Luka 1 - Chilongeslo-Chalushiko-Lwakalunga Chachihya

Shindakanyi yamujimbu waYesu Kulishitu

¹ Hakumona vavavulu vanalihane kukwihwojola nakusoneka mujimbu hachuma hichuma ngana omu Mazu-vasoneka-ajila anatesamo mukachi ketu,

² kutesa namuze vatulwezelewo vangamba jaLizu lyaKalunga, vaze vakaleho kufuma kukuputuka,

³ shikaho ove Teyofwilo walema chikuma, nayami nawa omu ngunehwojola kanawa vyosena kufuma kukuputuka ngwachimwene kuwaha kukusonekela mujila yakusungama,

⁴ mangana utachikize kanawa shindakanyi yamazu vákunangwile.

Kusemuka chaYowano muka-kujimika vatu

⁵ Hamakumbi ápwile Helote mwangana wavaYuleya, kwapwile kapilishitu umwe, lijina lyenyi Zekaliya, wakumukana waAviya. Pwevo lyenyi apwile Elizavete, wakumukana wavana vaAlone vamapwevo.

⁶ Kaha vosena vavali vapwile vakwoloka kumeso aKalunga, vatambukilenga chakuzeneka mulonga muJishimbi jaMWATA josena namukulonga chenyi.

⁷ Oloze kavapwile namwanako, mwomwo Elizavete apwile mumba, kaha vosena vavali vapwile hivanakulu lyehi.

⁸ Jino omu Zekaliya apwile nakuzata milimo yaupilishitu kumeso aKalunga hamakumbi amukana wenyi —

⁹ kweseka nomu mwaya milimo yaupilishitu, vamusakwile mangana engile muTembele yaMWATA nakwocha vyalivumba lyamwaza.

¹⁰ Kaha liyongomena lyavatu lyosena lyapwile nakulomba kuweluka, halwola lwakwocha vyalivumba lyamwaza.

¹¹ Kaha kuli ikiye kwasolokele kangelo kaMWATA nemana kumutamba wachilyo walijiko lyakwochela vyalivumba lyamwaza.

¹² Kaha omu Zekaliya amumwene atungumukile kaha woma wamukwachile.

¹³ Oloze uze kangelo amwambile ngwenyi, Ove Zekaliya kanda wivwa womako, mwomwo kulomba chove vanachivu, kaha pwevo lyove Elizavete mwakasema nayove mwana walunga, kaha ukamuluka ngwove Yowano.

¹⁴ Kaha naukapwa nakuwahilila nachisambo, kaha vavavulu navakawahilila hakusemuka chenyi,

¹⁵ mwomwo mwakapwa wamulemu kumeso aMWATA. Kaha kanda akanwa vinyo chipwe wala wausasuko. Mwakazala naShipilitu Wajila kufuma vene mujimo lyanaye.

¹⁶ Kaha mwakahilwisa vana vaIsalele vavavulu kuli MWATA Kalunga kavo,

¹⁷ Kaha mwakatetekelako kulutwe lwaMWATA mushipilitu namungolo jaElija, Nakwalumuna michima yamasevo yitale cheka kuli vana vavo, nayavaka-kulikanga yitale kumangana avaka-kwoloka, alongesele MWATA vatu valizánga lyehi kumutambula.

¹⁸ Kaha Zekaliya ahulishile uze kangelo ngwenyi, Nanguchitachikijila haka? Mwomwo ami ngukashinakaji, napwevo lyami nawa nakulu lyehi.

¹⁹ Kaha uze kangelo amukumbulwile ngwenyi, Yami uze Ngavalyele éji kwimananga kumeso aKalunga, kaha vangutumanga nguhanjike nayove nakukwambulila ou mujimbu wamwaza.

²⁰ Tala naupwa ukamama, kaweshi kuhasa kuhanjikako swi-i nakulikumbi navikasoloka vyosena evi, mwomwo kawafwelelele mazu amiko, awa navakatesamo halwola lwawo.

²¹ Jino vaze vatu vapwile nakuvandamina Zekaliya, valikomokelele kushimbula chenyi muTembele.

²² Kaha omu alovokele, kahashile kuhanjika navoko — apwile kaha nakwinyejeka, mwomwo apwile naumama, hinavejiva ngwavo vanamumwenesa chimweneso muTembele.

²³ Kaha omu makumbi enyi akuzata vyaupilishitu akumine, ayile kwimbo lyenyi.

