Vilinga 1 - Luvale Bible 1970

Mwata Yesu mwaxika kutuma Xipilitu wajila

¹ Ove Teyofwilo, mukanda wakulivanga ngwausonekelele kuvuluka vyuma vyosenovyo aputukile Yesu kulinga nakunangula,

² kuheta nakulikumbi lize vamutambwile mwilu, omu alingile hanavahane lyehi vaposetolo vaze asakwile jiximbi muli Xipilitu wajila.

³ Alisolwele nawa wamutonyi navinjikizo vyavivulu kuli vakivo, kufuma kukuyanda cenyi, nakusolojoka kuli vakivo hamakumbi makumi awana, nakuhanjejeka navo vyuma vyakuvuluka wangana waKalunga.

⁴ Omu akungulukile navo avalwezele ngwenyi, Kanda mukafuma kuYelusalemako, oloze muvandaminenunga Uze vamixika lyehi kuli Tata, Uze mwevwa lyehi kuli Ami.

⁵ Mwomwo camwenemwene Yowano ambapacixilenga vatu mumeya, oloze kamwexi kuhita makumbi amavuluko, numbanyi vamimbapacisenu muli Xipilitu wajila.

Mwata Yesu mwaya ceka mwilu

⁶ Jino vakivo hakukungulukila hamwe, vamwihwile ngwavo, Ove Mwata, wangana nauvahilwixilawo vaIsalele hamakumbi ano tahi?

⁷ Avambile ngwenyi, Kacexi cenu kutacikiza myaka najingondeko, vikiko asakula Tata kungolo jenyi.

⁸ Oloze namukatambula ngolo hakwiza Xipilitu wajila hali enu, kaha namukapwanga muvinjiho jami, nakuYelusalema nakuYuleya kwosena nakuSamaliya mbwe nakusongosongo yamafuci.

⁹ Ikiye hakutulisa kuhanjika mazu awa, ximbu vapwile nakumutala, vamutwalile mwilu, kwejile livwi lyamufwikile, kaha kavamumwene cekako.

¹⁰ Omu vapwile nakuxixika mwilu muze apwile nakuya, kutala kuli vakivo kunemana malunga vavali vakuvwala mahina atoma.

¹¹ Vakivo vavambile nawa ngwavo, Enu malunga vakuNgalileya, munemanyina nakutalila ika mwilu? Ou Yesu, Ou vanafumisa kuli enu vanatambula mwilu, Ikiye mwakeza ceka nganomu munamumono hakuya mwilu.

Navasakulou mwaxisa muli Yuta

¹² Haze vene vakindulukile ceka kuYelusalema nakufuma kupili yize vavuluka ngwavo, yaMilive, yili kwakamwihi naYelusalema, tando nge musango wahalikumbi lyasambata.

¹³ Hakwingilamo, vakandukile kuzuvo yahelu, kuze vatwaminenga, naPetulu naYowano naYakova naAndelei naFwilipu naTomase naMbalaTolomeu naMateu naYakova yaAlefweu naXimona Zelote naYuta yaYakova.

¹⁴ Vosenava vakakacililenga namucima umwe kukulomba, namapwevo hamwe, nanaye yaYesu Maliya navasongo jaYesu.

¹⁵ Kaha hamakumbi aze Petulu emanyine mukaci kavandumbwenyi (kwapwile lizavu lyavatu, vapwile kafwe likulukaji namakumi avali), avambile ngwenyi,

¹⁶ Enu malunga vandumbwami, catelele kuMazu-vasoneka kulumbunuka, aze alivangile Xipilitu wajila kuhanjika mukanwa kaNdavici akuvuluka Yuta, uze apwile twamina yavaze vamukwacile Yesu.

¹⁷ Mwomwo vamulavilile muli etu, kaha atambwile nawa cazano cenyi kumilimo yino.

¹⁸ (Jino mutu kana alanjile mavu nayize fweto yakuhengesa cenyi, kaha ikiye hakuholokela hamavu lijimo lyenyi lyatuvikile, kaha mijingwa yenyi yosena yalovokele.

¹⁹ Vaze vatwamine kuYelusalema vosena vacitacikijile, ngoco mavu aze vawavuluka mulilimi lyavo ngwavo, Akeletama, nge ngwavo, Mavu-amanyinga.)

²⁰ Mwomwo vasoneka kumukanda waJisamu ngwavo, Kuutwamo wenyi kupwenga kwahwilici, Kaha kanda kukapwa mukakutwamakoko. Kaha nawa ngwavo, Ulama wenyi vakautambule kuli weka.

²¹ Xikaho kuli malungava twatambuka navo makumbi osenaze atambwojokelenga Mwata Yesu muli etu,

²² kufumisa kukumbapacisa caYowano nakuheta kulikumbi lize vamufumixile Mwata Yesu kuli etu nakumutambula mwilu, catela kuli umwe kupwa cinjiho nayetu hamwe wakuvuluka kusanguka cenyi.

²³ Kaha vemikile vavali, ou Yosefwe, ou vavulukilenga nawa ngwavo, Mbalasava, lijina lyenyi likwavo ikiye Yuxitu, ou Maciya.

²⁴ Valombele ngwavo, Ove Mwata, Ove watacikiza micima yavatu vosena, tulweze kuli ava vavali umwe ulihi ou unasakula,

²⁵ mangana axise mumilimo eyi namuuposetolo ou omu apyapumukile Yuta nakuya kuma lyenyi.

²⁶ Vavalowelele tutacikijilo, kaha katacikijilo kamwinyikile Maciya, kaha vamulavilile navaze vaposetolo likumi naumwe.