Mako 1 - Chilongeslo-Chalushiko-Lwakalunga ChachihyaMilimo yaYowano muka-kujimika vatu ( Mat 3:1-12 ; Luka 3:1-9 , 15-17 ; Yowa 1:19-28 ) 1 Kuputuka chamujimbu wamwaza waYesu Kulishitu, MwanaKalunga. 2 Ngana muze vasoneka mumukanda wakapolofweto Isaya ngwavo, Tala, nangutuma muluwa wami kulutwe lwove, Ou mwalongesa jila yove. 3 Lizu lyayOu áli nakuvilika mupambo ngwenyi, Longesenu jila yaMWATA, Sungamisenu jijila jenyi. 4 Ngocho Yowano ejile, ajimikilenga vatu mupambo nakuvilika lujimiko lwakusolola kukunyuka hashili nakwalumuka mumuchima chize chakutwala kukuvakonekela milonga yashili. 5 Vaka-ngalila yaYuleya vosena navaka-Yelusalema vosena valovokelenga nakuya kuli ikiye, kaha hakwitavila milonga yavo yashili avajimikilenga mukalwiji vavuluka ngwavo Yotau. 6 Yowano avwalilenga uvwalo waungona wavangamela, namuhya wachikapa mumbunda yenyi, kaha alilenga vambimba-makumbi nauchi wamuchipapa. 7 Kaha ambulwilenga ngwenyi, Kuli Muka-ngolo ánguhambakana ali nakwiza munyima yami, ukwechi kachikapa kamendelo enyi kangwatamo kunongama nakukakasununako. 8 Ami ngweji kumijimikanga mumeya, oloze Ikiye mwakamijimika muli Shipilitu Wajila. Yesu navamujimika ( Mat 3:13-17 ; Luka 3:21-22 ) 9 Kaha hamakumbi aze Yesu afumine kuNazaleta, limbo lyakuNgalileya, kaha vamujimikile kuli Yowano muYotau. 10 Kaha omu apwile nakukanduka kufuma mumeya, hahaze vene amwene mwilu muli nakusokoloka, naShipilitu ali nakushikumuka nakumuwila nge katela. 11 Kaha lizu lyafumine mwilu ngwalyo, Ove yove Mwanami ngwazanga, wángusuulwisa. Yesu navamweseka ( Mat 4:1-11 ; Luka 4:1-13 ) 12 Hahaze vene Shipilitu amutwalile mupambo, 13 kaha apwile mupambo makumbi makumi awana (40) nakumweseka kuli Satana. Apwilenga hamwe natunyama vamuchipapa, kaha vangelo vamuzachilile. Yesu mwaputuka milimo yenyi ( Mat 4:12-17 ; Luka 4:14-15 ) 14 Jino kufuma haze vákashile Yowano, Yesu ayile kuNgalileya nakwambulula mujimbu wamwaza waKalunga, 15 ngwenyi, Lwola lunatemo, kaha wangana waKalunga uneza hakamwihi. Kunyukenu hashili nakwalumuka mumichima, fwelelenu mujimbu wamwaza. Yesu mwasanyika tumbaji vatete ( Mat 4:18-22 ; Luka 5:1-11 ) 16 Omu Yesu apwile nakuhita kuchijiva chaNgalileya, amwene Shimona nandumbwenyi Andelei vali nakufuta muze muchijiva, mwomwo vapwile vaka-kuta ishi. 17 Kaha Yesu avambile ngwenyi, Ngukavangizenu, kaha nangumilingisa kupwa muvaka-kuta vatu. 18 Hahaze vene vasezele moji avo mbwa nakumukavangiza. 19 Hakuswenya kulutwe chachindende, amwene Yakova mwanaZevete nandumbwenyi Yowano vali muwato nakuhongela moji. 20 Hahaze vene avasanyikile, kaha vasezele sevo Zevete muwato navangamba, hinavamukavangiza. Mutu apwile nashipilitu wamupi ( Luka 4:31-37 ) 21 Jino vengilile muKapelenau, kaha hahaze vene omu Sambata yahetele, engilile musunangonga nakunangula. 