KULAVA 1 - Luvale Bible 1970

Navavalava vaIsalele kuXinai

¹ Yehova ahanjikile kuli Mose mupambo yaXinai mumbalaka ya­kuliwanyina halikumbi lyakakweji wamucivali lyakulivanga, hamwaka wamucivali kufumisa haze valovo­kele mulifuci lyaEjipitu, ngwenyi,

² Lavenu lizavu lyavana vaIsalele lyosena, mwaya jitanga javo, kujizuvo javakakuluka javo, mukuvula camajinavo, malunga vosena kumi­twe yavo,

³ kufumisa kuli ava vamyaka ma­kumi avali nakusambula, vosena vaze vakulovoka kujita muli vaIsa­lele. Ove naAlone muvalava kumayongomenavo.

⁴ Kaha hamwe nayenu hapwe mutu umwe kumuyaci, mutu umwe ku­muyaci, mutu himutu mwata kuzuvo yavakakuluka jenyi.

⁵ Awa akiko majina amalunga vaze navemana nayenu. Ou waLuvene, ikiye Elizule mwanaXeteule.

⁶ Ou waXimeyone, ikiye Xelumyele mwanaZulixatai.

⁷ Ou WaYuta, ikiye Naxone mwa­naAminatave.

⁸ Ou waIsakale, ikiye Netanele mwanaZuwale.

⁹ Ou waZevulune, ikiye Elyave mwanaHelone.

¹⁰ Ava vavana vaYosefwe. Ou wa­Efwalime, ikiye Elixama mwanaAmihute. Ou waManase, ikiye Ngamalyele mwanaPetazule.

¹¹ Ou waMbenjamine, ikiye Avitane mwanaNgiteyonyi.

¹² Ou waNdane, ikiye Ahyezele mwanaAmixatai.

¹³ Ou waAxele, ikiye Pangiyele mwanaOkolane.

¹⁴ Ou waNgate, ikiye Elyasafwe mwanaNduwele.

¹⁵ Ou waNafwatale, ikiye Ahila mwanaEnane.

¹⁶ Ava vakivo vene vaze vasanyikile kulizavu, vaka-kulitulaho kumiyaci yavakakuluka javo, vakivo vapwile vamyata jamakombakaji avaIsalele.

¹⁷ Ngoco vaMose naAlone vayile namalungava vanavuluka lyehi ha­majinavo,

¹⁸ vakungulwile lizavu lyosena ha­mwe halikumbi lyakakweji wamu­civali lyakulivanga. Kaha vambulwile visemwa vyavo mwaya jitanga javo, kujizuvo javakakuluka javo, mukuvula camajinavo, kufumisa kuli ava vamyaka makumi avali nakusa­mbula, kumitwe yavo.

¹⁹ Nge omu valwezele Mose kuli Yehova, mukiko mwavalavilile mu­pambo yaXinai.

²⁰ Vana vaLuvene, twatwa yaIsalele, kusemunwina cavo, mwaya jitanga javo, kujizuvo javakakuluka javo, mukuvula camajinavo, kumitwe yavo, malunga vosena, kufumisa kuli ava vamyaka makumi avali nakusa­mbula, vosena vaze vakulovoka ku­jita,

²¹ ava valavile vahali vakivo vakumuyaci waLuvene vapwile tununu tuwana namakombakaji atanu na­limwe namakulukaji atanu.

²² Ava vahali vana vaXimeyone, kusemunwina cavo, mwaya jitanga javo, kujizuvo javakakuluka javo, ava valavile vahali vakivo, mukuvula camajinavo, kumitwe yavo, malu­nga vosena, kufumisa kuli ava va­myaka makumi avali nakusambula, vosena vaze vakulovoka kujita,

²³ ava valavile vahali vakivo vakumuyaci waXimeyone vapwile tununu tutanu namakombakaji atanu naawana namakulukaji atatu.

²⁴ Ava vahali vana vaNgate, kuse­munwina cavo, mwaya jitanga javo, kujizuvo javakakuluka javo, muku­vula camajinavo, kufumisa kuli ava vamyaka makumi avali nakusambu­la, vosena vaze vakulovoka kujita,

²⁵ ava valavile vahali vakivo vakumuyaci waNgate vapwile tununu tuwana namakombakaji atanu na­makulukaji atanu nalimwe nama­kumi atanu.

²⁶ Ava vahali vana vaYuta, kuse­munwina cavo, mwaya jitanga javo, kujizuvo javakakuluka javo, muku­vula camajinavo, kufumisa kuli ava vamyaka makumi avali nakusa­mbula, vosena vaze vakulovoka ku­jita,

²⁷ ava valavile vahali vakivo vakumuyaci WaYuta vapwile tununu tutanu natuvali namakombakaji awana namakulukaji atanu nali­mwe.

²⁸ Ava vahali vana vaIsakale, kuse­munwina cavo, mwaya jitanga javo, kujizuvo javakakuluka javo, muku­vula camajinavo, kufumisa kuli ava vamyaka makumi avali nakusa­mbula, vosena vaze vakulovoka ku­jita,

²⁹ ava valavile vahali vakivo vakumuyaci waIsakale vapwile tununu tutanu namakombakaji awana na­makulukaji awana.

