Dan. 1 - EBIBILIA ENDAKATIFU

Lukano lwa Danieli ne basaale bewe 1.1—6.28 Basoleeli a luuya lwa Nebukadinesa

¹ Mu mwiiko kwa khataru nikwo Yehoyakimu abelakho omwami owa Yuda, Nebukadinesa, omwami owa Babiloni ebwaakala lukoba lwa Yerusalemu ne khulubotookhelesia.

² Omwami Wele ara Yehoyakimu omwami owa Yuda, mu bunyali bwa Nebukadinesa, alala nende bibiindu bilalakho bie nju eya Wele. Nebukadinesa acha nabio mu sibala sia Shinari, abibiikha munju eya wele wewe.

³ Nio omwami alaka Ashipenasi, omwimeelesi omukhulu owe lichipi liewe, areere mwichipi omwo balala khu baele Baisiraeli babaama munju eye bubwami, ne chinju che lukoosi.

⁴ Benyekha babe baele bakhalikho ne libi liosi lioso tawe, be lukoondo lulayi, barekeerefu mu bukesi bwoosi, be limanya, ne liiulila mu mekisio, banyala bakhola mu lichipi lio mwami khulwe khukhweyika khusoma ne khuandika lulomo lwe Bababiloni.

⁵ Omwami aabaelesia sitonyi buli ndaalo khu biakhulia binulu nibio alichanga ne khu ndali niyo aanywechanga. Baele abo benyibwa bekisibwe khu miiko kitaru, mala bayilwe ebweeni wo mwami.

⁶ Mwabo baba Danieli, Hanania, Mishaeli, ne Asaria, boosi be kholo eya Yuda.

⁷ Nio omukholi omukhulu abatiuukha kamasina: Danieli amulaanga ali Beliteshasa, Hanania ali Shaduraka, Mishaeli amulaanga Meshaka, ne Asaria amulaanga ali Abedineko.

⁸ Ne kakhali Danieli abisia ali se alenyaalutia khulwe khulia siakhulia silayi sio mwami ne khunywa endali yewe tawe. Khwako asaba omwimeelesi omukhulu ali niye akhalia bibiindu ebio enyaalutie tawe.

⁹ Nio Wele akhola omwimeelesi omukhulu akholela Danieli siisa. Danieli aaba ne liifukiililwa mumoni cho mwimeelesi oyo.

¹⁰ Nio omwimeelesi omukhulu aboolela Danieli ali, “Neendekheleele sikila omwami wase owakhalaka biakhulia nende bie khunywa bienywe alabona ali muli batekhele khukhila baele basienywe. Khwako mulakhola omwami anjire.”

¹¹ Nio Danieli aboolela omuliindi niye Ashipenasi arakho khumuliinda niye ne Hanania, Mishaeli ne Asaria ali,

¹² “Nosiima khaka bakholi bowo khu ndaalo ekhumi. Khemukhuelesie chinyenyi che kamasafu busa ne kameechi.

¹³ Enyuma wako ewe kelaania lilolekha liefwe ne lilolekha lie baele balia khu biakhulia binulu bio mwami, mala okhole khu bakholi bowo khuloondekhana nga ne olabona.”

¹⁴ Abafukiilila babakhake bario khu ndaalo ekhumi.

¹⁵ Enyuma we chindaalo ekhumi, balolekhana khuuba balayi lundi banefu khukhila baele boosi babalichanga biakhulia bio omwami.

¹⁶ Nio omukholi arusiao biakhulia bilayi ne ndali eye khunywa, mala abaelesia chinyenyi.

¹⁷ Wele aelesia basoleeli bane abo bukesi ne bubwikhochochi mu biindu bioosi bie khuandikwa, ne limanya. Khutasa khwako, Danieli amanya khubuula bifuno bie kamalola ne kamarooro koosi.

¹⁸ Nga siise nisio omwami akhalaka khu Ashipenasi khureera basoleeli abo ebweeni wewe siola, omwimeelesi owe lichipi oyo areera basoleeli abo ebweeni wo mwami Nebukadinesa.

¹⁹ Omwami alomaloma nabo boosi, ne khwaabo boosi, se anyoolekhakho owaba nga Danieli, Hanania, Mishaeli, ne Asaria tawe. Khwako bekela bakholi bo mwami.

²⁰ Mala omwami nga aabareebanga mu makhuwa koosi kakenyekha limanya ne bukhalaki bulayi, abona ali bali balayi lukali mala bakhila khukhwola ekhumi be kamayia ne bafumu boosi mu bwami bwewe mwoosi.

²¹ Danieli achiililila khukhola kimilimo mu lichipi lio mwami khukhwola kumwiiko kwe khunyoa kwo mwami Sairasi.