Vilinga 1 - Chilongeslo-Chalushiko-Lwakalunga Chachihya

Mwata Yesu mwavalweza vavandamine Shipilitu Wajila

¹ Mumukanda wakavanga, Ove Teyofwilo, ngwasonekelemo vyosena vize aputukile Yesu kulinga nakunangula,

² palanga nakulikumbi lize vamutwalile mwilu, kufuma hakusela vaposetolo vaze ásakwile vize ávalwezele muli Shipilitu Wajila.

³ Kaha kufuma hakumona makava nakufwa, alisolwele kuli vakiko wamutonyi, naunjiho wakutamo wauvulu — alisolwelenga kuli vakiko makumbi makumi awana (40) nakuvalweza vyawangana waKalunga.

⁴ Jino omu apwile navo, avalwezele ngwenyi, Kanda namufuma muYelusalemako, oloze vandaminenu Uze walushiko lwaTata, Uze mwevwile kuli Ami,

⁵ mwomwo Yowano ajimikilenga vatu mumeya, oloze kaheshi kuhita makumbi amavuluko numba vamijimike muli Shipilitu Wajila.

Mwata Yesu mwakinduluka mwilu

⁶ Shikaho, omu vakungulukile vamuhulishile ngwavo, Ove Mwata, nauhilwishila vaIsalele wangana oholili tahi?

⁷ Avambile ngwenyi, Kutachikiza myaka chipwe jingonde áhakako Tata kutesa nangolo jenyi, kacheshi chayenuko.

⁸ Oloze namutambula ngolo omu mweza Shipilitu Wajila hali enu, kaha namupwanga muvinjiho jami muYelusalema namuYuleya mwosena namuSamaliya, mbwe nakuze kwakumina mavu.

⁹ Kaha omu akumishile kuhanjika mazu awa, oku vali nakumona kapu, vamuzezwile, kaha livwi lyamufumishile kumeso avo.

¹⁰ Kaha omu vapwile nakushishika mwilu shimbu apwile nakuya, kukasumuka, malunga vavali muuvwalo utoma vanemana navo.

¹¹ Vambile ngwavo, Enu malunga vakuNgalileya, ika munemanyina nakushishika mwilu ngana? Ou Yesu vanafumisa mukachi kenu nakumutambula mwilu, mwakeza mwomumwe nge omu munamumono hakuya mwilu.

Navasakula wakushisa muli Yuta

¹² Haze vene, vakindulukile kuYelusalema kufuma kupili yize vavuluka ngwavo Milive yálihata naYelusalema, tunda yacho nge musango wakutambuka haSambata.

¹³ Kaha omu vengilile muYelusalema, vengilile nawa muzuvo nakukanduka mukapete wahelu muze vatwaminenga vosena — Petulu naYowano naYakova naAndelei, Fwilipu naTomase, Mbala-Tolomeu naMateu, Yakova mwanaAlefweu naShimona uze Zelote, naYuta mwanaYakova.

¹⁴ Vosena ava vakakachililenga kukulomba namuchima umwe — namapwevo hamwe, naMaliya naye yaYesu, navasongo jaYesu vamalunga.

¹⁵ Hamakumbi kana aze, Petulu akatukile mukachi kavandumbwenyi (lizavu lyavatu vosena lyapwile kafwe likulukaji namakumi avali, 120), nakwamba ngwenyi,

¹⁶ Enu vandumbwami vamalunga, Mazu-vasoneka-ajila kuvanga kuwatesamo, aze vapolofwetele kuli Shipilitu Wajila mukanwa kaNdavichi hakuvuluka Yuta, uze atetekelele vaze vákwachile Yesu,

¹⁷ mwomwo apwile minetu mutwazachililenga hamwe.

¹⁸ (Oloze fweto yakuhengesa chenyi yikiko vamulanjilile mavu, kaha omu aholokele hamavu chamutwe, apulikile hakachi, kaha mijingwa yosena yalovokele.

¹⁹ Kaha chevwakanyine kuli vaka-Yelusalema vosena, kaha aze mavu vawalukile mulilimi lyavo ngwavo, Akeletama, nge ngwavo, Mavu-amanyinga).

²⁰ Mwomwo muMukanda waJisamu vasonekamo ngwavo, Limbo lyenyi lipwenga ngundu, Kaha lizeneke wakutwamaho. Kaha nawa ngwavo, Utwamina wenyi vautambule kuli weka.

²¹ Shikaho, hakachi kamalunga vaze vatambwojokelenga nayetu makumbi osena twapwile naMwata Yesu,

²² kuputuka kulujimiko lwaYowano, palanga nakulikumbi lize vatambwile Mwata Yesu mwilu — umwe wavo kuvanga apwenga chinjiho wakusanguka chaMwata hamwe nayetu.

²³ Kaha vemikile vavali — Yosefwe uze vavulukilenga ngwavo Mbalasava chipwe Yushitu, naMachiya.

²⁴ Kaha valombele ngwavo, Ove Mwata watachikiza michima yavatu vosena, tusolwele ou unasakula hali ava vavali,

²⁵ ashise mumilimo namuuposetolo ákanyine Yuta hakulikanga, uze aya kuchihela chize chamutela.

²⁶ Valowele tutachikijilo twakusakwisa, kaha katachikijilo kenyikile Machiya, kaha apwile umwe wavaze vaposetolo likumi naumwe.