Efwesu 1 - Chilongeslo-Chalushiko-Lwakalunga Chachihya

Paulu mwavameneka

¹ Ami Paulu, kaposetolo kaKulishitu Yesu chakumuchima waKalunga, nguli nakusonekela enu vaka-kujila muli kuEfwesu, vakushishika muli Kulishitu Yesu.

² Uselewa nakuunda vyakuli Kalunga Setu naMwata Yesu Kulishitu vipwenga nayenu.

Kukisula chaushipilitu muli Kulishitu

³ Kalunga kaMwata wetu Yesu Kulishitu apwa wakukisula, Ikiye Ise yaMwata wetu Yesu Kulishitu nawa, Ou átukisula muli Kulishitu najikisu josena jaushipilitu jamumelu,

⁴ ngana omu atusakwile muli Ikiye shimbu kanda chihela chakaye chipweko, mangana ngwenyi tupwenga vajila, tuvakuzeneka katenga kumeso enyi muzangi.

⁵ Atutongwelele lyehi kutwitavila kupwa tuvana venyi vakukola muli Yesu Kulishitu, kutesa nakusuuluka chamuchima wenyi,

⁶ mangana kupwenga kwalisa likoji lyenyi lyaupahu, eli tunatokwelamo muli Mwanenyi azanga.

⁷ Muli Ikiye tukwechi kusokoka hamanyinga enyi, chikiko kutukonekela kuhingika chetu, kutesa nakutohwa chalikoji lyenyi,

⁸ lize átumbwambumwina mumangana osena namukunangakana chosena.

⁹ Kaha atujimbwila vize vyapwile vyakusweka vyamwaya muchima wenyi, kutesa nomu chamusuulwishile, ngana omu ajinyine muli Kulishitu

¹⁰ mangana mumyaka yakutesamo jingonde vatongola, akawanyise vyosena muli Kulishitu, nevi vyamwilu nevi vyahamavu.

¹¹ Muli Ikiye twatambwilamo uswana, hakututongola shimbu vyosena kanda vipweko kutesa nomu akava Ou azata vyosena mwaya punga yamumuchima wenyi,

¹² mangana etu twalivangile kupwa nalutalililo muli Kulishitu, tupwenga tuvakwalishilaho upahu wenyi.

¹³ Nayenu nawa, omu mwevwile mazu amuchano, akiko mujimbu wamwaza waulwilo wenu — omu mwafwelelele Kulishitu, vamihakile katachikijilo, Ikiye Shipilitu Wajila vashikile —

¹⁴ Ou apwa chijikilo chauswana wetu, palanga nakukusokola luheto álanda, mangana vamwalishilengaho haupahu wenyi.

Paulu mwalombela vaka-Efwesu

¹⁵ Shikaho, omu ngwevwile kufwelela chenu chakufwelela Mwata Yesu nazangi yenu yakuzanga vaka-kujila vosena,

¹⁶ kangwalitwamina kusakwilila Kalunga hakumyanuka mukulomba chamiko.

¹⁷ Ngweji kulombanga ngwami, Kalunga kaMwata wetu Yesu Kulishitu, Ise yaupahu, amihane muchima wamangana nakumisolwela chinyingi chakumutachikiza,

¹⁸ mangana meso amichima yenu atone, numba mutachikize vize vamisanyikila mweji kutalililanga, nomu watohwa uswana wenyi waupahu muli vaka-kujila,

¹⁹ nomu japwa ngolo jenyi vazeneka kuhehula hali etu twáfwelela, kweseka nakuzata changolo jenyi jajinene chikuma,

²⁰ jize ásolwele muli Kulishitu hakumusangula muvafu nakumutwamisa kulivoko lyenyi lyachilyo mumelu,

²¹ kuze kwazezuka chikuma kuhambakana mawangana osena nawata wosena nangolo josena navamyangana vosena namajina osena vavuluka, keshi mungonde yino kahako, oloze namuyize nayikeza.

²² Kaha alingisa vyosena kuluuka mwishi yavilyachilo vyenyi, nakumulingisa nawa kupwa Mutwe waLiuka muvyosena —

²³ Liuka likiko Mujimba wenyi, likiko kuzalilila chenyi Ou ázukisa vyosena mwosena.