HAMBAKUKE 1 - Luvale Bible 1970

Hambakuke mwatatwoka ngwenyi, Kakwexi ciyuloko

¹ Eci cikiko citeli cize amwene kapolofweto Hambakuke.

² Ove Yehova, ngutwenga kawelele kaha ukanenga kwivwilila palanga nakumwaka uka? Ngweji kutetanga kuli Ove ngwami, Ulyanyi! oloze kawexi kulwilako.

³ Ikaze weji kungumweneselanga kuhenga nakungutalisa luyanjisa? Mwomwo kwenyeka naulyanyi vili kumeso ami, kuli kulisopesa, kweji kukatukanga Vikokojola.

⁴ Xikaho jiximbi jinazeye, ciyulo kacexi kulovokako makumbi osena, mwomwo vaka-kuhuka veji kuvakucikanga vaka-kwoloka, xikaho ciyulo nacilovoka vacihingika lyehi.

VaKalateya navakavazangamisa vaYuta

⁵ Talenu muli vaka-mafuci mumone, mulikomokele cakulikomokela, mwomwo hamakumbi enu nguli nakuzata milimo, yikiko, cipwe navamihicilamo, oloze namukana kwitava.

⁶ Mwomwo talenu, nanguvakatula vaKalateya, uze muyaci wausasu wakulyanguhwisa, ou wakutambuka mukutohwa camavu, mangana Vakahetenga mautwamo akuzeneka kupwa avo.

⁷ Vakivo vakuzuzwisa vatu, vakwivwisa woma, kuyula cavo nauhaji wavo vyeji kulovokanga muli vavene.

⁸ Tuvalu twavo vanasasulwila kuhambakana visupa, vali nalumbuxi kuhambakana tungunge vakwiza hacingoloxi, vaka-tuvalu twavo veji kutopwojokanga. Vaka-tuvalu twavo vafuma kwakusuku, veji kutukanga nge mwangonga, ou mwanyawisa mangana alyenga.

⁹ Vakivo vosena vanejiva ulyanyi, kuzavuka cameso avo cinatale kulutwe, vali nakukungulula vafunge nge musekeseke.

¹⁰ Ikiye eji kutolekanga vamyangana, ava vavalemu eji kuvasehanga. Ikiye eji kusehanga jikembwe josena, mwomwo eji kulundwilangako lukungu nakujitambula, xikaho.

¹¹ Haze vene mwakapulasanamo nge peho, mwakahitamo nakupwa namulonga, ou ukweci ngolo jenyi jinapu kalunga kenyi.

Hambakuke mwamutatwokesa Yehova

¹² Ove Kalunga kami Yehova, Ove wami wajila, Ove kuwapwa kufumisa kuxikulu nyi? Katwexi kukafwako. Ove Yehova, unamutongwela kumusopesa. Ove Lilolwa, unamuhakila kumuzangamisa.

¹³ Meso ove atoma, kawahasa kutala kupihyako, kawahasa kutala luyanjisako, ikaze weji kuvatalilanga vaka-kumbembejeka Hakulyungumika omu mwamina muka-kuhuka mutu uze napu wakwoloka kumuhambakana ikiye?

¹⁴ Kaha weji kulingisanga vatu kupwa nge mwavaixi vamukalungalwiji, nge mwavaka-kuhalala vakuzeneka mwata wavo.

¹⁵ Eji kuvalovanga vosena naulovo, eji kuvakokelanga mulyoji lyenyi nakuvakungulwila mucikokela cenyi, xikaho eji kuwahililanga nakukinyinyina.

¹⁶ Xikaho eji kuvatwilanga lyoji lyenyi vimuna, nakulumbila cikokela cenyi vyalivumba lyamwaza. Mwomwo kuvikiko cinawanyina cazano cenyi maji nakulya cenyi nawa kuvula, xikaho.

¹⁷ Ngoco mwakazukula vyamulyoji lyenyi numba, nakutetela vatu numba valitwamine kuvajihajiha vakamafuci hamakumbi osena?