22 Kaha valikomokelele kunangula chenyi, mwomwo avanangwilenga mwamuka-wata, keshi nge muze mwavaka-kusonekako. 23 Kaha hahaze vene muze musunangonga yavo mwengilile mutu ápwile nashipilitu waunyengwe. Atambakanyine ngwenyi, 24 Unasake kulinga muka naetu, Ove Yesu wakuNazaleta? Uneza nakutunongesa tahi? Ngunakutachikiza, yove Muka-kujila waKalunga! 25 Kaha Yesu amuhanjikilile ngwenyi, Hola kulu, mulovoke! 26 Uze shipilitu waunyengwe hakumukonyesa, atetumukile, kaha amulovokele. 27 Kaha vosena valikomokelele, ngocho valipulile jipami ngwavo, Chuma muka echi? Kunangula chachihya chili nangolo vene! Chipwe vashipilitu vaunyengwe mwavamba, kaha hinavamwononoka! 28 Kaha hahaze vene mujimbu wakumuvuluka watanjile mungalila yosena yaNgalileya. Yesu mwahindula nayewenu yaPetulu ( Mat 8:14-15 ; Luka 4:38-39 ) 29 Kaha hahaze vene hakulovoka muze musunangonga, Yesu engilile naYakova naYowano muzuvo yaShimona naAndelei. 30 Jino nayewenu yaShimona apwile mukahela nakuviza chishika, kaha hahaze vene valwezele Yesu. 31 Kaha ejile, amukwachile kulivoko nakumukatula, hahaze vene chishika chamufumine, kaha himwavazumbula. Yesu mwahindula vavavulu hakulauka chalikumbi ( Mat 8:16-17 ; Luka 4:40-41 ) 32 Hakulauka chalikumbi, vamunehelele vosena vaze vapwile nakuviza, navaka-ndemone. 33 Kaha lize limbo-lyakembwe lyosena lyakungulukilile kuze kuchikolo chazuvo. 34 Kaha ahindwile vavavulu vaka-kuviza misongo yeka nayeka, nakulovola nawa vandemone vavavulu. Kaha ketavishile vandemone kuhanjikako, mwomwo vamutachikijile. Yesu mwaya nakwambulula mazu muNgalileya ( Luka 4:42-44 ) 35 Hachimenemene, shimbu kuchili kaufuku, ahindukile, alovokele mwimbo nakuya mupambo, kaha muze alombele. 36 Jino Shimona navaze vakwavo ápwile navo vayile nakumutonda-tonda. 37 Kaha vamuwanyine nakumwamba ngwavo, Vatu vosena vali nakukutonda. 38 Ikiye avambile ngwenyi, Tuyenu kumembo eka, ngukambulule mazu nakuze nawa. Mwomwo chikiko vene ngwakavile. 39 Kaha ayile muNgalileya mwosena, ambulwilenga mazu mujisunangonga javo nakulovola vandemone. Yesu mwatomesa muka-mbumba ( Mat 8:1-4 ; Luka 5:12-16 ) 40 Kaha muka-mbumba ejile kuli Ikiye nakulemba, nakumufukamina ngwenyi, Nge unasake, nauhasa kungutomesa. 41 Hakumwivwila keke, olwele livoko nakumukwata, himwamwamba ngwenyi, Ngunasake vene, toma. 42 Kaha hahaze vene mbumba yamufumine, vamutomesele. 43 Kaha Yesu amukanjile chikuma, hahaze vene amusuwile, 44 nakumwamba ngwenyi, Nyingilila, kanda ukachambulula numba kuli umweko, oloze yako ukalisolole kuli kapilishitu ukahane vyahakukutomesa vize ámilwezele Mose mwaya Jishimbi, kupwa unjiho kuli vakiko. 45 Oloze ayile nakuputuka kuchambulula lika nakuchitanjisa, ngocho Yesu kahashile kwingila cheka mumembo-akembwe hatomako, oloze atwaminenga mupambo, kaha vatu vayilenga kuli Ikiye kufuma kumitamba yosena. |
Bible Society of Zambia
Bible Society of Zambia