²⁴ Omu mwahichile makumbi, pwevo lyenyi Elizavete emichile, kaha aliswekele tukweji vatanu. Ambile ngwenyi,

²⁵ Ngocho MWATA Ikiye nangulingilacho, hamakumbi nángwalakana nakungufumisa kusauka mukachi kavatu.

Kusemuka chaYesu

²⁶ Omu Elizavete ahetele mutukweji vatanu naumwe valijimo, Kalunga atumine kangelo Ngavalyele kulimbo-lyakembwe lyakuNgalileya vavuluka ngwavo Nazaleta,

²⁷ kuli mwanapwevo ápwile kanda alimoneho lyehi nalunga, uze váhuhwile kuli lunga lijina lyenyi Yosefwe, wakutanga yaNdavichi. Kaha lijina lyauze mwanapwevo ikiye Maliya.

²⁸ Kaha uze kangelo omu ahetele kuli ikiye amwambile ngwenyi, Hindukenu mwane, ove watokwa, MWATA ali nayove!

²⁹ Oloze mazu kana ayanjishile Maliya mumuchima wenyi chikuma, kaha esekele kushinganyeka atachikize mwaya kumeneka kana.

³⁰ Kaha uze kangelo amwambile ngwenyi, Ove Maliya, kanda wivwa womako, mwomwo unawane uselewa kuli Kalunga.

³¹ Ivwa, nawimita, kaha naukasema mwana walunga, ukamuluka ngwove Yesu.

³² Ikiye mwakapwa wamulemu kaha navakamuvuluka ngwavo Mwana yOu-alitulaho. Kaha MWATA Kalunga mwakamuhana litanda lyakakuluka yenyi Ndavichi,

³³ kaha mwakayulanga tanga yaYakova nakujingonde jázeneka kukuma, wangana wenyi kaweshi kukakumako.

³⁴ Jino Maliya ahulishile uze kangelo ngwenyi, Nachihashiwa ngachilihi, hakupwa ami kanda ngulimonengaho lyehi nalunga?

³⁵ Kaha uze kangelo amukumbulwile ngwenyi, Shipilitu Wajila mweza hali ove, kaha ngolo jayOu alitulaho najipwa hali ove. Shikaho Uze mwakasemuka ajila navakamuvuluka ngwavo, MwanaKalunga.

³⁶ Kaha tala, kausoko kove Elizavete nawa, ou vambilenga ngwavo mumba, nemita lijimo lyamwana walunga muukule wenyi, kaha uno kakweji kenyi wamuchitanu naumwe.

³⁷ Mwomwo kuli Kalunga vyosena vyahashiwa.

³⁸ Kaha Maliya ambile ngwenyi, Eyo mwane, ngundungo yaMWATA, chipwenga ngocho kuli ami ngana omu munayi lizu lyove. Kaha uze kangelo amusezele.

Maliya mwaya nakushikama naElizavete

³⁹ Kaha Maliya akatukile hamakumbi aze nakuya washi kungalila yajipili mulimbo limwe lyakembwe lyamuYuta,

⁴⁰ kaha engilile muzuvo yaZekaliya nakumeneka Elizavete.

⁴¹ Kaha omu Elizavete evwile kumeneka chaMaliya, mwana alinyukile mujimo lyenyi. Elizavete azalile naShipilitu Wajila,

⁴² kaha atambakanyine ngwenyi, Ove uwakukisula mukachi kamapwevo, kaha Ou Mwana áli mujimo lyove nawa wakukisula!

⁴³ Kaha chinafumu haka numba naye yaMwata wami ezenga kuli ami?

⁴⁴ Mwomwo ivwa, omu ngunevu lizu lyakumeneka chove, mwana nalinyuku nakuwahilila mujimo lyami.

⁴⁵ Kaha atokwa ou áfwelelele ngwenyi, vize vamulwezele kuli MWATA navakavitesamo.

⁴⁶ Kaha Maliya ambile ngwenyi, Mwono wami weji kutohwesanga MWATA,

⁴⁷ Nashipilitu yami nawa yeji kuwahililanga chikuma naKalunga Mulwilo wami,

⁴⁸ Mwomwo namono kukuminamo chayami ndungo yenyi. Shikaho tala, kufuma oholili, visemunwino vyosena navinguvulukanga ngwavo atokwa.

⁴⁹ Mwomwo Muka-ngolo nangulingila vyavinene, Kaha lijina lyenyi lyajila.

⁵⁰ Kaha mwatetela vaze vamwivwa woma kuchisemunwino hichisemunwino.

