Yon. 1 - EBIBILIA ENDAKATIFU

Yona akholela Wele Omunyali Owa Bioosi sileka

¹ Endaalo ndala Wele Omunyali Owa Bioosi aboolela Yona okhwa Amitai,

² ali, “Rekukha oche e Ninefe mu lukoba luboofu olwo, mala oboolele bamenyilemo bumayaanu bwabwe. Manyile ndi babaandu bamenyilemo bali bamayaanu.”

³ Ne kakhali Yona aarekukha aacha lubeka luluundi busa khukhwilukha Wele Omunyali Owa Bioosi. Eekha aacha, e Yopa, aanyoolayo emeeli eyaba ne elikho echa e Tarishishi. Aaruunga chirupia che lukeendo mala aniinamo alala ne babaandi khucha e Tarishishi nio abe aleeyi khukhwama khu Wele Omunyali Owa Bioosi.

⁴ Ne kakhali Wele Omunyali Owa Bioosi aaruma ekhuungu eye kamaani khu nyanja, ne embembeesi yaba ne kamaani enyala yafuumalikha emeeli.

⁵ Babeseeli baria lukali ne khulila khukhwenya buyeeti khuhwama khu bawele babwe. Nio, bamwaataka bibiindu mu nyanja bali busiro buboombe. Siise esio, Yona aba eekhile asi khu sibale sie meeli, ali mwiilo likali.

⁶ Omwimeelesi we meeli aanyoola Yona aamureeba ali, “Okhola siina, okona? Yinyokha osabe wele wowo akhuyeete. Wakana akhola ario aakhukholela siisa aaonia bulamu bwefwe.”

⁷ Nio babeseeli be emeeli baboolana bali, “Lekha khumwaate chisimbi mala khunyoole naanu niye khubiiya khulwe khu khureerera efwe butinyu buno.” Bakhola bario, mala esiimbi yekesia Yona.

⁸ Nio bamureeba bali, “Nono khuboolele! Eku, siina sikila ne khuli mu butinyu buno? Okholanga mulimo siina? Waama mu sibala siina? Waama mu kholo siina?”

⁹ Yona aabakobosia ali, “Ese ndi Omueburania, saayanga Wele Omunyali Owa Bioosi, Wele owe mwikulu, owabuumba enyanja ne kamaloba.”

¹⁰ Nio Yona achiililila khubaboolela nga aaba ne alikho eelukha khukhwama khu Wele Omunyali Owa Bioosi. Khwako, babeseeli nga baaulila bario baatasa khuuba ne buuri bukali bamuboolela bali, “Siina nisio okholile sino!”

¹¹ Siise esio, embembeesi yaba elikho echiililila khukucha, nio babeseeli abo bamureeba bali, “Khukhola siina khwiwe nio embembeesi yino eyenjeele?”

¹² Yona aabakobosia ali, “Mwaate mu meechi, nio enyanja elayenjeele. Manyile ndi ese niise ookilile mwanyoolekha mu butinyu buno.”

¹³ Siise esio, babeseeli baakhaka lukali khuyila emeeli khu sikiingi, baatimia ne kamaani kabwe koosi mala khunyala tawe. Sikila embembeesi yachiililila khuuba engali po, mala baakhilwa nisio bakhola.

¹⁴ Nio baalilila Wele Omunyali Owa Bioosi bali, “Ee, Wele Omunyali Owa Bioosi, khukhusaba nosiima khukhafwa khulwe khukhwiira omundu yuno tawe! Okhakhubalilakho kamafuki ko mundu yuno tawe. Sikila ewe ee Wele Omunyali Owa Bioosi, wakholile nga ne osiimisiibwe.”

¹⁵ Nio baabukula Yona bamumwaata mu meechi, mala enyanja yayenjeela khangu.

¹⁶ Lino liakila babeseeli abo baaria Wele Omunyali Owa Bioosi lukali po! Baana embosio khu Wele Omunyali Owa Bioosi, mala beyama khumukholela.

¹⁷ Khulwe lilaka lia Wele Omunyali Owa Bioosi eng'eeni emboofu lukali yamila Yona, mala aaba munda mwe ng'eeni khu ndaalo chitaru siilo ne kumuusi.