Tito 1 - Ibayibuli Ingwalaafu

¹ Ise Paulo, ndi umwakaanisi uwa Wele, naluundi ndi umurume uwa Yesu Kristo. Ise narumanibwa khukhwiloosela khuusalanisa khufukiilila isi barobole ba Wele, ni khuubayeeta mu khumanya bwa ŋali bububoolesa mu khurya Wele.

² Shino ise ishikhola khulwe khukhwiyikina buulamu bubukhawawo ta, bweesi Wele ukhawombesa ta, aakhulomela ifwe, khaale khakheene.

³ Khukhwiyikina khuno, Wele akhwokesanisila mu mbuka inyene mu lomo yeewe, khuubirira mu khulaangilila kamakhuuwa kamalayi khweesi ise ikhola, khukhwaamaambisibwa ise khulwe khuukhalawo khwa Wele, Umuwonesi weefwe.

⁴ Tito, ise indikho ikhuronela iwe, uli umwaana uwase ilala, mu khufukiilila khweesi khulimo fweesi, nga ikhulomela ndi, bubweela ni lukoosi bibyaama isi Paapa Wele, atweela n'umuwonesi weefwe Kristo Yesu, bibe ni nawe.

Buuraambi bwa Tito mu Kurete

⁵ Ilomo iyakila nio ise naakhulekha iwe mu Kurete yaba ndi utabusake ibyo bibyaba nga bishiili khutereera ta, naluundi ndi urobole baraangilisi mu khufukiilila mu buli shiriimba, nga ise ni nakhulomela.

⁶ Uyo yeesi isi iwe urobola khuuba umuraangilisi aakha khuuba umusaani ukhalikho ni likoondo lyoosi ta, naluundi aakha khuuba n'umukyelema mutweela yenyene. Babaana beewe baakha khuuba be tsisaambo tseesi babaandu bakhekanakana lwekhuuba tsili tsye busilu ta, naluundi sibaakha khuuba be bumiinyi ta.

⁷ Lwekhuuba nabwaayi ali umuliindi uwe kimilimo kya Wele, aakha khuuba umuundu ukhalikho ni likoondo lyoosi ta. S'akhila khuuba umuundu uwiniinisa, namwe uwikhalalisaka, namwe umumeesi, namwe uwe bisaayumba, namwe uwiwuuma bibiindu khulwe kumuluungo ta.

⁸ Ne akhali ali ni khuuba umuundu umweela, ukana khuukhola bibiindu bilayi, uwitsililisa naabi mu byeesi akhola, umukwalaafu, umukhosefu, naluundi uwe tsisaambo tsindayi.

⁹ Ali ni khuuwandalalila khu Lomo ya Wele iya ŋali, nga n'ili, nio akile khuleekela khweewe khube khukhuulimo itsamu, naluundi nio akile anyalise khutsuntsumilisa abo babaakhaandisa khuuleekela khuno.

¹⁰ Khulwekhuuba iliwo babaandu banabumiinyi bakali, babekhoomba busa ni kimilomo, naluundi babeeyi, ni khufuurira ilala, abo babenjila imbalu.

¹¹ Babaandu bano baakha bakamisibwa. Khulwekhuuba balikho bakosaasa babaandu be muungo tsingali, nga babaleekela bibiindu byeesi bakhandyakhiile khuleekela ta. Bakhola shino khulwekhuuba nibo bali n'isaambo yeesi bafunamo kamafuurisa.

¹² Umuundu mutweela khu Bakurete beene abo, uli mutweela khu baŋoosi baabwe aloma ari, “Bakurete busheele bali babeeyi, bali busa nga tsisolo, be kumuluungo naluundi baatoro.”

¹³ Sheesi niye abalomakho shino shili sha ŋali. Nashiryo uli ni khubabiiyisa ni kamaani, nio akile nabo batsowatsowane mu khufukiilila khwaabwe.

¹⁴ Ukheela khurekeeresa tsingano tsye Shiyudaaya tsye bubeeyi, namwe kamakaambila ke babaandu babaakhakana bya ŋali ta.

¹⁵ Isi babaandu bakwalaafu, bibiindu byoosi bili bikwalaafu. Ne isi ibo babaakhali bakwalaafu ta, babaali banyaalu naluundi babaakhafukiilila ta, imbaawo shikwalaafu isi bali ta. Bibyambaaso byaabwe ni kimyoyo kyaabwe byaaborokha.

¹⁶ Babaandu nga babeene abo bekholisa bari barya Wele, ne buraambi bwaabwe bwokesanisa buri si baamumanya niye ta. Bali babawuraana, naluundi sibarekeeresa bya Wele ta, lwekhuuba mbaawo shikholwa sheesi banyala khukhola shishiili shilayi ta.