⁵¹ Nasolola ngolo nalivoko lyenyi, Namwange vaka-kutangalala muvishinganyeka vyamichima yavo.

⁵² Nahosomona vaka-kuyula hamatanda avo, Nazezula vakukuminamo.

⁵³ Váli nazala navekuchisa navyamwaza, Kaha vaka-luheto navahange mavokovoko.

⁵⁴ Nakafwe ngamba yenyi Isalele, Hakwanuka kutetela chenyi cházeneka kukuma —

⁵⁵ Kutesa namuze ahanjikile kuli vakakuluka jetu, Vakiko Apalahama navana venyi.

⁵⁶ Maliya atwamine naElizavete kafwe tukweji vatatu, kaha akindulukile kwimbo lyenyi.

Kusemuka chaYowano muka-kujimika vatu

⁵⁷ Jino, lwola lwakusapuluka Elizavete lwahetele, kaha asemene mwana walunga.

⁵⁸ Vaze vakwavo alihachile navo navausoko wenyi omu vevwile ngwavo MWATA namutetela mwamunene, kaha vawahililile nenyi hamwe.

⁵⁹ Kaha halikumbi lyamuchitanu naatatu, vejile nakujihana uze mwana. Kaha vasakile vamuluke ngwavo Zekaliya, lijina lyaise,

⁶⁰ oloze naye avakumbulwile ngwenyi, Chiku, navamuluka ngwavo Yowano.

⁶¹ Kaha vamwambile ngwavo, Kuli vausoko wove kakweshi umwe valuka lijina kanako.

⁶² Vanyachilile ise vatachikize lijina ásakile kumuluka.

⁶³ Kaha alombele lilolwa lyaupalasese, kaha asonekeleho ngwenyi, Lijina lyenyi Yowano. Kaha vosena valikomokelele.

⁶⁴ Hahaze vene kanwa kenyi kasokolokele, lilimi lyenyi lyasovokele, kaha ahanjikile nakwalisa Kalunga.

⁶⁵ Kaha vosena vaze valihachile navo vevwile woma chikuma. Kaha vihande vyosena evi vavishimutwilile mungalila yosena yajipili yamuYuleya,

⁶⁶ kaha vosena vaze vavivwile vavilamine mumichima yavo, nakwamba ngwavo, Ou mwana kana mwakapwa iya? Mwomwo livoko lyaMWATA lyapwile naikiye.

Upolofweto waZekaliya

⁶⁷ Kaha ise Zekaliya azalile naShipilitu Wajila, apolofwetele ngwenyi,

⁶⁸ Vakisulenga MWATA Kalunga kavaIsalele, Mwomwo nalakana vatu jenyi nakuvasokola.

⁶⁹ Kaha natukatwila Lumbinga lwaulwilo Muzuvo yangamba yenyi Ndavichi

⁷⁰ Kutesa namuze ahanjikile mutunwa twavapolofweto jenyi vajila kufuma kushikulu,

⁷¹ Ulwilo wakutulwila kuli vaka-kole jetu, Nakumavoko avosena vatuhunga,

⁷² Asolole kutetela chize áshikile vakakuluka jetu, Nakwanuka chilongeselo chenyi chalushiko chajila,

⁷³ Kulishinga chize alishingile kuli kakuluka yetu Apalahama,

⁷⁴ Mangana, hakutuhana kuyovoka mumavoko avaka-kole jetu, Tukamuzachilenga chakuzeneka woma,

⁷⁵ Mukujila namukwoloka kumeso enyi makumbi etu osena.

⁷⁶ Kaha ove mwana, navakakuvulukanga ngwavo ukapolofweto kayOu alitulaho, Mwomwo naukatetekela kulutwe lwaMwata nakulongesa jijila jenyi,

⁷⁷ Nakuhana vatu jenyi chinyingi chakutachikiza ulwilo, Hakuvakonekela milonga yavo yashili,

⁷⁸ Hamuchima wakutetela waKalunga ketu, Hakiko mwatwalakana Kalunga kufuma mwilu nge kututuka chalikumbi,

⁷⁹ Mangana amunyikile vaze vatwama mumilima namumuvwimbimbi wakufwa, Nakuwilisa mahinji etu mujila yakuunda.

⁸⁰ Kaha uze mwana azovolokelenga nakukwata ngolo mushipilitu, kaha apwile mupambo palanga nakulikumbi lize asolokele hatoma kuli vaIsalele.