukumbulwile Yehova ngwenyi, Yopa nakwivwOve Kalu­nga woma wawana numba?

¹⁰ Ove unamujingulwisako cipato ce ndo nyi? nakuzuvo yenyi nakuvyuma vyosenovyo ali navyo unajingulwisako nawa ce ndo. Vilinga vyama­voko enyi unaviwahisa, kaha vi­kumba vyenyi vinazevumuka muli­fuci.

¹¹ Oloze jino acolole livoko lyove ulinangike havyuma vyosenovyo ali navyo, kaha mwakwangula kumeso ove.

¹² Yehova amwambile Satana ngwenyi, Tala, vyosenovyo ali navyo vili mulivoko lyove, oloze kanda wolola livoko lyove hamujimba wenyiko. Ngoco Satana alovokele kumeso aYehova.

¹³ Jino casolokele halikumbi limwe, omu vapwile vana venyi vamalunga navava vamapwevo nakulya nakunwa vinyo muzuvo yayou watwatwa,

¹⁴ kaha kuli Yopa kwejile kanganda nakumulweza ngwenyi, Vangombe vapwanga nakukoka matemo, kaha vimbulu vapwanga nakulya kwaka­mwihi navo.

¹⁵ Kaha vaXeva vavazombokelanga nakuvakwata. Camwenemwene vanavajihi vangamba nauvela wajipoko jamikwale, kahami uka wami kaha ngunapululukako nakukulwezaco.

¹⁶ Ximbu apwile ou acili nakuha­njika, kwejile weka nawa nakumwa­mbulila ngwenyi, Kakahya kaKalu­nga kanaholoka kufuma mwilu, kanavawemesa mikoko navangamba nawa nakuvatalisa, kahami uka wa­mi kaha ngunapululukako nakuku­lwezaco.

¹⁷ Ximbu apwile ou acili nakuha­njika, kwejile weka nawa nakumwa­mbulila ngwenyi, VaKalateya valihandununanga hikupwa mazavu atatu, vavazombokelanga vangamela naku­vakwata. Vanavajihi nawa vangamba nauvela wajipoko jamikwale, kahami uka wami kaha ngunapululukako nakukulwezaco.

¹⁸ Ximbu apwile ou acili nakuha­njika, kwejile weka nawa nakumwa­mbulila ngwenyi, Vana vove vama­lunga navava vamapwevo vapwanga nakulya nakunwa vinyo muzuvo ya­you watwatwa,

¹⁹ kaha kumana, kwezanga peho yanyamanganda kufuma mupambo, yalivetanga kujimbango jazuvo yize jiwana, kaha yavaxiukilanga vaze vana vamalunga, ngoco vanafu, ka­hami uka wami kaha ngunapululukako nakukulwezaco.

²⁰ Ngoco Yopa akatukile, apulile lihina lyenyi lyakukuluka, atewile nayembe kumutwe wenyi, alimbilile hamavu nakulifukula.

²¹ Ambile ngwenyi, Ngwasemukile uselesele mujimo lyamama, kaha nangukakinduluka uselesele kuze. Yehova anguhanyine vyuma, kaha Yehova nangutambulavyo ceka. Va­kisulenga lijina lyaYehova.

²² Kuvyuma vyosenevi Yopa kavulumwinekoko, cipwe kumuvulukila Kalunga kuhulama.