Kolose 1 - Chilongeslo-Chalushiko-Lwakalunga Chachihya

Paulu mwavameneka

¹ Ami Paulu, kaposetolo kaKulishitu Yesu chakumuchima waKalunga. Nguli nandumbwetu Chimoteu.

² Kaha nguli nakusonekela enu vaka-kujila, vandumbwetu vakushishika muli Kulishitu kuKolose. Kuli enu kupwenga uselewa nakuunda vyakuli Kalunga Setu.

Kusakwilila nakulomba chaPaulu

³ Omu tweji kumilombelanga makumbi osena, tweji kusakwililanga Kalunga, Ise yaMwata wetu Yesu Kulishitu,

⁴ hakwivwa kufwelela chenu chakufwelela Kulishitu Yesu nazangi muli nayo yakuzanga vaka-kujila vosena,

⁵ mwomwo walutalililo luze vanamitulikila mwilu, luze mwevwile lyehi hamazu amuchano amujimbu wamwaza.

⁶ Ukiko unahete kuli enu ngana omu unahete hakaye hosena, kaha uli nakwima mihako nakutanda, ngana omu weji kulinganga mukachi kenu nawa kufuma kulikumbi lize mwevwile nakutachikiza kanawa likoji lyaKalunga mwamuchano,

⁷ ngana omu vaminangwile kuli Epafwase, mukwetu twazanga mutwatwamina muundungo, ikiye apwa wakushishika, muka-kuzachila Kulishitu hali enu.

⁸ Ikiye natulumbunwina zangi yenu muli Shipilitu.

⁹ Shikaho naetu nawa, kufuma kulikumbi lize twachivwile, katwalitwamina kumilombela nakulembelelako mangana vamizalise nachinyingi chakutachikiza kanawa mwaya muchima waKalunga, mumangana osena nakunangakana vyamuli Shipilitu,

¹⁰ mangana mutambukenga ngana omu chatela muli Mwata, mumusuulwisenga mwosena, mwimenganga mihako mumilimo yamwenemwene yosena, muzovolokenga nawa muchinyingi chakutachikiza kanawa Kalunga,

¹¹ vamizamikisenga nangolo josena, kutesa nangolo jaupahu wenyi, chakutwala kukukakachila nakutalijiza mukuunda hamwe nakuwahilila,

¹² nakusakwililanga Setu, Ou natutesamo kupwa tuvakutambwila hamwe kuuswana wavaka-kujila mukumunyika chenyi.

¹³ Ikiye natuyovola kuwata wamilima nakutunungulwila muwangana waMwanenyi azanga,

¹⁴ muli Ikiye tukwechi kusokoka, chikiko kutukonekela milonga yashili.

UKalunga waKulishitu nakuzata chenyi

¹⁵ Kulishitu Ou vámona apwa henyi henyi Kalunga kavamonako, Ikiye Alitulaho hatengeso yenyi yosena,

¹⁶ mwomwo vyosena vavitángile kuli Ikiye, navize vyamwilu naevi vyahamavu, naevi vamona naovyo kavamonako, chipwe matanda chipwe vamyangana chipwe mawangana chipwe mawata, vyosena vavitàngila muli Ikiye nahali Ikiye.

¹⁷ Kaha Ikiye apwa shimbu vyosena vichili kanda vipwengako, kaha muli Ikiye mukiko vene mwakolela vyosena.

¹⁸ Kaha apwa Mutwe waMujimba — ukiko Liuka, Ikiye Kuputuka, Ikiye Alitulaho muli vakufuma muvafu, mangana muvyosena apwenga Ikiye wakulitulaho.

¹⁹ Mwomwo Kalunga — Ise naMwana naShipilitu Wajila — asuuluka kupwa chauKalunga wenyi chosena chitwame muli MwanaKalunga,

²⁰ kaha hakuzata muli Ikiye nakuneha kuunda hamanyinga akukulusu yenyi, numbanyi vyuma vyosena akaviwanyise naIvene muli Ikiye chipwe vyahamavu chipwe vyamwilu —

²¹ nayenu nawa mwápwilenga vakuhanduka kuli Kalunga hamwaka, mwápwilenga nenyi nakole mumichima yenu havilinga vyavipi,

²² amiwanyisa jino mumujimba wenyi wanyama hakufwa chenyi, mangana amimike kumeso enyi muvakujila, muvakuzeneka katenga, muvakuzeneka hakumiwanyina mulonga —

²³ nge chikupu namutwamanga muvize twáfwelela, muvakuzamamo nakujikiza, nge kamweshi kusosoloka kulutalililo lwakumujimbu wamwazako uze mwevwile, vánambulula nawa kwalenga tengeso yosena mwishi yalilu, kukiko vene ami Paulu, vangulingisa kupwa ngumuka-kuzata.

Milimo yaPaulu muli vaka-mafuchi

²⁴ Ngweji kulisambilanga jino muvihuli vyami ngwamona hali enu, nakuchitesamo mumujimba wami ocho chalihoneneho kuluyando lwaKulishitu, mwomwo waMujimba wenyi, ukiko Liuka.

²⁵ Halikiko vene vangulingisa kupwa ngumuka-kuzata kutesa nauselwa wakuli Kalunga ánguhanyine hali enu — uselwa wakuzata nakutesamo kusoneka mazu aKalunga,

²⁶ akiko mangana aze ápwile akusweka kujingonde nakuvisemunwino, oloze jino vavasolwelawo vaka-kujila jenyi,

²⁷ vaze ájinyine Kalunga kuvajimbwila kutohwa chaupahu wamangana aze ápwile akusweka, analumbunukila muli vaka-mafuchi, awa akwamba ngwavo, Kulishitu muli enu, Ikiye lutalililo lwenu lwakupwa muupahu.

²⁸ Ikiye tweji kwambululanga, nakuhuhumuna mutu himutu nakunangula mutu himutu mumangana osena, ngwetu mutu himutu tukamwimike wakukupuka mwosena muli Kulishitu.

²⁹ Hakiko vene ngweji kukilikichilanga nawa, nakuhundangana nangolo jenyi josena kutesa nakuzata chenyi azata muli ami.