Baeb. 1 - EBIBILIA ENDAKATIFU

Elomo eya Wele khubirira mu Mwana wewe

¹ Khaale Wele aalomaloma khu bakuuka befwe mu biise bikali lundi mu ngila chingali khubirira mu bang'oosi,

² ne kakhali mu ndaalo chimaliilisi chino alomaloome khwifwe khubirira mu Mwana wewe. Wele abuumba sibala khubirira mu niye, lundi aamurobora niye khuba ne bibiindu bioosi ekhumaliilikha.

³ Ne obona Omwana aba waboone luyali lwa Wele lundi Omwana oyo ali sifwaanane sisiene ne sisiene sia Wele omwene. Atikiya limala lioosi khulwe lomo yewe eye bunyali. Nga amala khureera khubeelwa khwe bubwoni bwe babaandu, ekhala mwikulu kumukhono kumuseecha kwa Wele, mu bunyali bukali.

Bukali bwo Mwana owa Wele

⁴ Omwana aakholwa omukali khukhila bamalaika, nga lisina nilio Wele amuelesia niye lili liboofu khukhila kakaabwe.

⁵ Sikila Wele se aboolakho khu malaika wewe yesi yesi ali, “Ewe oli Omwana wase; Luno Ese nabeele Paapa wowo,” tawe. Namwe Wele se alomalomakho khu malaika yesi yesi ali “Ese khabe Paapa wewe, Ne niye akhabe Omwana wase,” tawe.

⁶ Ne kakhali nga Wele ne aaba siimbi khuruma Omwana wewe Omubele mu sibala aaloma ali, “Lekha bamalaika ba Wele boosi bamusaaye niye.”

⁷ Ne khuloondekhana ne bamalaika Wele aaloma ali, “Wele akholanga bamalaika bewe baba embeo, Ne bakholi bewe abakholanga khuuba chimemu che kumulilo.”

⁸ Ne kakhali khuloondekhana nende Omwana wewe, Wele aloma ali: “Bubwami bwowo, ee Wele, bulibaao mindali na mindali! Wamiaanga babaandu bowo mu buluungi.

⁹ Wasiima buluungi ne khubiila bumayaanu. Khwako Wele, Wele wowo, aakhurobora ewe ne khu khura ewe angaaki we babaasio lundi ne khu khuchukhakho kamafura ke khoyo.”

¹⁰ Lundi aaloma ali, “Ewe, Omwami, mu khurakikha wabaang'ana sibala, mala wabuumba likulu ne kamakhono kowo kamene.

¹¹ Bikhaweo, ne kakhali ewe okhasikaleo; bioosi bikhatabukhe nga chingubo.

¹² Okhabifumbemo nga ekaanjo, mala bilikaluukhasibwa nga chingubo. Ne kakhali ewe oli busa nga waba buli lwoosi, ne kimiiko kiowo se kiliwa tawe.”

¹³ Wele se aboolelakho malaika wewe yesi yesi ali: “Yikhala ano kumukhono kwase kumuseecha nabwila nga khare basiku bowo babe endebe niyo oswalakho bikele biowo tawe.”

¹⁴ Nono malaika nisio siina? Malaika bali roho bakhalabanila Wele lundi Wele abarumanga khuyeeta abo bakhoyeele banyoole buonia.