³⁰ Ava vahali vana vaZevulune, kusemunwina cavo, mwaya jitanga javo, kujizuvo javakakuluka javo, mukuvula camajinavo, kufumisa kuli ava vamyaka makumi avali naku­sambula, vosena vaze vakulovoka kujita,

³¹ ava valavile vahali vakivo vakumuyaci waZevulune vapwile tununu tutanu namakombakaji atanu na­avali namakulukaji awana.

³² Ava vahali vana vaYosefwe, vahali vana vaEfwalime, kusemu­nwina cavo, mwaya jitanga javo, kujizuvo javakakuluka javo, muku­vula camajinavo, kufumisa kuli ava vamyaka makumi avali nakusa­mbula, vosena vaze vakulovoka ku­jita,

³³ ava valavile vahali vakivo vakumuyaci waEfwalime vapwile tununu tuwana namakulukaji atanu.

³⁴ Ava vahali vana vaManase, ku­semunwina cavo, mwaya jitanga javo, kujizuvo javakakuluka javo, mukuvula camajinavo, kufumisa kuli ava vamyaka makumi avali naku­sambula, vosena vaze vakulovoka kujita,

³⁵ ava valavile vahali vakivo vakumuyaci waManase vapwile tununu tutatu namakombakaji avali nama­kulukaji avali.

³⁶ Ava vahali vana vaMbenjamine, kusemunwina cavo, mwaya jitanga javo, kujizuvo javakakuluka javo, mukuvula camajinavo, kufumisa kuli ava vamyaka makumi avali nakusa­mbula, vosena vaze vakulovoka ku­jita,

³⁷ ava valavile vahali vakivo vakumuyaci waMbenjamine vapwile atununu tutatu namakombakaji atanu namakulukaji awana.

³⁸ Ava vahali vana vaNdane, kuse­munwina cavo, mwaya jitanga javo, kujizuvo javakakuluka javo, muku­vula camajinavo, kufumisa kuli ava vamyaka makumi avali nakusa­mbula, vosena vaze vakulovoka ku­jita,

³⁹ ava valavile vahali vakivo vakumuyaci waNdane vapwile tununu tutanu nakamwe namakombakaji avali namakulukaji atanu naavali.

⁴⁰ Ava vahali vana vaAxele, kuse­munwina cavo, mwaya jitanga javo, kujizuvo javakakuluka javo, muku­vula camajinavo, kufumisa kuli ava vamyaka makumi avali nakusa­mbula, vosena vaze vakulovoka ku­jita,

⁴¹ ava valavile vahali vakivo vakumuyaci waAxele vapwile tununu tuwana nalikombakaji limwe nama­kulukaji atanu.

⁴² Ava vahali vana vaNafwatale, kusemunwina cavo, mwaya jitanga javo, kujizuvo javakakuluka javo, mukuvula camajinavo, kufumisa kuli ava vamyaka makumi avali nakusambula, vosena vaze vakulo­voka kujita,

⁴³ ava valavile vahali vakivo vakumuyaci waNafwatale vapwile tununu tutanu namakombakaji atatu namakulukaji awana.

⁴⁴ Ava vakivo vene vaze valavile, vaze valavile kuli vaMose naAlone navaka-kulitulaho javalsalele, malu­nga likumi navavali, mutu himutu apwile hazuvo yavakakuluka je­nyi.

⁴⁵ Ngoco vosena vaze valavile va­hali vana vaIsalele, kujizuvo java­kakuluka javo, kufumisa kuli ava vamyaka makumi avali nakusambu­la, vosena vaze vakulovoka kujita vamuli vaIsalele,

⁴⁶ vosena vaze valavile vapwile Vihita vitanu nacimwe namakombakaji atatu namakulukaji atanu nama­kumi atanu.

Navavatongola vaLevi

⁴⁷ Oloze vaLevinyi, kumuyaci wa­vakakuluka javo, kavavalavilile muli vakivoko.

⁴⁸ Mwomwo Yehova ahanjikile kuli Mose ngwenyi,

⁴⁹ Oloze muyaci wavaLevinyi, ka­nda uvalavako, kanda usoneka ku­vula cavo muli vana vaIsaleleko.

⁵⁰ Oloze uvatongola vaLevi kula­manga Tavanaku yaunjiho, navyu­ma vyayo vyosena vize vilimo, navyuma vyayo vyosena. Vakivo vakulikenga tavanaku, navyuma vyo­sena vize vilimo, vavizacilenga, va­tungenga cilombo cavo kutavanaku jingulwixi.

⁵¹ Tavanaku hakukatuka, vaLevi vakayixiwule, kaha hakujika tava­naku, vaLevi vakayitunge. Mutu weka mwakapandamako vakamu­jihe.

⁵² Kaha vana vaIsalele vatunge jimbalaka javo, mutu himutu kucilombo cenyi, mutu himutu kulipa­ndelo lyenyi mwaya mayongome­navo.

⁵³ Oloze vaLevi vatunge cilombo cavo kutavanaku yaunjiho jingu­lwixi, mangana kuzeneke kupwa ndombo halizavu lyavana vaIsalele. VaLevi valamenga tavanaku yau­njiho.

⁵⁴ Mukiko muvalingile vana va­Isalele, nge mwosenomu valwezele Mose kuli Yehova, mukiko vene muvalingilile.