Mateu 1 - Luvale Bible 1970

Cisemwa caYesu Kulixitu

¹ Ou ukiko mukanda wacisemwa caYesu Kulixitu mwanaNdavici mwanaApalahama.

² Apalahama asemene Isaka, Isaka asemene Yakova, Yakova asemene Yuta navandumbwenyi,

³ Yuta asemene Peleze naZela kuli Tamale, Peleze asemene Hezelone, Hezelone asemene Lame,

⁴ Lame asemene Aminatave, Ami­natave asemene Naxone, Naxone asemene Salamone,

⁵ Salamone asemene Mbowaze kuli Lahave, Mbowaze asemene Ovete kuli Lute, Ovete asemene Yese,

⁶ Yese asemene mwangana Ndavici. Mwangana Ndavici asemene Solomone kuli uze apwile pwevo lyaUliya,

⁷ Solomone asemene Lehovowame, Lehovowame asemene Aviya, Aviya asemene Asa,

⁸ Asa asemene Yehoxafwate, Yehoxafwate asemene Yolame, Yolame asemene Ujiya,

⁹ Ujiya asemene Yotame, Yotame asemene Ahaze, Ahaze asemene Hezekiya,

¹⁰ Hezekiya asemene Manase, Manase asemene Amone, Amone asemene Yoxiya,

¹¹ Yoxiya asemene Yekonyiya navandumbwenyi, kafwe haze hakuvatundwila kuMbavilone.

¹² Omu valingile hivanavatundwila lyehi kuMbavilone, Yekonyiya asemene Xeyalacele, Xeyalacele asemene Zeluvavele,

¹³ Zeluvavele asemene Avyute, Avyute asemene Elyakime, Elyakime asemene Azole,

¹⁴ Azole asemene Satoke, Satoke asemene Akime, Akime asemene Elyute,

¹⁵ Elyute asemene Eleyaza, Eleyaza asemene Matane, Matane asemene Yakova,

¹⁶ Yakova asemene uze lunga lyaMaliya Yosefwe, Maliya uze asemene Yesu, Ou vavuluka ngwavo, Kulixitu.

¹⁷ Ngoco kusemunwina cosena kufumisa kuli Apalahama nakuneha kuli Ndavici vasemunwinyine likumi nakawana. Kufumisa kuli Ndavici nakuneha haze hakuvatundwila kuMbavilone vasemunwinyine nawa likumi nakawana. Kufumisa haze hakuvatundwila kuMbavilone nakuneha kuli Kulixitu vasemunwinyine nawa likumi nakawana.

Kusemuka caYesu Kulixitu

¹⁸ Kaha jino, kusemuka caYesu Kulixitu capwile ngana. Omu apwile naye Maliya hivanamuhuhu lyehi kuli Yosefwe, ximbu vapwile kanda vacilipandame, vamumwene hali najimo lyakuli Xipilitu wajila.

¹⁹ Jino lunga lyenyi Yosefwe, mwomwo apwile muka-kwoloka, kaha kazangile kumwivwisa sonyi kumeso avatuko, xikaho ajinyine kumutumbikila kupenge.

²⁰ Oloze ximbu apwile nakuxinganyeka vyumevi, kumana, kuli ikiye kwasolokele kangelo kaYehova hakumulotesa, amwambile ngwenyi, Ove Yosefwe mwanaNdavici, kanda wivwa woma wakumumbata pwevo lyove Maliyako, mwomwo eli lijimo kana nemita linapu lyakuli Xipilitu wajila, xikaho.

²¹ Mwakasema mwana walunga, kaha Ukamuluka lijina lyenyi ngwove, Ikiye YESU, mwomwo Ikiye vene Uze mwakalwila vatu jenyi kumilonga yavo yaxili, xikaho.

²² Jino vyuma vyosenevi vinasoloka mangana muze ahanjikile Yehova muli kapolofweto mulumbunuke ngwenyi,

²³ Tala, mwanapwevo ou acili kanda alimone nalunga mwakemita lijimo, mwakasema mwana walunga, Kaha mwana navakamuluka lijina lyenyi ngwavo, Ikiye Emanwele, kulyalumuna linapu nge ngwavo, Kalunga tuli nenyi hamwe.

²⁴ Yosefwe hakuhinduka kutulo twenyi alingile nge muze vamulwezele kuli uze kangelo kaYehova, amumbacile pwevo lyenyi.

²⁵ Oloze kalimwenenga nenyiko, kuvangilomu alingile hanaseme lyehi mwanenyi walunga. Kaha Yosefwe amulukile mwana lijina lyenyi ngwenyi, Ikiye Yesu.