WAYUTA 1 - Chilongeslo-Chalushiko-Lwakalunga Chachihya

Kumeneka chaYuta

¹ Ami Yuta, ndungo yaYesu Kulishitu, ndumbu yaYakova. Nguli nakusonekela enu vásanyika, vazanga kuli Kalunga Setu, enu válamina Yesu Kulishitu —

² Kutetela nakuunda nazangi vamivulishilengavyo.

Omu navakahisa vaka-kunangula vakwonga.

³ Enu ngwazanga, chipwe ngwapwanga napwipwi yakumisonekela vyaulwilo woumwe tunatambula tuvosena, oloze changulemenanga mumuchima ngwami kuvanga ngumisonekele nakumilembelela mangana mulwenga nakukinga vize twáfwelela váhana vaka-kujila kamwe kaha kunahu.

⁴ Mwomwo vatu vamwe vanalivembela muli enu, kuvahisa vachisonekele lyehi hamwaka — kavakomoka Kalungako, veji kwalumunanga likoji lyaKalunga ketu nakupwa kengililo kakuzunguma, vakana Ou apwa uka wenyi Mwangana wetu, ikiye nawa Mwata, Yesu Kulishitu.

⁵ Chipwe mwatachikiza lyehi vyosena evi, oloze ngunasake kumyanukisa ngwami, omu MWATA apululwile tanga yavaIsalele mulifuchi lyaEjipitu, kaha kukumishilako, anongesele vaze vazenekele kufwelela.

⁶ Vaze vangelo nawa vazenekele kutwama muchiyulo vávahanyine, vásezele mautwamo ávatelele, avalamina mumalenge akuzeneka kujitukamo, mumilima yilava chikuma, palanga nakulikumbi lize lyalilemu lyakuvatula milonga —

⁷ nge muze membo-akembwe aSotome naNgomola naaze ajingilikileko alisuwile kuujila nakukavangiza jipeha jakuhingama, ngocho apwa akutalilaho omu atwama mukuzangamisa chakakahya kázeneka kujima.

⁸ Mwomumwe navatu ava nawa, vápendamina havilota vyavo, veji kujilululanga mijimba yavo nakukana chiyulo, nakusaula vaka-upahu.

⁹ Oloze omu uze kangelo wakulitulaho Mikayele alipikile naliyavolo nakulijingisa nenyi hamujimba waMose, kahasukile kumuhana mulonga mwakasautuko, oloze amwambile ngwenyi, MWATA akuhanjikile.

¹⁰ Oloze ava, veji kusaulanga vyosena ovyo vyazeneka kuvalumbunukila, kaha vyosena vize vyávalumbunukila vyamwaya chisemwa chamujimba — veji kuvilinganga nge tunyama kavatumbununa manganako, nakulyenyeka vavene.

¹¹ Luvinda lwavo! Mwomwo vakava jila yaKena, nakulisuwila kukuhenga chaMbalame halwiso lwanganyo, nakunonga mukulikanga chaKola.

¹² Ava vapwa malolwa akungongama akuvombesa mato muviwanyino vyenu vyazangi, omu navalya nayenu chakuzeneka woma, valizakama vavene. Vapwa mavwi akuzeneka vula ákupekumuna napeho. Vapwa mitondo yakuzeneka mihako hangonde yakuhuluka, yafwa chikupu, yakuvunya.

¹³ Vapwa makimba akalungalwiji akutenuka, akutupwoka lifulu lyasonyi yavo vavene; vapwa vatanganyika vakuchamangila, vavalamina milima yilava chikumakuma yajingonde jázeneka kukuma.

¹⁴ Enoke, uze wamuchitanu navavali kufuma hali Alama, apolofwetele nakuvuluka kunongesa vatu ava ngwenyi, Tala, MWATA mweza navaka-kujila jenyi tununu,

¹⁵ nakuvatula milonga hali vatu vosena, nakuhisa vaka-kuzamukila Kalunga vosena, havilinga vyavo vyosena vyakazamuzamu kakuzamukila Kalunga, nahamazu aukenya osena akumufulilila aze váhanjikile vaka-shili vaka-kumuzamukila.

¹⁶ Ava vapwa vaka-kuyayavala, vaka-kutatwoka, veji kukavangizanga mwaya kufwila chavo chachipi; vahanjejeka mazu akulitukwojola, nakumbembejekanga vatu mangana valileho.

Mwavahuhumuna nakuvalembelela

¹⁷ Jino enu ngwazanga, anukenu mazu vápolofwetele vaposetolo jaMwangana wetu Yesu Kulishitu,

¹⁸ omu vamilwezele ngwavo, Hangonde yakukuminyina nahakasoloka vaka-kuhenda, navakakavangizanga kufwila chavo chakuzamukila Kalunga.

¹⁹ Ava vakiko vaka-kuneha vihandwa, vaka-kufwila vyachisemwa chamujimba, kaveshi naShipilituko.

²⁰ Oloze enu ngwazanga, litungenunga muvize vyajila chikuma mwáfwelela — lombenunga muli Shipilitu Wajila.

²¹ Twamenunga muzangi yaKalunga, nakutalilila kutetela chaMwangana wetu Yesu Kulishitu chakutwala kumwono wázeneka kukuma.

²² Kaha tetelenu vaze vali nakukakasana —

²³ pulululenu vamwe hakuvokola mukakahya; vakwavo vatetelenu nawoma, nakuhunga chipwe uvwalo uze vánapihisa nachisemwa chamujimba.

Kalunga navamwalisa

²⁴ Jino kúli Ou ahasa kumikinga kuchina namulimbuka, Ou ahasa kumimika chakuzeneka katenga kumeso ayOu waupahu nachisambo chakuhambakana,

²⁵ kúli Ou apwa Ikiye kaha Kalunga Mulwilo wetu, muli Yesu Kulishitu Mwangana wetu, kupwenga upahu naukelenga nangolo nawata — kufuma haze japwile jingonde kanda, nakulelo lino, nakujingonde jázeneka kukuma. Amene.