VIXIMO 1 - Luvale Bible 1970

Omu vyawahisa Viximo

¹ Evi vikiko Viximo vyaSolomone, mwanaNdavici, mwangana wavaIsalele.

² Mangana vakatacikize mangana nomu mwaya kunangula, Vakamone mwaya mazu akulwezomu mwalumbunukila ma­ngana,

³ Vaketavile kunangula cakuva-lwezomu mwaya kuzangama, Mwaya kwoloka naciyulo naku­sungama.

⁴ Kuhana kulunguluka kuli vaka-kuhulama, Nakuhana mukweze walunga kutacikiza nakulyanuka,

⁵ Mangana muka-mangana evweko, kaha avulise kunanguka, Kaha manganou anangakana awane kuyula kanawa.

⁶ Vamone mwalumbunukila cixi­mo, nalizu lyakufwanyisa, Namazu avaka-mangana, navi­hande vyavo vyakujiminyina.

⁷ Kumwivwa Yehova woma ci­kiko vene kuputuka cacinyingi, Oloze vileya veji kulumbilisanga mangana nakunangula.

Kuhuhumuna camangana

⁸ Ove mwanami, ivwilila kunangu­la caiso, Kanda ukaseza jiximbi janokoko.

⁹ Mwomwo navipwanga mucama walikoji hamutwe wove, Namalenge muxingo yove.

¹⁰ Ove mwanami, kaci nge vaka-xili navakuxinjila, Kanda uvakundwizako.

¹¹ Kaci nge navakwamba ngwavo, Twatuyenga nayove, Ngwavo, Tusengelele manyinga, Ngwavo, Tumuswaminyine tuhu mutu uze azeneka cuma caku­muhanyina mulonga,

¹² Ngwavo, Tuvamine vavatonyi nge Xeyole, Tuvamine vamuundu nge mwa­vava vakuxikumuka muwina.

¹³ Ngwavo, Natuwana vikumba vyandando vyosena, Nakusulisa mazuvo etu navyuma vyakupukula.

¹⁴ Ngwavo, Tulihake nayove ha­mwe, Kahetu tuvosena natutwamanga nangonga yimwe kaha.

¹⁵ Ove mwanami, kanda utambuka navo mujilako, Kingako lihinji lyove, lisosolole kujijila javo.

¹⁶ Mwomwo mahinji avo eji kulahilanga kukupihya, Kaha veji kulyanguhwisanga va­mwange manyinga.

¹⁷ Mwomwo mutu hakutanduula lyoji Kumeso akajila mwalixina tuhu.

¹⁸ Kahava veji kusengelelanga manyingavo vavene, Veji kuliswaminyinanga myono yavo vavene.

¹⁹ Mukiko vene mwaya jijila javaka-kulyapula vyacipululu vo­sena, Vyeji kufumisanga myono yavenyavyo.

²⁰ Mangana ali nakuvilika kutapalo, Ali nakuhanjika nalizu lyawo kumeluka.

²¹ Ali nakusanyikoku kwakulemu, oku veji kuzungumukila vatu, Kumengililo, kuvikolo vyalimbo, Namwimbo nawa ali nakuhanji­ka mazu awo,

²² Ngwavo, Enu mwahulama, namuzanganga kuhulama pala­nga nakumwaka uka? Navaka-kutoleka nawa navevwa­nga cipepa kukutoleka cavo, Naviheu nawa navahunganga ci­nyingi, palanga nakumwaka uka?

²³ Ngwawo, Alumukenu omu nangumihanjikila, Ivwenu, nanguhingunwina Xipili­tu yami hali enu, Nangumilweza mazu ami mukawatacikize.

²⁴ Ngwawo, Mwomwo ami ngunamisanyika, kahenu munakane, Ngunolola livoko lyami, kaha mutu naumwe pimbi nevuko,

²⁵ Oloze punga yami yosena munayikane, Kaha kumihanjikila cami kamwacisakileko,

²⁶ Xikaho nayami nawa nangukamiseha halikumbi lyakuvindama cenu, Nangukamihenda omu naukeza woma wenu,

²⁷ Omu naukeza woma wenu nge nyamanganda, Omu nacikeza kuvindama cenu nge Cijimbilanganga, Omu navikamiwana luyando namakava.

²⁸ Haze vene numba vakangusanyike, kaha kangwexi kukavetavizako, Navakangutonda, oloze kavexi kukanguwanako.

²⁹ Mwomwo vahungile cinyingi, Kaha kavasakwile kumwivwa Yehova womako,

³⁰ Punga yami kavayitavilileko, Kaha kuvahanjikila cami cosena vacisawile,

³¹ Xikaho navakalya kumihako ya­jila yavo, Kaha navakekuta vivwasano vyavo.

³² Mwomwo kupyapumuka cavaka-kuhulama nacikavajiha, Kaha kulivovelekeza caviheu nacikavanongesa.

³³ Oloze muka-kungwivwililami mwatwamanga mukufwelela, Mwatwamanga mwakuhola ca­ kuzeneka woma walupi.